નવી દિલ્હી: પંજાબ (Punjab) અને હરિયાણાના (Haryana) ખેડૂતો તેમની માંગણીઓ સાથે દિલ્હી સુધી કૂચ કરવાની તૈયારી કરી રહ્યા છે. દરમિયાન પંજાબ અને હરિયાણાની શંભુ બોર્ડર (Shambhu border) પર ખેડૂતોની ‘દિલ્હી ચલો’ કૂચ રોકી દેવામાં આવી છે. ખેડૂતોનું (Farmers) આ પ્રદર્શન આજે વધુ તીવ્ર બની શકે છે. કારણ કે ખેડૂત સંગઠનોએ પંજાબમાં રેલ રોકો આંદોલનની જાહેરાત કરી છે. સાથે સાથે આજે ખેડૂત આગેવાનો અને સરકારના (Govt) પ્રતિનિધિઓ વચ્ચે પણ વાતચીત થવાની છે.
ખેડૂતોને રોકવા માટે છેલ્લા બે દિવસથી સતત ટીયર ગેસના શેલ છોડવામાં આવી રહ્યા છે. આ સિવાય સિંઘુ બોર્ડર, ટિકરી બોર્ડર અને ગાઝીપુર બોર્ડર પર મોટી સંખ્યામાં પોલીસ દળો તૈનાત છે. આ સરહદો પર સિમેન્ટ અને લોખંડનું બેરિકેડિંગ પણ કરવામાં આવ્યું છે. આ ઉપરાંત ખેડૂતોને રોકવા માટે કાંટાળા તાર અને કન્ટેનર પણ મુકવામાં આવ્યા છે. બુધવારે ખેડૂત સંગઠનોએ જાહેરાત કરી છે કે તેઓ આજે પંજાબમાં રેલ રોકો આંદોલન કરશે.
શંભુ બોર્ડર પર વિરોધ કરી રહેલા ખેડૂતોએ બેરિકેડ તોડવાનો પ્રયાસ કર્યો હતો. તેમજ હરિયાણા પોલીસ કર્મચારીઓ પર પથ્થરમારો પણ કર્યો હતો. જેના જવાબમાં પોલીસે પાણીની તોપ અને આંસુ ગેસનો ઉપયોગ કરીને પરિસ્થિતિને નિયંત્રણમાં લાવી હતી. હરિયાણા પોલીસના પ્રવક્તાએ કહ્યું કે પ્રદર્શનની આડમાં અશાંતિ ફેલાવવાની પરવાનગી આપવામાં આવશે નહીં. ખેડૂતોએ દિલ્હી જવું હોય તો બસ કે ટ્રેન કે પગપાળા જવું જોઈએ. અમે તેમને ટ્રેક્ટરથી દિલ્હી નહીં જવા દઈએ.
પંજાબમાં રેલ રોકો આંદોલન
પંજાબના સૌથી મોટા ખેડૂત સંગઠન ભારતીય કિસાન યુનિયન (ઉગ્રાહણ)એ આજે રાજ્યમાં રેલ રોકો આંદોલનની જાહેરાત કરી છે. ખેડૂત સંગઠને કહ્યું હતું કે બુધવારે બપોરે 12 થી 4 વાગ્યા સુધી સમગ્ર રાજ્યમાં ટ્રેનો રોકી દેવામાં આવશે. સંગઠનનું કહેવું છે કે ખેડૂતો શાંતિપૂર્ણ રીતે વિરોધ કરી રહ્યા છે. પરંતુ પોલીસ દ્વારા ટીયર ગેસના શેલ છોડવામાં આવી રહ્યા છે અને વોટર કેનનનો ઉપયોગ કરવામાં આવી રહ્યો છે, જે ખોટું છે.
હરિયાણાના 7 જિલ્લામાં આજે મોબાઈલ ઈન્ટરનેટ પર પ્રતિબંધ
હરિયાણાના અંબાલા, કુરુક્ષેત્ર, કૈથલ, જીંદ, હિસાર, ફતેહાબાદ અને સિરસા જિલ્લામાં આજે મોબાઈલ ઈન્ટરનેટ પર પ્રતિબંધ રહેશે. આ સિવાય 22 માંથી 15 જિલ્લામાં કલમ 144 લાગુ છે. ખેડૂતોની 2500 ટ્રેક્ટર ટ્રોલીઓ શંભુ સરહદે પહોંચી છે. જેમાંથી 800 ટ્રોલીઓમાં ખાદ્ય સામગ્રી, લાકડું અને પેટ્રોલ અને ડીઝલ લઈ જઈ રહ્યા છે.
