પાકિસ્તાનના ક્વેટા રેલવે સ્ટેશન પર શનિવારે સવારે થયેલા વિસ્ફોટમાં 27 લોકોના મોત થયા છે. વિસ્ફોટમાં 50થી વધુ લોકો ઘાયલ થયા છે. પાકિસ્તાની મીડિયા રિપોર્ટ્સ અનુસાર આતંકવાદી જૂથ બલૂચ લિબરેશન આર્મી (BLA) એ હુમલાની જવાબદારી લીધી છે. BLAના પ્રવક્તાએ કહ્યું કે આત્મઘાતી હુમલો મજીદ બ્રિગેડ યુનિટ દ્વારા કરવામાં આવ્યો હતો. તેમનું નિશાન ઇન્ફન્ટ્રી સ્કૂલના સૈનિકો હતા, જેઓ કોર્સ પૂરો કરીને જાફર એક્સપ્રેસ દ્વારા પેશાવર જવાના હતા. અધિકારીઓએ જણાવ્યું કે ઘાયલ થયેલા ઘણા મુસાફરોનું હોસ્પિટલમાં મૃત્યુ થયું છે. ક્વેટા સિવિલ હોસ્પિટલના પ્રવક્તા વસીમ બેગે પાકિસ્તાની અખબાર ધ ડોનને જણાવ્યું હતું કે માર્યા ગયેલાઓમાં 14 સૈન્ય સૈનિકો અને 12 નાગરિકો છે.
અધિકારીઓના જણાવ્યા અનુસાર શનિવારે ક્વેટા રેલવે સ્ટેશન પર થયેલા વિસ્ફોટમાં 14 સૈનિકો સહિત ઓછામાં ઓછા 27 લોકોનાં મોત થયાં હતાં અને 40 અન્ય ઘાયલ થયા હતા. ક્વેટાના વરિષ્ઠ પોલીસ અધિક્ષક (એસએસપી) ઓપરેશન્સ, મોહમ્મદ બલોચે જણાવ્યું હતું કે, 26 મૃતકોમાં 14 સૈન્ય કર્મચારીઓનો સમાવેશ થાય છે. ક્વેટાના મુખ્ય રેલવે સ્ટેશન પર વિસ્ફોટની ક્ષણ સીસીટીવીમાં કેદ થઈ હતી જ્યાં પ્લેટફોર્મ પર સેંકડો લોકો ટ્રેનની રાહ જોઈ રહ્યા હતા. ત્યાર પછીની ઘટનામાં સ્ટેશનની છત ઊડી જવાની સાથે પ્લેટફોર્મ પર વિખરાયેલા મૃતદેહો દેખાયા હતા.
પાકિસ્તાન તેના ઉત્તર-પશ્ચિમમાં આતંકવાદી હુમલામાં વધારો અને દક્ષિણમાં વધી રહેલા અલગતાવાદી બળવા સાથે ઝઝૂમી રહ્યું છે. વરિષ્ઠ પોલીસ અધિકારીએ ઉમેર્યું હતું કે ‘પેશાવર જતી એક્સપ્રેસ તેના ગંતવ્ય સ્થાને જવા ઊપડી ત્યારે રેલવે સ્ટેશનની અંદર વિસ્ફોટ થયો હતો. બલૂચ લિબરેશન આર્મીએ ક્વેટા વિસ્ફોટની જવાબદારી લીધી છે.
જૂથના પ્રવક્તા જીઆંદ બલોચે કહ્યું કે અમે ક્વેટા રેલવે સ્ટેશન પર થયેલા વિસ્ફોટની જવાબદારી સ્વીકારીએ છીએ. આજે સવારે ક્વેટા રેલવે સ્ટેશન પર પાકિસ્તાની સૈન્ય એકમ પર ફિદાયી હુમલો કરવામાં આવ્યો હતો. જ્યારે તેઓ ઇન્ફન્ટ્રી સ્કૂલમાં અભ્યાસક્રમ પૂરો કરીને જાફર એક્સપ્રેસ દ્વારા પરત ફરી રહ્યા હતા. આ હુમલાને બીએલએના ફિદાયી યુનિટ મજીદ બ્રિગેડ દ્વારા અંજામ આપવામાં આવ્યો હતો જ્યારે ટ્રેન સ્ટેશનથી પ્રસ્થાન કરવાની તૈયારી કરી રહી હતી. આ ઘટનાને કારણે રેલવે ઇન્ફ્રાસ્ટ્રક્ચરને પણ નુકસાન થયું હતું. ત્યારથી સત્તાવાળાઓએ વિસ્તારને કોર્ડન કરી લીધો છે.
પ્લેટફોર્મ પર ભીડ હતી
ક્વેટાના એક વરિષ્ઠ પોલીસ અધિકારીએ જણાવ્યું કે ટ્રેન 9 વાગે પેશાવર જવા રવાના થવાની હતી. અકસ્માત સમયે મુસાફરો અન્ય ટ્રેનની રાહ જોઈ રહ્યા હતા. તેમણે કહ્યું કે બ્લાસ્ટ સમયે પ્લેટફોર્મ પર 100 થી વધુ લોકો હતા. કેટલાક રિપોર્ટ્સમાં કહેવામાં આવી રહ્યું છે કે બ્લાસ્ટ બુકિંગ ઓફિસ પાસે થયો હતો.
