રશિયાએ શનિવારે સ્વીકાર્યું હતું કે તેના વાયુ સંરક્ષણ દળોએ યુક્રેનના ડ્રોન હુમલાને નિષ્ફળ બનાવવાના પ્રયાસમાં અઝરબૈજાન એરલાઇન્સના વિમાનને તોડી પાડ્યું હતું. ક્રેમલિને જણાવ્યું હતું કે વિમાન રશિયાના ગ્રોઝની એરપોર્ટ પર ઉતરવાનો પ્રયાસ કરી રહ્યું હતું ત્યારે રશિયાના કેટલાક વિસ્તારોમાં યુક્રેનિયન ડ્રોન હુમલાઓ થયા હતા. રશિયાના રાષ્ટ્રપતિ વ્લાદિમીર પુતિને આ અકસ્માત માટે માફી માંગી છે.
રશિયાના રાષ્ટ્રપતિ વ્લાદિમીર પુતિને રશિયન એરસ્પેસમાં વિમાન દુર્ઘટના બદલ અઝરબૈજાનના રાષ્ટ્રપતિ ઇલ્હામ અલીયેવની માફી માંગી છે. આ દુર્ઘટના બુધવારે (25 ડિસેમ્બર) કઝાકિસ્તાનના અક્તાઉ શહેરની નજીક થઈ હતી, જ્યારે ફ્લાઇટ J2-8243 દક્ષિણ રશિયાથી ડાયવર્ટ કરવામાં આવી હતી. ક્રેમલિને માહિતી આપી છે કે રાષ્ટ્રપતિ પુતિને આ દુ:ખદ ઘટના માટે માફી માંગી છે અને પીડિતોના પરિવારો પ્રત્યે ઊંડી સંવેદના વ્યક્ત કરી છે અને ઘાયલોના ઝડપથી સ્વસ્થ થવાની કામના કરી છે.
અઝરબૈજાન એરલાઈન્સની ફ્લાઈટ J2-8243 દક્ષિણ રશિયાથી ઉડાન ભર્યા બાદ કઝાકિસ્તાનના અક્તાઉ શહેર નજીક ક્રેશ થઈ ગઈ હતી. આ ઘટનામાં ઓછામાં ઓછા 38 લોકો માર્યા ગયા હતા જ્યારે 29 લોકો બચી ગયા હતા. આ ફ્લાઇટ J2-8243 દક્ષિણ રશિયાથી ડાયવર્ટ કરવામાં આવી હતી કારણ કે તે સમયે રશિયન પ્રદેશો પર યુક્રેનિયન ડ્રોન દ્વારા હુમલો કરવામાં આવ્યો હતો. વિમાને ગ્રોઝની એરપોર્ટ પર ઉતરવાના ઘણા પ્રયાસો કર્યા પરંતુ નિષ્ફળ ગયા. યુક્રેનિયન ડ્રોન હુમલા દરમિયાન રશિયાની એર ડિફેન્સ સિસ્ટમ દ્વારા આ હુમલાઓને બેઅસર કરવાના પ્રયાસો કરવામાં આવી રહ્યા હતા.
રશિયાએ સ્વીકાર્યું હતું કે અઝરબૈજાની વિમાન પર હુમલો એક ભૂલ હતી. રશિયાએ જણાવ્યું હતું કે વિમાનનું ડાયવર્ઝન સુરક્ષા કારણોસર થયું હતું, કારણ કે ગ્રોઝની, મોઝડોક અને વ્લાદિકાવકાઝ પર યુક્રેનિયન ડ્રોન દ્વારા હુમલો કરવામાં આવી રહ્યો હતો.
