મુંબઈ: (Mumbai) દેશવાસીઓ માટે કોરોના વાયરસની રસી બનાવી રહેલી સીરમ સંસ્થાના (Serum Institute) સીઈઓ આદર પૂનાવાલાને ઝેડ પ્લસ સુરક્ષા (zed plus security) પૂરી પાડવાની માંગ કરવામાં આવી છે. બોમ્બે હાઈકોર્ટે ઉદ્ધવ સરકારનો આ બાબતે જવાબ માંગ્યો છે. બોમ્બે હાઈકોર્ટે અરજદાર વકીલને કહ્યું, “તેઓએ આ મામલામાં દલીલ કરતી વખતે ધ્યાનમાં રાખવું પડશે કે ભારતની વિશ્વસનીયતા સારી છે અને આવી કાર્યવાહીથી આંતરરાષ્ટ્રીય અસર પડશે.”
અરજીમાં જણાવાયું છે કે જો રસી ઉત્પાદક અસલામતી અનુભવે છે, તો તે રસીના ઉત્પાદન પર અસર કરી શકે છે. પૂનાવાલાએ તાજેતરમાં જ એક મુલાકાતમાં કહ્યું હતું કે તેમને “શક્તિશાળી લોકો” દ્વારા ધમકી આપવામાં આવી રહી છે અને અગ્રતાના આધારે રસી આપવાનું દબાણ કરવામાં આવી રહ્યું છે.
જસ્ટિસ એસ.એસ. શિંદે અને ન્યાયાધીશ એન.આર.બોરકરની વેકેશન બેંચે કહ્યું કે પૂનાવાલા દેશની ખૂબ મોટી સેવા કરી રહ્યા છે. પૂણે નિવાસી ઉદ્યોગપતિને કેન્દ્ર સરકારે પહેલેથી જ ‘વાય’ કેટેગરીની સુરક્ષા આપી દીધી છે. ખંડપીઠે કહ્યું કે આદર પૂનાવાલા અદભૂત કામ કરી રહ્યો છે. અમારી માહિતી મુજબ, તેમને પહેલાથી જ વાય-પ્લસ સુરક્ષા આપવામાં આવી છે. અરજદારો ઝેડ પ્લસ સુરક્ષાની માંગ કરી રહ્યા છે. જો તે જરૂરી હોય, તો રાજ્ય વધુ સુરક્ષા પ્રદાન કરશે.
હાઇ કોર્ટે સરકારને આ મહિનાની શરૂઆતમાં એડવોકેટ દત્તા માને દ્વારા દાખલ કરેલી અરજીનો જવાબ આપવા નિર્દેશ આપ્યો છે. ખંડપીઠે આ કેસમાં આગામી સુનાવણી 1 જૂનના રોજ નક્કી કરી છે. માનેએ પોતાની અરજીમાં પોલીસને એફઆઈઆર નોંધવા અને પૂનાવાલાને રસી પુરા પાડવા માટે અપાયેલી કથિત ધમકીની પણ તપાસ કરવા વિનંતી કરી છે.
કેન્દ્ર સરકાર ભારતમાં કોરોના રસીની અછતને પહોંચી વળવા કામ કરી રહી છે. દેશમાં હજી સુધી માત્ર બે કંપનીઓ પાસે રસી ઉપલબ્ધ છે. સીરમ ઇન્સ્ટિટ્યૂટના કોવિશિલ્ડ અને ભારત બાયોટેકની કોવાક્સિન, પરંતુ રસીનો પુરવઠો માંગ સાથે અનુરૂપ નથી. આના કારણે દેશભરમાં રસીકરણ અભિયાનો પ્રભાવિત થઈ રહ્યા છે. આ જોતા કેન્દ્ર સરકાર વિદેશથી રસી આયાત કરવાની તૈયારી કરી રહી છે. રશિયાની સ્પુટનિક રસીના ડોઝ ભારતમાં પહોંચવા લાગ્યા છે.
ભાજપના પ્રવક્તા સંબિત પાત્રાએ સ્પુટનિક રસી અંગે સરકારનું વલણ રજૂ કર્યું. પાત્રાએ જણાવ્યું હતું કે સ્પુટનિક દ્વારા ભારતમાં બનાવવામાં આવતી રસીનું ઉત્પાદન 6 કંપનીઓ દ્વારા કરવામાં આવશે. પાત્રાએ કહ્યું કે, કોવિડ સુરક્ષા યોજના હેઠળ કેટલીક વધુ કંપનીઓને લિબરલ ફંડિંગ આપીને ભારત સરકારે રસી ઉત્પાદનમાં વધારો કરવાનો પ્રયાસ કર્યો છે.
