અવારનવાર હિન્દુ દેવી દેવતાઓ વિરુદ્ધ બેફામ નિવેદનો કરતા અને અનૈતિક વર્તન કરનારા સ્વામિનારાયણ સંપ્રદાયના લંપટ સાધુઓ વિરુદ્ધ તેમના જ ભક્તોમાં રોષ ફાટી નીકળ્યો છે. સ્વામિનારાયણ સંપ્રદાયના સાધુ વિરુદ્ધ શ્રી સ્વામિનારાયણ હિત રક્ષક સમિતિના સભ્યોએ જાહેરમાં વિરોધ પ્રદર્શન કર્યું છે. આજે આ સમિતિના સભ્યોનું એક જૂથ સુરત કલેક્ટર કચેરી ખાતે ભેગું થયું હતું. લંપટ સાધુઓ વિરુદ્ધ સૂત્રોચ્ચાર કરી વિરોધ વ્યક્ત કર્યો હતો. કલેક્ટરને આવેદનપત્ર સોંપી લંપટ સાધુઓ વિરુદ્ધ કાર્યવાહીની માંગણી કરી હતી.
- સુરતમાં સ્વામિનારાયણ સંપ્રદાયના લંપટ સાધુઓ સામે વિરોધ, કલેકટર કચેરી ખાતે લોકોએ નોંધાવ્યો વિરોધ
- સ્વામિનારાયણ હિત રક્ષક સમિતિ દ્વારા વિરોધ, મોટી સંખ્યામાં લોકો બેનરો સાથે કલેકટર કચેરી પહોંચ્યા
- લંપટ સાધુઓના ફોટાઓ લગાવી કરાયો વિરોધ, અવારનવાર કરવામાં આવતા દેવી દેવતાઓના આપમાનને લઈને પણ નોંધાયો વિરોધ
સુરત શહેરમાં સ્વામિનારાયણ સંપ્રદાયના એક સાધુ વિરુદ્ધ લોકોએ ભારે વિરોધ દર્શાવ્યો છે. શ્રી સ્વામિનારાયણ હિત રક્ષક સમિતિના સભ્યોએ અને હરિભક્તોએ સુરત કલેક્ટર કચેરી ખાતે મોટી સંખ્યામાં એકત્રિત થઈ પ્રદર્શન કર્યું હતું. સ્વામી ઘનશ્યામ કંડારી અને અન્ય સાધુઓ પર અમુક હરિભક્તોએ લંપટ અને અનૈતિક વર્તનના ગંભીર આક્ષેપો કર્યા છે. આ મામલે હરિભક્તોમાં રોષ ફેલાયો છે અને તેઓએ કાયદેસર કાર્યવાહી કરવાની માંગણી કરી છે.
વિરોધ પ્રદર્શન દરમિયાન લોકો હાથમાં બેનરો અને પ્લેકાર્ડ્સ લઈને “લંપટ સાધુઓ હટાવો, સંપ્રદાય બચાવો” જેવા સૂત્રો લગાવતા જોવા મળ્યા. અનેક વિરોધીઓએ સ્વામિનારાયણ સંપ્રદાયના સાધુઓ દ્વારા અવારનવાર થતા વિવાદાસ્પદ કિસ્સાઓ પર નારાજગી વ્યક્ત કરી હતી.
વિરોધકોએ લંપટ સાધુઓની હકાલપટ્ટી કરવા, ભવિષ્યમાં આવી ઘટનાઓ ન બને તે માટે કડક પગલાં ભરવા અને સંપ્રદાયની પવિત્રતા જાળવવા કડક નિયમો લાગુ કરવા માટે કલેક્ટરને આવેદનપત્ર આપ્યું હતું. હરિભક્તોએ આ મામલે તાત્કાલિક કાર્યવાહી નહીં થાય તો આંદોલન વધુ ઉગ્ર બનાવવા ચીમકી ઉચ્ચારી છે.
