પાકિસ્તાની ગાયક રાહત ફતેહ અલી ખાનની પોલીસે દુબઈ એરપોર્ટ પરથી ધરપકડ કરી છે. મળતી માહિતી મુજબ રાહત ફતેહ અલી ખાન વિરુદ્ધ દુબઈમાં તેમના પૂર્વ મેનેજર અને પ્રખ્યાત શોબિઝ પ્રમોટર સલમાન અહેમદ દ્વારા કેસ દાખલ કરવામાં આવ્યો હતો. હાલ દુબઈ પોલીસ રાહતની પૂછપરછ કરી રહી છે. રાહત તેમના સિંગિંગ શો માટે લાહોરથી દુબઈ ગયા હતા.
પોતાની ધરપકડના સમાચાર વચ્ચે રાહત ફતેહ અલી ખાને એક વીડિયો જાહેર કરીને પોતાની ધરપકડના સમાચારને નકારી કાઢ્યા છે. જોકે તેમણે આ વાત સીધી રીતે કહી ન હતી. ધરપકડના મુદ્દાને અવગણીને તેમણે કહ્યું કે હું મારા ગીતો રેકોર્ડ કરવા દુબઈ આવ્યો છું, અને બધું બરાબર છે. હું તમને વિનંતી કરીશ કે આવી ખરાબ અફવાઓ પર ધ્યાન ન આપો. દુશ્મનો જે વિચારે છે તેવું કંઈ નથી. હું ટૂંક સમયમાં મારા દેશમાં પાછો ફરીશ અને એક નવા ગીત સાથે તમને આશ્ચર્યચકિત કરીશ.
તમને જણાવી દઈએ કે રાહતે થોડા મહિના પહેલા વિવાદ બાદ અહેમદને બરતરફ કરી દીધો હતો. આ સિવાય રાહત અને અહેમદ બંનેએ એકબીજા પર કેસ દાખલ કર્યા હોવાનું પણ સામે આવ્યું છે. રાહતે ભારતમાં ઘણું નામ કમાવ્યું છે. બોલિવૂડમાં તેમના આવા ઘણા ગીતો છે, જે આજે પણ લોકોમાં ખૂબ જ પ્રખ્યાત છે.
