હરિયાણાના સોનીપત જિલ્લામાં જમીન વિવાદમાં ભારતીય જનતા પાર્ટીના એક નેતાની ગોળી મારીને હત્યા કરવામાં આવી હોવાનું કહેવાય છે. અહેવાલો અનુસાર ભારતીય જનતા પાર્ટી મંડલના પ્રમુખ સુરેન્દ્ર જવાહરને દુકાનની અંદર પીછો કરીને પડોશી વ્યક્તિએ ગોળી મારી દીધી હતી. જમીન વિવાદમાં થયેલી આ હત્યાના સીસીટીવી ફૂટેજ પણ સામે આવ્યા છે. હુમલાખોરે સુરેન્દ્ર જવાહર પર એક પછી એક ત્રણ ગોળીઓ ચલાવી હતી જેના કારણે ભાજપ નેતાનું ઘટનાસ્થળે જ મોત નીપજ્યું હતું.
હુમલાખોર ભાજપ નેતાના પડોશનો રહેવાસી છે અને તેનો ભાજપ નેતા સાથે જૂનો જમીન વિવાદ હતો. એવું કહેવાય છે કે ભાજપ નેતાએ તેમના પાડોશીની ફોઈની જમીન ખરીદી હતી જેના અંગે વિવાદ ચાલી રહ્યો હતો. શુક્રવારે રાત્રે હુમલાખોરે ભાજપ નેતાના માથા પર ત્રણ ગોળી ચલાવી હતી જેમાંથી એક જવાહરના માથામાં અને બીજી પેટમાં વાગી હતી. ઘટનાની માહિતી મળતાં જ પોલીસ ઘટનાસ્થળે પહોંચી ગઈ હતી, મૃતદેહને પોતાના કબજામાં લઈ પોસ્ટમોર્ટમ માટે મોકલી આપ્યો હતો અને કેસની તપાસ શરૂ કરી હતી.
એવું કહેવામાં આવી રહ્યું છે કે જમીનને લઈને ભાજપ નેતા અને આરોપીઓ વચ્ચે ઘણી દલીલો થઈ હતી. શુક્રવારે જ્યારે ભાજપ નેતા જમીન પર બીજ વાવવા ગયા ત્યારે આરોપી પણ ત્યાં પહોંચી ગયો અને બંને વચ્ચે ફરી એકવાર ઝઘડો થયો. વિવાદ પછી જવાહર ત્યાંથી પાછો ચાલ્યો ગયો હતો. આ દરમિયાન જ્યારે તે પોતાની દુકાન પર બેઠો હતો ત્યારે આરોપીઓ ત્યાં પહોંચ્યા અને તેને નિશાન બનાવીને ગોળીઓ ચલાવી. સીસીટીવી ફૂટેજમાં હુમલાખોર જવાહર પર હુમલો કરતો જોવા મળે છે. પોલીસ હવે આ હત્યા કેસની તપાસ કરી રહી છે અને કહ્યું છે કે ટૂંક સમયમાં પરિસ્થિતિ સંપૂર્ણપણે સ્પષ્ટ થઈ જશે.
