યુટ્યુબર રણવીર અલ્હાબાદિયા છેલ્લા કેટલાક દિવસોથી સતત હેડલાઇન્સમાં છે. રણવીરને માતા-પિતા વિશે અભદ્ર પ્રશ્નો પૂછવા બદલ ઘણી ટીકાઓનો સામનો કરવો પડી રહ્યો છે. આવી સ્થિતિમાં શનિવારે તેના ગુમ થવાના સમાચાર આવી રહ્યા હતા. જેમાં કહેવામાં આવ્યું હતું કે રણવીરનું ઘર બંધ છે અને તેનો ફોન પણ બંધ છે. આ સમાચારો વચ્ચે હવે રણવીરનું નિવેદન સામે આવ્યું છે. રણવીરે એક પોસ્ટ પોતાના સોશિયલ મીડિયા એકાઉન્ટ પર શેર કરી છે જેમાં તેણે કહ્યું કે લોકો મને મારી નાખવાની ધમકી આપી રહ્યા છે. એટલું જ નહીં લોકો મારા પરિવારને દુઃખ પહોંચાડવાની પણ વાત કરી રહ્યા છે. લોકો મારી માતાના ક્લિનિકમાં દર્દીઓના વેશમાં પ્રવેશી રહ્યાં છે જેથી મને ડર લાગી રહ્યો છે. રણવીરે પોલીસને સંપૂર્ણ સહયોગ આપવાની પણ વાત કરી હતી.
રણવીરે સોશિયલ મીડિયા પર પોસ્ટ કરી
સમય રૈનાના શોમાં અશ્લીલ ટિપ્પણી વિવાદ માટે માફી માંગનાર રણવીર અલ્હાબાદિયાએ ફરી એકવાર સોશિયલ મીડિયા પર એક પોસ્ટ શેર કરી છે. રણવીરે જણાવ્યું કે ઘણા લોકો દર્દીના વેશમાં તેની માતાના ક્લિનિકમાં પ્રવેશ્યા. તેણે કહ્યું કે હું ડરી ગયો છું અને પોલીસને સંપૂર્ણ સહયોગ કરી રહ્યો છું. રણવીરે પોતાની પોસ્ટમાં કહ્યું કે “મારી ટીમ અને હું પોલીસ અને અન્ય તમામ સંબંધિત અધિકારીઓને સહકાર આપી રહ્યા છીએ. હું ન્યાયિક પ્રક્રિયાનું પાલન કરીશ અને બધી એજન્સીઓ માટે ઉપલબ્ધ રહીશ,” તેણે પોતાના નિવેદન બદલ માફી માંગતા કહ્યું કે માતાપિતા વિશેની મારી ટિપ્પણીઓ અસંવેદનશીલ અને અપમાનજનક હતી. વધુ સારું કરવું એ મારી નૈતિક જવાબદારી છે અને હું નિષ્ઠાપૂર્વક માફી માંગુ છું.
રણવીર અલ્હાબાદિયાને મળી રહી છે ધમકીઓ
રણવીરે વધુમાં જણાવ્યું કે તેને જાનથી મારી નાખવાની ધમકીઓ મળી રહી છે અને લોકો તેના પરિવારને નુકસાન પહોંચાડવાની વાત કરી રહ્યા છે. તેણે એમ પણ કહ્યું કે કેટલાક લોકો દર્દીના સ્વાંગમાં આવીને તેની માતાના ક્લિનિકમાં ઘૂસવાનો પ્રયાસ કરી રહ્યા છે જેના કારણે તે ડરી રહ્યો છે. જોકે રણવીરે સ્પષ્ટ કર્યું કે તે આ બાબતોથી ભાગશે નહીં. તેણે કહ્યું કે તેને ભારતીય પોલીસ અને ન્યાયિક પ્રણાલીમાં સંપૂર્ણ વિશ્વાસ છે.
શું મામલો છે?
ઉલ્લેખનીય છે કે રણવીરે ઈન્ડિયાઝ ગોટ લેટેન્ટ શોના એક એપિસોડ દરમિયાન માતા-પિતા વિશે અભદ્ર ટિપ્પણી કરી હતી. આનો એક વીડિયો સોશિયલ મીડિયા પર વાયરલ થયો હતો. વીડિયો જોયા પછી લોકો તેના પર ગુસ્સે થયા અને કડક કાર્યવાહીની માંગ કરવા લાગ્યા. આ પછી તેની સામે અત્યાર સુધીમાં અનેક FIR નોંધાઈ છે. તાજેતરમાં જ્યારે મુંબઈ અને આસામ પોલીસ તેના ઘરે પહોંચી ત્યારે તેનું ઘર તાળું મારેલું મળી આવ્યું. સમય રૈનાએ પણ આ મામલે સ્પષ્ટતા આપી છે. તેણે તાજેતરમાં સોશિયલ મીડિયા દ્વારા જણાવ્યું હતું કે તેનો ઉદ્દેશ્ય લોકોનું મનોરંજન કરવાનો છે. આ સાથે તેણે એ પણ માહિતી આપી કે તેણે આ શોના બધા વીડિયો ડિલીટ કરી દીધા છે.
