એશિયા કપ 2025ની ફાઇનલમાં ભારત દ્વારા મોહસીન નકવીના હાથે ટ્રોફી નહીં સ્વીકારવાનો વિવાદ વધતો જઈ રહ્યો છે. PCB ચીફે કહ્યું કે હું કાર્ટૂનની જેમ ઉભો હતો. મને કહેવામાં આવ્યું ન હતું કે ભારત મારી પાસેથી એશિયા કપ ટ્રોફી સ્વીકારશે નહીં. આ પહેલાં પાકિસ્તાન ક્રિકેટ બોર્ડ (PCB)ના ચેરમેન અને પાકિસ્તાનના ગૃહમંત્રી મોહસીન નકવી એશિયા કપ ટ્રોફી ભારતને પરત આપવા તૈયાર થયા હતા જેમાં તેમણે શરત મુકી હતી કે કોઈ સત્તાવાર કાર્યક્રમમાં તે પોતે ભારતને ટ્રોફી આપશે.
BCCI ના પ્રશ્નના જવાબમાં PCB ચીફે કહ્યું, “હું કાર્ટૂનની જેમ ઉભો હતો.” તેમણે કહ્યું, “મને કહેવામાં આવ્યું ન હતું કે ભારત મારી પાસેથી એશિયા કપ ટ્રોફી સ્વીકારશે નહીં.” એશિયન ક્રિકેટ કાઉન્સિલ (ACC) એ મંગળવારે તેના દુબઈ મુખ્યાલયમાં તેની વાર્ષિક સામાન્ય સભા યોજી હતી. એશિયા કપ ફાઇનલ દરમિયાન ટ્રોફી ન આપવાનો ભારતે સખત વિરોધ કર્યો હતો જેની મીટિંગ દરમિયાન ચર્ચા થઈ હતી. મીડિયા રિપોર્ટ્સ અનુસાર મીટિંગ દરમિયાન મોહસીન નકવીએ સ્પષ્ટતા કરી કે ACC ને લેખિતમાં જાણ કરવામાં આવી ન હતી કે ભારતીય ટીમ મારી પાસેથી ટ્રોફી સ્વીકારશે નહીં. હું કોઈ કારણ વગર કાર્ટૂનની જેમ ત્યાં ઉભો હતો.
ભારતીય ક્રિકેટ કંટ્રોલ બોર્ડ (BCCI) ના ઉપપ્રમુખ રાજીવ શુક્લાએ મીટિંગ દરમિયાન ACC અને PCB ચીફ મોહસીન નકવીને પૂછ્યું કે વિજેતા ટીમને ટ્રોફી કેમ રજૂ કરવામાં આવી નથી. “તે ACC ની ટ્રોફી છે, અને તે ઔપચારિક રીતે વિજેતા ટીમને રજૂ કરવામાં આવવી જોઈતી હતી.”
ક્રિકબઝના અહેવાલ મુજબ ભારતના રાજીવ શુક્લા અને આશિષ શેલાર પણ ACC ના મુખ્ય સભ્યો સાથે હાજર હતા. બંને વીડિયો કોન્ફરન્સિંગ દ્વારા મીટિંગમાં જોડાયા હતા. બેઠકમાં એવું નક્કી કરવામાં આવ્યું હતું કે કાઉન્સિલના ટેસ્ટ-પ્લેઇંગ સભ્યો, ભારત, બાંગ્લાદેશ, શ્રીલંકા અને અફઘાનિસ્તાન, ટ્રોફી વિવાદ ઉકેલવા માટે મળશે. અગાઉ 29 સપ્ટેમ્બરના રોજ BCCI સચિવ દેવજીત સૈકિયાએ જણાવ્યું હતું કે તેઓ નવેમ્બરમાં ICC મીટિંગમાં આ મુદ્દો ઉઠાવશે.
ટીમ ઇન્ડિયા ટ્રોફી વિના પરત ફરી
28 સપ્ટેમ્બરના રોજ યોજાયેલી ફાઇનલમાં ભારતે પાકિસ્તાનને 5 વિકેટથી હરાવ્યું. મેચ પછીના પ્રેઝન્ટેશનમાં વ્યક્તિગત પુરસ્કારો પ્રાપ્ત કર્યા પછી ACC ચીફ મોહસીન નકવી ભારતીય ટીમને વિજેતા ટ્રોફી અને ખેલાડીઓને મેડલ આપવા માંગતા હતા. તેઓ પાકિસ્તાનના ગૃહમંત્રી પણ છે, તેથી ભારતીય ખેલાડીઓએ તેમના તરફથી પુરસ્કારો સ્વીકારવાનો ઇનકાર કર્યો હતો. ત્યારબાદ કેપ્ટન સૂર્યકુમાર યાદવે ટ્રોફી વિના અંતિમ વિજયની ઉજવણી કરી. 29 સપ્ટેમ્બરના રોજ ટીમ ટ્રોફી વિના ભારત પરત ફરી છે.
