ચેમ્પિયન્સ ટ્રોફી-2025માં પાકિસ્તાન સામે વિરાટ કોહલીની સદી બાદ ભૂતપૂર્વ ઓસ્ટ્રેલિયન કેપ્ટન રિકી પોન્ટિંગે તેની ખૂબ પ્રશંસા કરી છે. પોન્ટિંગે કહ્યું કે તેણે વનડે ક્રિકેટમાં વિરાટ કોહલીથી ખતરનાક કોઈ ખેલાડી જોયો નથી. તેમણે એવી પણ આશા વ્યક્ત કરી કે આ સ્ટાર બેટ્સમેન સચિન તેંડુલકરનો વન-ડેમાં સૌથી વધુ રનનો રેકોર્ડ તોડી શકશે.
રવિવારે ચેમ્પિયન્સ ટ્રોફીમાં પાકિસ્તાન સામેની મેચમાં વિરાટ કોહલીએ અણનમ 100 રન ફટકાર્યા હતા જે તેના વનડે કારકિર્દીની 51મી સદી છે. કોહલીની આ શાનદાર ઇનિંગને કારણે ભારતે આ મેચ 6 વિકેટથી જીતી લીધી.
પોન્ટિંગે ICC સમીક્ષામાં કહ્યું, મને નથી લાગતું કે મેં 50 ઓવરના ફોર્મેટમાં વિરાટ કોહલી કરતાં સારો ખેલાડી જોયો છે. હવે જ્યારે તે મારાથી આગળ નીકળી ગયો છે અને હવે તેના કરતા ફક્ત બે બેટ્સમેન આગળ છે. તો મને ખાતરી છે કે તે આ ફોર્મેટમાં સૌથી વધુ રન બનાવનાર ખેલાડી તરીકે યાદ રહેવાની શ્રેષ્ઠ તક આપશે.
કોહલીએ પોતાની સદી દરમિયાન ODI ક્રિકેટમાં 14000 રન પણ પૂરા કર્યા છે. સચિન તેંડુલકર અને શ્રીલંકાના કુમાર સંગાકારા પછી આ સિદ્ધિ મેળવનાર તે વિશ્વનો ત્રીજો બેટ્સમેન છે.
કોહલી (14085 રન) હજુ પણ તેંડુલકર (18426) થી 4341 રન પાછળ છે અને 36 વર્ષની ઉંમરે તેની પાસે આ સીમાચિહ્ન સુધી પહોંચવા માટે ખૂબ જ મર્યાદિત સમય છે પરંતુ પોન્ટિંગને નથી લાગતું કે કોહલી માટે આ અશક્ય કાર્ય છે.
પોન્ટિંગે કહ્યું, ચોક્કસપણે શારીરિક રીતે તે હંમેશની જેમ ફિટ છે અને તેની રમતના આ પાસાં પર અપવાદરૂપે સખત મહેનત કરે છે. જ્યારે તમે તેના વિશે વિચારો છો ત્યારે તે આશ્ચર્યજનક છે. વિરાટ છેલ્લા ઘણા વર્ષોથી સતત સારું પ્રદર્શન કરી રહ્યો છે પરંતુ તેમ છતાં તે હજુ પણ તેંડુલકરથી 4000 રન પાછળ છે.
પોન્ટિંગે વધુમાં કહ્યું, આ ફક્ત એ જ નથી બતાવતું કે સચિન કેટલો સારો બેટ્સમેન હતો પરંતુ તે એ પણ દર્શાવે છે કે તે કેટલો સમય રમત રમ્યો. પરંતુ તમે વિરાટ જેવા ખેલાડીનો સમય સમાપ્ત થયો એવું ક્યારેય માની ન શકો. તેનામાં હજુ પણ રન બનાવવાની ભૂખ છે તો હું ક્યારેય નહીં કહું કે તે તેંડુલકરનો રેકોર્ડ તોડી શકશે નહીં.
ઓસ્ટ્રેલિયાના ટેસ્ટ અને વનડે બંને ફોર્મેટમાં સૌથી વધુ રન બનાવનાર ખેલાડી રિકી પોન્ટિંગે બંને ફોર્મેટમાં 13,000થી વધુ રન બનાવ્યા છે. તેમની કેપ્ટનશીપ હેઠળ તેમણે ઓસ્ટ્રેલિયાને બે વાર (2003 અને 2007) ODI વર્લ્ડ કપનો ચેમ્પિયન બનાવ્યું હતું.
