એરલાઈન્સને ધમકી આપવાની પ્રક્રિયા અટકી રહી નથી. છેલ્લા 13 દિવસમાં અત્યાર સુધીમાં 300થી વધુ ધમકીઓ મળી છે. આ બધા પાછળ કોનો હાથ છે તેવા સવાલો સતત ઉઠી રહ્યા છે. આ દરમિયાન નાગપુર પોલીસને એક મોટી સફળતા મળી છે. તેણે મહારાષ્ટ્રના ગોંદિયાના 35 વર્ષીય યુવકની ઓળખ કરી છે. એવું કહેવામાં આવી રહ્યું છે કે બોમ્બની ખોટી ધમકી પાછળ આ વ્યક્તિનો હાથ છે.
નાગપુર સિટી પોલીસની સ્પેશિયલ બ્રાન્ચે આ વ્યક્તિની ઓળખ જગદીશ ઉઇકે તરીકે કરી છે એમ એક અધિકારીએ જણાવ્યું હતું. તેની 2021માં એક કેસમાં ધરપકડ થઈ ચૂકી છે. તમને જણાવી દઈએ કે ઉઇકે એ આતંકવાદ પર એક પુસ્તક પણ લખ્યું હતું. અધિકારીએ એ પણ માહિતી આપી હતી કે ધમકીભર્યા ઈમેલની જાણ થતાં ઉઇકે હાલમાં ફરાર છે.
ડેપ્યુટી કમિશનર ઓફ પોલીસ (ડીસીપી) શ્વેતા ખેડકરની આગેવાની હેઠળની તપાસમાં ઉઇકેના ઈમેલ સંબંધિત માહિતી સામે આવી છે. અધિકારીએ જણાવ્યું હતું કે ઉઇકે એ વડાપ્રધાન કાર્યાલય (PMO), રેલવે પ્રધાન, મહારાષ્ટ્રના મુખ્ય પ્રધાન એકનાથ શિંદે અને તેમના નાયબ, એરલાઇન ઓફિસો, પોલીસ મહાનિર્દેશક (DGP) અને રેલવે પ્રોટેક્શન ફોર્સ (DGP) સહિત વિવિધ સરકારી સંસ્થાઓને ઈમેલ મોકલ્યા છે.
સોમવારે નાગપુર પોલીસે નાયબ મુખ્ય પ્રધાન અને ગૃહ પ્રધાન દેવેન્દ્ર ફડણવીસના નિવાસસ્થાનની બહાર સુરક્ષા વધારી દીધી હતી કારણ કે ઉઇકે એ તેમને ધમકી આપતો એક ઇમેઇલ મોકલ્યો હતો જેમાં તેણે ધમકી આપી હતી કે જો તેને ગુપ્ત આતંકવાદી કોડ વિશે માહિતી આપવામાં નહીં આવે તો તે વિરોધ કરશે. તેણે આતંકવાદી ખતરા અંગેની માહિતી અંગે ચર્ચા કરવા વડાપ્રધાન નરેન્દ્ર મોદીને મળવાની પણ વિનંતી કરી હતી.
તેમણે વધુમાં જણાવ્યું હતું કે ઉઇકેએ 21 ઓક્ટોબરે રેલવે મંત્રી અશ્વિની વૈષ્ણવને એક ઈમેલ મોકલ્યો હતો અને તે ડીજીપી અને આરપીએફને પણ મોકલવામાં આવ્યો હતો ત્યારબાદ રેલવે સ્ટેશનો પર સુરક્ષા વધારી દેવામાં આવી હતી. હાલમાં ઉઇકેની ધરપકડ કરવા માટે ખાસ ટીમ બનાવવામાં આવી છે. તે જલ્દી પકડાઈ જશે.
જણાવી દઈએ કે 26 ઓક્ટોબર સુધીના છેલ્લા 13 દિવસમાં ભારતીય એરલાઈન્સની 300થી વધુ ફ્લાઈટ્સને બોમ્બની ધમકી મળી હતી. સરકારી એજન્સીઓએ અગાઉ કહ્યું હતું કે મોટાભાગની ધમકીઓ સોશિયલ મીડિયા દ્વારા આપવામાં આવી હતી. સૂત્રોએ જણાવ્યું હતું કે એકલા 22 ઓક્ટોબરે જ ઈન્ડિગો અને એર ઈન્ડિયાની 13 ફ્લાઈટ સહિત લગભગ 50 વિમાનોને બોમ્બની ધમકી મળી હતી.
