મોહમ્મદ યુનુસના કાર્યકાળ પછી ભારત અને બાંગ્લાદેશ વચ્ચેના સંબંધોમાં ફરી ઉષ્મા જોવા મળી રહી છે. પશ્ચિમ બંગાળ પોલીસે બાંગ્લાદેશી યુવા કાર્યકર્તા શરીફ ઉસ્માન હાદીની હત્યા કેસમાં મહત્વપૂર્ણ કાર્યવાહી કરીને એક આરોપીની ધરપકડ કરી છે. આ પગલાને બાંગ્લાદેશની તપાસ એજન્સીઓ માટે મોટી મદદ માનવામાં આવી રહી છે અને બંને દેશો વચ્ચે વિશ્વાસ પુનઃસ્થાપિત થતો હોવાનો સંકેત પણ આપે છે. પોલીસના જણાવ્યા અનુસાર, ગુપ્ત માહિતીના આધારે નાદિયા જિલ્લામાંથી ફિલિપ સંગમાની ધરપકડ કરવામાં આવી છે. આરોપ છે કે 12 ડિસેમ્બરે ઢાકામાં થયેલી હત્યા બાદ સંગમા સરહદી દલાલ તરીકે કાર્ય કરી રહ્યો હતો અને તેણે મુખ્ય આરોપી ફૈઝલ કરીમ મસૂદ તથા આલમગીર હુસૈનને ગેરકાયદેસર રીતે ભારત પ્રવેશવામાં મદદ કરી હતી. આ બંને આરોપીઓને 8 માર્ચે પશ્ચિમ બંગાળના બોનગાંવ વિસ્તારમાં બાંગ્લાદેશ સરહદ નજીકથી પકડી લેવામાં આવ્યા હતા.
આ કાર્યવાહી ભારત અને બાંગ્લાદેશ વચ્ચે વધતા સહયોગનું મહત્વપૂર્ણ ઉદાહરણ માનવામાં આવી રહી છે. છેલ્લા કેટલાક મહિનાઓમાં વચગાળાની સરકારના વડા મોહમ્મદ યુનુસના સમયમાં બંને દેશો વચ્ચે તણાવ વધ્યો હતો. જોકે યુનુસના જતા પછી નવી સરકાર સાથેના સંબંધોમાં ઝડપી સુધારો થયો છે. બાંગ્લાદેશે હાદી હત્યા કેસના આરોપીઓને સોંપવાની અને સરહદ પારથી થતી ગેરકાયદેસર પ્રવૃત્તિઓ સામે મળીને કાર્યવાહી કરવાની માંગણી કરી હતી, જેને ભારતે માન્યતા આપી છે. આરોપીઓને બાંગ્લાદેશને સોંપવાની પ્રક્રિયા ઝડપથી આગળ વધતાં સંગમાની ધરપકડને બાંગ્લાદેશ માટે મહત્વપૂર્ણ સફળતા માનવામાં આવી રહી છે.
