નવી દિલ્હી: ચૂંટણીના પરિણામોના દિવસે મંગળવારે આવેલી સુનામીના બીજા દિવસે બુધવારે શેરબજારમાં તોફાની ઉછાળો જોવા મળ્યો હતો. પરિણામના દિવસે સેન્સેક્સ અને નિફ્ટી બંને સૂચકાંકોમાં ઝડપી રિકવરી જોવા મળી હતી. બુધવારે મળેલી એનડીએની બેઠકમાં સરકારને લીલી ઝંડી મળતા તેની અસર ગુરુવારે પણ શેરબજારમાં જોવા મળી હતી અને બોમ્બે સ્ટોક એક્સચેન્જનો 30 શેરો ધરાવતો સેન્સેક્સ ફરી એકવાર લગભગ 700 પોઈન્ટના તોફાની ઉછાળા સાથે 75,000ને પાર કરી ગયો હતો. નેશનલ સ્ટોક એક્સચેન્જનો નિફ્ટી 50 પણ 150થી વધુ પોઈન્ટના જોરદાર ઉછાળા સાથે ખુલ્યો છે.
સેન્સેક્સ 75 હજારને પાર ખૂલ્યો શેરબજારમાં સવારે 9.15 કલાકે લીલા નિશાન પર ટ્રેડિંગ શરૂ થયું હતું. BSE સેન્સેક્સ 696 પોઈન્ટના ઉછાળા સાથે 75,078 પર ખુલ્યો હતો, જ્યારે NSE નિફ્ટી પણ સેન્સેક્સની ગતિ જાળવી રાખીને 178 પોઈન્ટના વધારા સાથે 22,798 પર ખુલ્યો હતો. જ્યારે બજાર ખુલ્યું ત્યારે BSEના 30માંથી 8 શેરમાં ઘટાડો જોવા મળ્યો હતો જ્યારે 22 શેરમાં વધારો જોવા મળ્યો હતો. NTPC શેર સૌથી વધુ ઉછળ્યો હતો અને શરૂઆતના વેપારમાં 3.72 ટકાના ઉછાળા સાથે રૂ. 353.65 પર ટ્રેડ કરી રહ્યો હતો.
આ સિવાય એસબીઆઈ શેર 2.67%ના વધારા સાથે ટ્રેડ થઈ રહ્યો હતો, ટેક મહિન્દ્રાનો શેર 2.35%ના વધારા સાથે ટ્રેડ થઈ રહ્યો હતો, પાવરગ્રીડ શેર 2.03%ના વધારા સાથે ટ્રેડ થઈ રહ્યો હતો. મિડકેપ કંપનીઓમાં BHEL શેર 8.54%, NHPC શેર 6.27%, PFC શેર 6.10%, REC Ltd 5.64%, IOB 4.49%, SJVN 4.24% ના વધારા સાથે ટ્રેડ થઈ રહ્યો હતો.
બુધવારે જોરદાર ઉછાળો આવ્યો હતો
આ અગાઉ મંગળવારના ભારે ઘટાડા બાદ બુધવારે શેરબજારમાં તોફાની ઉછાળો જોવા મળ્યો હતો. બજાર બંધ થયું તે સમયે BSE સેન્સેક્સ 2300 અંક વધીને 74,382.24 પર બંધ થયો હતો, જ્યારે NSE નિફ્ટી 735.85 અંક વધીને 22,620.35 પર બંધ થયો હતો. આ ઉપરાંત બેન્ક નિફ્ટીમાં પણ જોરદાર ઉછાળો જોવા મળ્યો હતો. તે 2,126 પોઈન્ટ વધીને 49,054ની સપાટીએ બંધ રહ્યો હતો. આ સિવાય મિડકેપ અને સ્મોલ કેપ ઇન્ડેક્સમાં પણ જોરદાર ઉછાળો જોવા મળ્યો હતો.
