10 ભારતીયોની ધરપકડ,‘ પીડિત’ બનીને વીસા મેળવવાનો પ્લાન ફેલ
અમેરિકામાં ઇમિગ્રેશન લાભ મેળવવા માટે બનાવટી લૂંટનું ષડયંત્ર રચાયું હોવાના ચોંકાવનારા કેસમાં 10 ભારતીયોની ધરપકડ કરવામાં આવી છે, જ્યારે કુલ 11 ભારતીય નાગરિકો સામે કેસ નોંધાયો છે. અમેરિકન ફેડરલ સત્તાધિકારીઓના જણાવ્યા મુજબ, આરોપીઓએ દુકાનો અને અન્ય વેપારી સ્થળોએ ખોટી સશસ્ત્ર લૂંટ ગોઠવી, જેથી સ્ટોર ક્લાર્ક્સ પોતાને હિંસક ગુનાના ભોગ બન્યા હોવાનું બતાવી U non-immigrant status, એટલે કે U Visa, માટે અરજી કરી શકે
મેસાચ્યુસેટ્સ જિલ્લા એટર્ની ઓફિસ મુજબ, તમામ આરોપીઓ સામે conspiracy to commit visa fraud નો ગુનો દાખલ કરવામાં આવ્યો છે. આ કેસમાં નામ જાહેર કરાયેલા આરોપીઓમાં જિતેન્દ્રકુમાર પટેલ, મહેશકુમાર પટેલ, સંજયકુમાર પટેલ, દીપિકાબેન પટેલ, રમેશભાઈ પટેલ, અમિતાબહેન પટેલ, રોનાકકુમાર પટેલ, સંગીતાબેન પટેલ, મિન્કેશ પટેલ, સોનલ પટેલ અને મિતુલ પટેલનો સમાવેશ થાય છે
આમાંથી છ આરોપીઓને મેસાચ્યુસેટ્સમાંથી પકડીને બોસ્ટનની ફેડરલ કોર્ટમાં રજૂ કરવામાં આવ્યા હતા. બાદમાં પ્રાથમિક સુનાવણી પછી તેમને મુક્ત કરવામાં આવ્યા. બાકીના આરોપીઓને કેન્ટકી, મિઝૂરી અને ઓહાયો રાજ્યમાંથી ઝડપવામાં આવ્યા છે અને તેઓને આગળ જઈ બોસ્ટનની ફેડરલ કોર્ટમાં હાજર કરવામાં આવશે
FBIની તપાસ મુજબ, માર્ચ 2023થી આ બનાવટી લૂંટકાંડનું આયોજન શરૂ થયું હતું. અનેક convenience stores, liquor stores અને fast-food outlets પર આવી ખોટી લૂંટ ગોઠવાઈ હતી. ઓછામાં ઓછા છ બનાવો આ સમગ્ર સ્કીમનો ભાગ હોવાનું સત્તાધિકારીઓએ જણાવ્યું છે
પ્રોસિક્યુટર્સના જણાવ્યા પ્રમાણે, લૂંટ દરમિયાન એક વ્યક્તિ નકલી અથવા દેખાવમાં અસલી લાગે તેવી ગન સાથે સ્ટોરમાં ઘૂસી સ્ટાફને ધમકાવતો, કેશ કાઉન્ટરમાંથી રકમ લઈ ભાગી જતો અને આખી ઘટના CCTVમાં કેદ થતી. ત્યારબાદ સ્ટોરના કર્મચારીઓ અથવા માલિકો થોડો સમય રાહ જોઈ પોલીસને જાણ કરતા, જેથી ઘટના સાચી લાગે. તપાસ એજન્સીઓના દાવા મુજબ, કેટલાક ‘પીડિતો’એ આ નાટકમાં ભાગ લેવા માટે પૈસા પણ ચૂકવ્યા હતા
U Visa અમેરિકામાં તેવા વિદેશી નાગરિકો માટે છે, જેઓ ચોક્કસ પ્રકારના ગુનાના ભોગ બન્યા હોય અને તપાસમાં કાયદા અમલ એજન્સીઓને સહકાર આપ્યો હોય. જો આરોપ સાબિત થશે તો આરોપીઓને પાંચ વર્ષ સુધીની જેલ, ત્રણ વર્ષ સુધીની supervised release અને 2.5 લાખ ડોલર સુધીનો દંડ થઈ શકે છે. જોકે, કોર્ટમાં આરોપ સાબિત ન થાય ત્યાં સુધી તમામ આરોપીઓ કાયદાકીય રીતે નિર્દોષ માનવામાં આવે છે
