આસામ વિધાનસભાએ બહુપત્નીત્વ પ્રતિબંધ બિલ 2025 પસાર કર્યું છે. આ કાયદો છઠ્ઠી અનુસૂચિ વિસ્તારો અને અનુસૂચિ જનજાતિઓને લાગુ પડશે નહીં. સરકારના જણાવ્યા અનુસાર આ વિસ્તારોમાં સ્થાનિક રિવાજોને ધ્યાનમાં રાખીને છૂટ આપવામાં આવી છે.
ગુરુવારે પસાર થયેલા બિલ અનુસાર જીવનસાથી જીવિત હોય અને કાયદેસર રીતે છૂટાછેડા લીધા ન હોય ત્યારે બીજા કોઈ સાથે લગ્ન કરવા એ ગુનો છે. સજા સાત વર્ષ સુધીની જેલ અને દંડ છે. પીડિતાને ₹1.40 લાખનું વળતર આપવાની પણ જોગવાઈ છે.
જો કોઈ વ્યક્તિ પોતાના હાલના લગ્ન છુપાવીને બીજી વાર લગ્ન કરે છે તો તેને 10 વર્ષ સુધીની જેલ અને દંડ થઈ શકે છે. દરેક વારંવારના ગુના માટે સજા બમણી કરવામાં આવશે. બિલ પર ચર્ચા દરમિયાન મુખ્યમંત્રીએ વિરોધી પક્ષોને તેમના સુધારા પ્રસ્તાવો પાછા ખેંચવા અપીલ કરી. જોકે ગૃહે AIUDF અને CPI(M) ના પ્રસ્તાવોને ધ્વનિમતથી નકારી કાઢ્યા.
આસામ સરકારે જણાવ્યું હતું કે આવા કિસ્સાઓમાં મહિલાઓ ઘણીવાર સૌથી વધુ પ્રભાવિત થાય છે અને આ કાયદો તેમની સલામતી અને ગૌરવ સુનિશ્ચિત કરવા માટે બનાવવામાં આવ્યો છે. તેમણે આ બિલને રાજ્યમાં મહિલાઓના અધિકારોને મજબૂત કરવા, કૌટુંબિક વ્યવસ્થાને કાયદેસર રીતે સુરક્ષિત કરવા અને સામાજિક સુધારા લાવવા તરફ એક નિર્ણાયક પગલું ગણાવ્યું હતું.
બિલ પસાર થાય તે પહેલાં આસામના મુખ્યમંત્રી હિમંતા બિસ્વા શર્માએ જણાવ્યું હતું કે ઇસ્લામ બહુપત્નીત્વને પ્રોત્સાહન આપી શકતો નથી. જો આ બિલ પસાર થાય છે તો તમને સાચા મુસ્લિમ બનવાની તક મળશે. આ બિલ ઇસ્લામની વિરુદ્ધ નથી. સાચા ઇસ્લામિક લોકો આ કાયદાનું સ્વાગત કરશે. તુર્કી જેવા દેશોએ પણ બહુપત્નીત્વ પર પ્રતિબંધ મૂક્યો છે. પાકિસ્તાનમાં મધ્યસ્થી પરિષદ છે.
તેમણે કહ્યું હતું કે જો હું મુખ્યમંત્રી તરીકે વિધાનસભામાં પાછો ફરીશ તો હું પ્રથમ સત્રમાં UCC રજૂ કરીશ. હું તમને મારી પ્રતિબદ્ધતા આપું છું કે હું આસામમાં UCC રજૂ કરીશ. મુખ્યમંત્રીએ આ મહિનાની શરૂઆતમાં કહ્યું હતું કે સરકાર લવ જેહાદ પર પ્રતિબંધ મૂકશે અને તેની વિરુદ્ધ બિલ રજૂ કરશે. તેમણે ઉમેર્યું, “ફેબ્રુઆરીના અંત સુધીમાં આ સત્રમાં કપટી લગ્નો સામે એક બિલ પણ રજૂ કરવામાં આવશે. અમે લવ જેહાદ વિશે જે કહ્યું છે તે કરવાનું ચાલુ રાખીશું.”
