અમદાવાદમાં એર ઇન્ડિયા વિમાન દુર્ઘટનામાં ભોગ બનેલા લોકોના પરિવારોએ ખૂબ જ ચોંકાવનારો દાવો કર્યો છે. દુર્ઘટનામાં માર્યા ગયેલા લોકોના પરિવારના વકીલોનો દાવો છે કે પીડિત પરિવારોને ખોટા મૃતદેહો મળ્યા છે. લંડનમાં રહેતા પીડિતોના પરિવારોનું પ્રતિનિધિત્વ કરતા વકીલોનું કહેવું છે કે મૃતકોના અવશેષોની ખોટી ઓળખ કરીને તેમને બ્રિટન મોકલવામાં આવ્યા છે.
વકીલોના મતે લંડનમાં કોરોનર એટલે કે અકસ્માતમાં માર્યા ગયેલા લોકોની તપાસ કરતા અધિકારીએ મૃતકોના અવશેષોના ડીએનએ સાથે મેચ કરીને ઓળખ ચકાસવાનો પ્રયાસ કર્યો ત્યારે આ વાતનો ખુલાસો થયો. વકીલોનું કહેવું છે કે એક પરિવારે મૃતકના અંતિમ સંસ્કાર રદ કરવા પડ્યા કારણ કે કોરોનરએ તેમને કહ્યું હતું કે શબપેટીમાં તેમના પરિવારના સભ્યનો નહીં પરંતુ કોઈ અજાણ્યા વ્યક્તિનો મૃતદેહ છે.
બીજા એક પીડિતના પરિવારને તેમના મૃત પરિવારના સભ્યના અવશેષો બીજા એક મુસાફરના અવશેષો સાથે મિશ્રિત મળ્યા. બંનેના અવશેષો એક જ શબપેટીમાં રાખવામાં આવ્યા હતા. પરિવારે તેમના મૃતકના અંતિમ સંસ્કાર કરતા પહેલા બંને મુસાફરોના અવશેષોને અલગ કરવા પડ્યા.
ખોટા મૃતદેહો મળતા પરિવારો નારાજ
વકીલોનું કહેવું છે કે ખોટા અવશેષો મળવાથી પરિવારો ખૂબ જ નારાજ છે. એક પરિવારને ખ્યાલ આવ્યો કે તેમને ખોટા મૃતદેહ મળ્યા છે ત્યાર બાદ તે મૃતદેહને દફનાવવા માટે ત્યાં કોઈ ઉભું રહ્યું નહીં. વકીલોએ જણાવ્યું હતું કે અમદાવાદ અકસ્માત પછી મુસાફરોના મૃતદેહ કેવી રીતે મળી આવ્યા અને ઓળખાયા તેની ઘટનાઓની સાંકળ સ્થાપિત કરવા માટે અમે કામ કરી રહ્યા છીએ.
વકીલોએ આ મામલાની તપાસની માંગ કરી છે. લંડન સ્થિત કાયદાકીય પેઢી કીસ્ટોન લો દ્વારા પરિવારોનું પ્રતિનિધિત્વ કરવામાં આવી રહ્યું છે. પીડિત પરિવારોનો આરોપ છે કે અકસ્માત પછી મૃતકોના ડીએનએ મેચિંગની પ્રક્રિયા યોગ્ય રીતે કરવામાં આવી ન હતી, જેના કારણે ખોટા મૃતદેહો બ્રિટન પહોંચ્યા છે.
ડીએનએ મેચિંગ દ્વારા મૃતદેહોની ઓળખ
ગઈ તા. 12 જૂનના રોજ અમદાવાદમાં થયેલા દુ:ખદ વિમાન દુર્ઘટના પછી તરત જ ખૂબ જ મુશ્કેલ બચાવ કામગીરી શરૂ કરવામાં આવી હતી, જેનું નેતૃત્વ અમદાવાદ પોલીસ, ફાયર વિભાગ અને SDRF દ્વારા કરવામાં આવ્યું હતું. બચાવ માટે સ્નિફર ડોગ્સ અને અદ્યતન ઉપકરણોનો ઉપયોગ કરવામાં આવ્યો હતો. સ્થાનિક લોકોએ પણ આ કામગીરીમાં ભાગ લીધો હતો, જેથી પીડિતોને શક્ય તેટલી વહેલી તકે મદદ પૂરી પાડી શકાય.
શું બની હતી ઘટના?
અમદાવાદથી લંડન જઈ રહેલું એર ઈન્ડિયાનું બોઈંગ ડ્રીમલાઈનર વિમાન ટેકઓફ થયાની થોડી મિનિટો પછી જમીન પર તૂટી પડ્યું હતું. તેમાં સવાર 242 મુસાફરોમાંથી ફક્ત એક જ વ્યક્તિ બચી ગયો. આ અકસ્માતમાં કુલ 260 લોકોએ જીવ ગુમાવ્યા. વિમાનમાં 169 ભારતીય, 53 બ્રિટિશ નાગરિકો, સાત પોર્ટુગીઝ નાગરિકો અને એક કેનેડિયન નાગરિક સવાર હતા. જમીન પર પડતા પહેલા, વિમાન એક મેડિકલ હોસ્ટેલની ઇમારત સાથે અથડાયું હતું, જેના કારણે ઇમારત અને આસપાસના વિસ્તારમાં હાજર કેટલાક લોકો ઘાયલ થયા હતા. વિમાન જમીન પર પડતાની સાથે જ તે આગનો ગોળો બની ગયું હતું અને મોટાભાગના મૃતદેહો ખરાબ રીતે બળી ગયા હતા, જેના કારણે પીડિતોના પરિવારોના ડીએનએ નમૂના લેવામાં આવ્યા હતા જેથી તેમની ઓળખ કરી શકાય.
