પાકિસ્તાનના પંજાબ, સિયાલકોટ અને અન્ય વિસ્તારોમાં આવેલા વિનાશક પૂરે જનજીવન ખોરવી નાખ્યું છે. અત્યાર સુધીમાં ૮૦૦ થી વધુ લોકો મૃત્યુ પામ્યા છે. ૧૨ લાખથી વધુ લોકો પ્રભાવિત થયા છે. ૨.૫ લાખ લોકો વિસ્થાપિત થયા છે. લગભગ ૧,૪૩૨ ગામડાઓ પૂરથી પ્રભાવિત થયા છે. પાક નાશ પામ્યા છે, વ્યવસાયો ઠપ્પ છે અને હજારો પરિવારો રાહત શિબિરોમાં રહેવા મજબૂર છે. સરકારે ૭૦૦ રાહત અને ૨૬૫ તબીબી શિબિરો સ્થાપ્યા છે પરંતુ જમીન પર પરિસ્થિતિ ખૂબ જ ગંભીર છે.
આવી ગંભીર પરિસ્થિતિમાં પણ પાકિસ્તાન ભારત સામે ઝેર ઓકવાનું બંધ કરી રહ્યું નથી. પૂરગ્રસ્ત સિયાલકોટની મુલાકાત દરમિયાન સંરક્ષણ પ્રધાન ખ્વાજા મોહમ્મદ આસિફે એક વિચિત્ર નિવેદન આપ્યું હતું. તેમના મતે ભારતથી છોડવામાં આવેલા પૂરના પાણીથી મૃતદેહો, પશુઓ અને કાટમાળના ઢગલા પાકિસ્તાન આવ્યા હતા. તેમણે કહ્યું કે આ કાટમાળ સ્થાનિક વહીવટીતંત્રના રાહત કાર્યમાં અવરોધ ઉભો કરી રહ્યો છે. આસિફે વધુમાં જણાવ્યું હતું કે સિયાલકોટ જમ્મુથી નીકળતા જળમાર્ગોના નીચલા ભાગમાં આવેલું છે અને જ્યારે પણ ભારત પાણી છોડે છે ત્યારે નિયમિતપણે પૂર આવે છે. જોકે આસિફે એ પણ સ્વીકાર્યું કે ભારતે નદીઓમાં પાણી છોડતા પહેલા બે વાર પાકિસ્તાનને જાણ કરી હતી.
ખ્વાજા આસિફનું આ નિવેદન પાકિસ્તાની સોશિયલ મીડિયા પર વાયરલ થયું. લોકોએ તેમની ટીકા કરતા કહ્યું કે સરકાર તેની તૈયારીઓ અને માળખાગત નિષ્ફળતાઓ પરથી ધ્યાન હટાવવા માટે ભારત પર આરોપ લગાવી રહી છે. ઘણા લોકોએ કટાક્ષમાં લખ્યું કે પૂર પાણીથી આવે છે, લાશોથી નહીં.
આ વિવાદ એવા સમયે સામે આવ્યો છે જ્યારે ભારત અને પાકિસ્તાન વચ્ચે સિંધુ જળ સંધિ પહેલાથી જ સ્થગિત છે. સંધિ હેઠળ પાણી સંબંધિત ડેટાનું આદાન-પ્રદાન કરવામાં આવ્યું હતું પરંતુ એપ્રિલ 2025 માં પહેલગામ હુમલા પછી ભારતે તેને અટકાવી દીધું હતું. આમ છતાં ભારતે જાહેર સલામતીને ધ્યાનમાં રાખીને પાકિસ્તાન સાથે ખરાબ હવામાન અને સંભવિત ભારે પૂર વિશે માહિતી શેર કરી હતી.
ઐતિહાસિક સ્તરનું પૂર
પાકિસ્તાની સિંચાઈ વિભાગના જણાવ્યા અનુસાર 38 વર્ષમાં પહેલી વાર રાવી, સતલજ અને ચિનાબ નદીઓ એક સાથે પૂરમાં છે. આનાથી બચાવ કાર્ય વધુ મુશ્કેલ બન્યું છે. સેના અને રાહત કાર્યકરો ઘણા જિલ્લાઓમાં ચોવીસ કલાક કામગીરી કરી રહ્યા છે.
