બોલિવૂડ એક્ટર સલમાન ખાનને ફરી એકવાર જાનથી મારી નાખવાની ધમકી મળી છે. મીડિયા રિપોર્ટ્સનું માનીએ તો આ વખતે ધમકી આપનાર વ્યક્તિએ 2 કરોડ રૂપિયાની ખંડણી માંગી છે. મુંબઈ ટ્રાફિક પોલીસ દ્વારા મળેલી આ ધમકીમાં કહેવામાં આવ્યું છે કે જો પૈસા નહીં ચૂકવવામાં આવે તો અભિનેતાનો જીવ લઈ લેવામાં આવશે. મેસેજ મળ્યા બાદ વર્લીમાં હાજર અધિકારીઓએ મેસેજ મોકલનાર અજાણ્યા વ્યક્તિ વિરુદ્ધ કેસ નોંધીને તપાસ શરૂ કરી છે.
5 દિવસ પહેલા પણ સલમાનને આવી જ રીતે જાનથી મારી નાખવાની ધમકી આપવામાં આવી હતી. આરોપીની મુંબઈ પોલીસે મંગળવારે નોઈડાથી ધરપકડ કરી હતી. તેની ઓળખ મોહમ્મદ તૈયબ (20) તરીકે થઈ છે. ACP નોઈડા પ્રવીણ કુમાર સિંહે કહ્યું કે આરોપીને સૂરજપુર કોર્ટમાં રજૂ કરવામાં આવશે. ત્યાંથી મુંબઈ પોલીસ તેને ટ્રાન્ઝિટ રિમાન્ડ પર લેશે.
તૈયબે 25 ઓક્ટોબરની સાંજે એનસીપી નેતા બાબ સિદ્દીકીના પુત્ર જીશાન સિદ્દીકીની બાંદ્રા ઓફિસમાં મેસેજ મોકલ્યો હતો. જેમાં સલમાન ખાન અને ઝીશાનને ખંડણી નહીં ચૂકવવામાં આવે તો જાનથી મારી નાખવાની ધમકી આપવામાં આવી હતી. ઝીશાનના એક કર્મચારીએ પોલીસમાં એફઆઈઆર નોંધાવી હતી.
આ પહેલા પણ બાબા સિદ્દીકીની હત્યાના છ દિવસ બાદ (12 ઓક્ટોબર) સલમાનને જાનથી મારી નાખવાની ધમકીઓ મળી હતી. આ ધમકી મુંબઈ ટ્રાફિક કંટ્રોલ રૂમને વોટ્સએપ મેસેજ દ્વારા મોકલવામાં આવી હતી. ધમકી આપનારે પોતે લોરેન્સ ગેંગનો સભ્ય હોવાનો દાવો કર્યો હતો.
મુંબઈ પોલીસના જણાવ્યા પ્રમાણે, ધમકીભર્યા મેસેજમાં લખવામાં આવ્યું હતું કે આને હળવાશથી ન લો. જો સલમાન ખાને જીવિત રહેવું હોય અને લોરેન્સ સાથેની દુશ્મની ખતમ કરવી હોય તો તેણે 5 કરોડ રૂપિયા ચૂકવવા પડશે. જો પૈસા નહીં આપવામાં આવે તો સલમાન ખાનની હાલત બાબા સિદ્દીકી કરતા પણ ખરાબ થઈ જશે. મુંબઈ પોલીસે તેની 23 ઓક્ટોબરે ઝારખંડના જમશેદપુરથી ધરપકડ કરી હતી.
સલમાનના એપાર્ટમેન્ટમાં ફાયરિંગ
સલમાન ખાનના બાંદ્રા સ્થિત ઘર ગેલેક્સી એપાર્ટમેન્ટમાં ફાયરિંગ થયું હતું. આ હુમલાની જવાબદારી લોરેન્સ ગ્રુપે લીધી હતી. ઘટનાના બે મહિના બાદ સલમાને મુંબઈ પોલીસને નિવેદન આપ્યું હતું. તેણે કહ્યું હતું કે હું વારંવાર અલગ-અલગ લોકો દ્વારા નિશાન બનાવીને કંટાળી ગયો છું. અગાઉ પણ અનેક વખત ધમકીઓ મળી છે, દંડ પણ ફટકારવામાં આવ્યો છે. હું ઘણા કેસોમાં ફસાઈ ગયો છું.
