ભારતના મહાન બેટ્સમેન અને ભૂતપૂર્વ કેપ્ટન સચિન તેંડુલકરને લાઇફટાઇમ એચિવમેન્ટ એવોર્ડથી સન્માનિત કરવામાં આવશે. ભારતીય ક્રિકેટ કંટ્રોલ બોર્ડ (BCCI) તેના વાર્ષિક સમારંભમાં સચિનને સન્માનિત કરશે. સચિને પોતાની શાનદાર કારકિર્દી દરમિયાન 664 આંતરરાષ્ટ્રીય મેચોમાં 48.52 ની સરેરાશથી 34,357 રન બનાવ્યા છે.
સચિન આંતરરાષ્ટ્રીય ક્રિકેટમાં સૌથી વધુ રન બનાવનાર ખેલાડી છે. તે સદીઓની સદી ફટકારનાર એકમાત્ર ખેલાડી છે. ટેસ્ટ ક્રિકેટ ઉપરાંત સચિને ODI ફોર્મેટમાં પણ ઘણા રેકોર્ડ બનાવ્યા છે. તેમણે વનડેમાં ૪૪.૮૩ ની સરેરાશથી ૪૯ સદી અને ૯૬ અડધી સદી સાથે ૧૮,૪૨૬ રન બનાવ્યા અને ટેસ્ટમાં ૫૩.૭૮ ની સરેરાશથી ૫૧ સદી અને ૬૮ અડધી સદી સાથે ૧૫,૯૨૧ રન બનાવ્યા. તેણે પોતાની શાનદાર કારકિર્દીમાં ફક્ત એક જ ટી20 આંતરરાષ્ટ્રીય મેચ રમી છે.
આંતરરાષ્ટ્રીય ક્રિકેટમાં સૌથી વધુ રન
કુલ મળીને ૫૧ વર્ષીય સચિને ભારત માટે ૬૬૪ મેચ રમી અને ૪૮.૫૨ ની સરેરાશથી ૩૪,૩૫૭ રન બનાવ્યા છે જેમાં ૧૦૦ સદી અને ૧૬૪ અડધી સદીનો સમાવેશ થાય છે. બોર્ડના એક સૂત્રએ જણાવ્યું, ‘હા, તેમને વર્ષ 2024 માટે સીકે નાયડુ ‘લાઇફટાઇમ એચિવમેન્ટ’ એવોર્ડથી નવાજવામાં આવશે.’ ભૂતપૂર્વ ભારતીય મુખ્ય કોચ રવિ શાસ્ત્રી અને ભૂતપૂર્વ દિગ્ગજ વિકેટકીપર ફારૂક એન્જિનિયરને આ એવોર્ડ મળ્યો છે.
પોતાના યુગના મહાન બેટ્સમેન ગણાતા તેંડુલકર માત્ર એક શાનદાર રન બનાવનાર ખેલાડી જ નહોતો પરંતુ રમતનું એક પ્રતિક પણ છે. તેણે ૧૯૮૯માં ૧૬ વર્ષની ઉંમરે પાકિસ્તાન સામે ટેસ્ટ ડેબ્યૂ કર્યું હતું. તેણે બે દાયકા સુધી ટીમની સેવા ચાલુ રાખી. તે 2011 માં ભારતની વિશ્વ ચેમ્પિયન ટીમનો પણ ભાગ હતો. આ તેનો છઠ્ઠો અને છેલ્લો ODI વર્લ્ડ કપ હતો.
એકંદરે તેંડુલકર આ એવોર્ડ મેળવનાર 31મો ખેલાડી છે. આ પુરસ્કારની સ્થાપના ૧૯૯૪માં ભારતના પ્રથમ કેપ્ટન કર્નલ સીકે નાયડુના માનમાં કરવામાં આવી હતી. નાયડુએ રમતગમત ક્ષેત્રે પણ પ્રશાસક તરીકે સેવા આપી હતી. નાયડુની ૧૯૧૬ થી ૧૯૬૩ સુધી ૪૭ વર્ષની લાંબી ફર્સ્ટ ક્લાસ કારકિર્દી હતી જે એક વિશ્વ રેકોર્ડ છે.
