મહારાષ્ટ્રના (Maharashtra) ભૂતપૂર્વ મુખ્ય પ્રધાન અને શિવસેના પ્રમુખ (ઠાકરે જૂથ) ઉદ્ધવ ઠાકરે (Udhhav Thakrey) મહાવિકાસ અઘાડીમાંથી બહાર થઈ શકે છે. વીર સાવરકર (Vir Savarkar) પર રાહુલ ગાંધીના (Rahul Gandhi) નિવેદનોને કારણે શિવસેના (Shivsena) પરેશાન છે. કહેવાય છે કે ઉદ્ધવ ઠાકરે રાહુલ ગાંધીના નિવેદનોથી નારાજ છે અને મહાવિકાસ અઘાડી છોડી શકે છે. આજે સવારે શિવસેનાના વરિષ્ઠ નેતા સંજય રાઉતે પણ આવા જ સંકેતો આપ્યા હતા.
વીર સાવરકરે અંગ્રેજોને મદદ કરી હતીઃ રાહુલ ગાંધી
વાસ્તવમાં રાહુલ ગાંધીએ ગુરુવારે મહારાષ્ટ્રના અકોલા જિલ્લાના વડેગાંવ ગામમાં દાવો કર્યો હતો કે વિનાયક દામોદર સાવરકરે અંગ્રેજોને મદદ કરી હતી. જ્યાતે તેઓ જેલમાં હતા ત્યારે ડરના કારણે માફી પર હસ્તાક્ષર કરીને મહાત્મા ગાંધી અને અન્ય સમકાલીન ભારતીય નેતાઓ સાથે વિશ્વાસઘાત કર્યો હતો. રાહુલ ગાંધીએ મંગળવારે વાશિમ જિલ્લામાં આયોજિત રેલીમાં હિન્દુત્વના વિચારક સાવરકર પર નિશાન સાધ્યું હતું.
વિનાયક સાવરકરની ‘માફી’ની નકલ બતાવીને રાહુલ ગાંધીએ પ્રહારો કર્યા. તેમણે દાવો કર્યો કે સાવરકરજીએ અંગ્રેજોને મદદ કરી હતી. તેમણે અંગ્રેજોને પત્ર લખીને કહ્યું હતું કે સાહેબ, હું તમારો સેવક બનવા માંગુ છું.’ રાહુલ ગાંધીએ એમ પણ કહ્યું કે જ્યારે સાવરકરજીએ માફી પર હસ્તાક્ષર કર્યા ત્યારે તે ડરના કારણે હતું. જો તે ડરતા ન હોત તો તેમણે ક્યારેય સહી કરી ન હોત. આ સાથે તેમણે મહાત્મા ગાંધી અને તે સમયના નેતાઓ સાથે વિશ્વાસઘાત કર્યો હતો. તેમણે કહ્યું હતું કે દેશમાં એક તરફ મહાત્મા ગાંધીની વિચારધારા છે તો બીજી તરફ સાવરકર સાથે જોડાયેલી વિચારધારા છે.
રાહુલ ગાંધીની ટિપ્પણી બાદ દેખાવો થઈ રહ્યા છે અને ઉદ્ધવ ઠાકરેએ તો એમ પણ કહી દીધું છે કે તેઓ સ્વાતંત્ર્ય સેનાની પર કોંગ્રેસના નેતાના નિવેદન સાથે સહમત નથી. આ મામલે જયરામ રમેશે કહ્યું કે ગાંધીએ આદિવાસી નેતા બિરસા મુંડાના સંદર્ભમાં સાવરકરનો ઉલ્લેખ કર્યો હતો કે કેવી રીતે મુંડા બ્રિટિશ સરકાર સામે ઝૂક્યા ન હતા અને સાવરકરે દયા અરજી પર હસ્તાક્ષર કર્યા હતા. આ હકીકત છે. કોંગ્રેસના પ્રભારી જનરલ સેક્રેટરી, સંદેશાવ્યવહાર અને પ્રચાર વિભાગના પ્રભારી જયરામ રમેશે જણાવ્યું હતું કે મહાન ભારતીયોમાંના એક લોકમાન્ય બાલ ગંગાધર તિલક 1908 થી 14 સુધી છ વર્ષ માટે મંડલા જેલમાં કેદ હતા. તિલકે દયાની અરજી પર હસ્તાક્ષર કર્યા ન હતા. તેમણે કહ્યું કે અમે ઐતિહાસિક વ્યક્તિત્વો પર ચર્ચા કરવા માંગતા નથી. વર્તમાન મુદ્દા પર જૂના દસ્તાવેજોના આધાર પર લાગણીઓને બાજુ પર રાખીને બુદ્ધિશાળી ચર્ચાની જરૂર છે.
કોંગ્રેસના વરિષ્ઠ નેતા જયરામ રમેશે સાવરકર વિવાદ પર રાહુલ ગાંધીનો બચાવ કર્યો છે. તેમણે કહ્યું કે રાહુલ ગાંધીએ હિન્દુત્વના વિચારક વિનાયક દામોદર સાવરકરને નિશાન બનાવ્યા નથી, પરંતુ માત્ર ‘ઐતિહાસિક તથ્યો’ રજૂ કર્યા છે. કોંગ્રેસની ભારત જોડો યાત્રા મહારાષ્ટ્રના બુલઢાણા જિલ્લાના શેગાંવમાં પહોંચી ત્યારે રમેશે કહ્યું કે ઉદ્ધવ ઠાકરેની આગેવાની હેઠળની શિવસેના સાવરકર વિશે રાહુલ ગાંધીના મંતવ્યોને સમર્થન નથી આપતી પરંતુ તેની મહા વિકાસ અઘાડી (MVA) ગઠબંધન પર કોઈ અસર થશે નહીં. જણાવી દઈએ કે અકોલાના વાડેગાંવમાં રાહુલ ગાંધીએ આરોપ લગાવ્યો હતો કે સાવરકરે તત્કાલીન બ્રિટિશ સરકારને મદદ કરી હતી અને તેમનાથી ડરીને દયા અરજી (માફી) પર હસ્તાક્ષર કર્યા હતા. કોંગ્રેસના નેતાઓએ અગાઉ પણ કહ્યું હતું કે સાવરકર ભારતીય જનતા પાર્ટી (ભાજપ) અને રાષ્ટ્રીય સ્વયં સેવક સંઘ (આરએસએસ)ના પ્રતીક છે.
