યુક્રેનિયન કુદરતી ગેસ સુવિધાઓ પર મોટા હુમલાના એક દિવસ પછી શનિવારે રાત્રે રશિયન ડ્રોન અને મિસાઇલોએ યુક્રેનના પાવર ગ્રીડ પર હુમલો કર્યો. અધિકારીઓએ તેને સાડા ત્રણ વર્ષ પહેલાં મોસ્કોના સંપૂર્ણ પાયે આક્રમણ પછી યુક્રેન પરનો સૌથી મોટો હુમલો ગણાવ્યો. પ્રાદેશિક ઓપરેટર ચેર્નિહિવોબ્લેનેર્ગોના જણાવ્યા અનુસાર આ હુમલાથી રશિયન સરહદ નજીક ઉત્તરીય શહેર ચેર્નિહિવ નજીક ઊર્જા સુવિધાઓને નુકસાન થયું હતું અને બ્લેકઆઉટ થયું હતું જે લગભગ 50,000 ઘરોને અસર કરશે.
રશિયાએ યુક્રેન પર વિનાશ વેર્યો
ચેર્નિહિવના લશ્કરી વહીવટના વડા દિમિત્રો બ્રાયઝિન્સ્કીએ પુષ્ટિ આપી હતી કે શહેર પર રાતોરાત રશિયન હુમલાથી અનેક આગ લાગી હતી પરંતુ તેમણે તાત્કાલિક નુકસાનની હદ સ્પષ્ટ કરી ન હતી. યુક્રેનિયન અધિકારીઓએ એક દિવસ પહેલા જણાવ્યું હતું કે રશિયાએ યુક્રેનના રાજ્ય માલિકીના નાફ્ટોગાઝ જૂથ દ્વારા સંચાલિત કુદરતી ગેસ સુવિધાઓ સામે યુદ્ધનો સૌથી મોટો હુમલો કર્યો છે.
યુક્રેનિયન વાયુસેનાના જણાવ્યા અનુસાર રશિયાએ શુક્રવારે યુક્રેન પર કુલ ૩૮૧ ડ્રોન અને ૩૫ મિસાઇલો છોડ્યા હતા જે અધિકારીઓના કહેવા મુજબ શિયાળા પહેલા યુક્રેનિયન પાવર ગ્રીડનો નાશ કરવાનો અને ત્રણ વર્ષ જૂના સંઘર્ષ માટે જાહેર સમર્થનને ઓછું કરવાનો પ્રયાસ હતો.
નાફ્ટોગાઝના મુખ્ય કાર્યકારી અધિકારી સેરહી કોરેત્સ્કીએ શુક્રવારે જણાવ્યું હતું કે આ હુમલાઓનો કોઈ લશ્કરી હેતુ નથી, જ્યારે યુક્રેનિયન વડા પ્રધાન યુલિયા સ્વિરિડેન્કોએ મોસ્કો પર “નાગરિકોને આતંકિત કરવાનો” આરોપ લગાવ્યો હતો. મોસ્કોએ દાવો કર્યો હતો કે આ હુમલાઓએ કિવના યુદ્ધ પ્રયાસોને ટેકો આપતી સુવિધાઓને નિશાન બનાવી હતી.
યુક્રેનિયન સૈન્યએ અહેવાલ આપ્યો હતો કે શનિવાર રાત સુધીમાં રશિયન દળોએ યુક્રેન પર ૧૦૯ ડ્રોન અને ત્રણ બેલિસ્ટિક મિસાઇલો છોડ્યા હતા. યુક્રેનિયન સૈન્યએ જણાવ્યું હતું કે આમાંથી ૭૩ ડ્રોનને કાં તો તોડી પાડવામાં આવ્યા હતા અથવા તો ભટકાવવામાં આવ્યા હતા.
