રાષ્ટ્રપતિ દ્રૌપદી મુર્મુએ 18મી લોકસભાને પોતાના પ્રથમ સંબોધનમાં ઈમરજન્સી સહિત ઘણી બાબતોનો ઉલ્લેખ કર્યો હતો. બીજી તરફ વિપક્ષી ગઠબંધને તેના પર નિશાન સાધ્યું છે. વિપક્ષના મતે રાષ્ટ્રપતિના સંબોધનની સ્ક્રિપ્ટ સરકાર દ્વારા આપવામાં આવી હતી અને તે જુઠ્ઠાણાથી ભરેલી હતી. સંસદમાં કટોકટી પર શાસક ગઠબંધનના નેતાઓ દ્વારા કરવામાં આવેલી ટિપ્પણીઓને લઈને રાહુલ ગાંધીએ લોકસભાના અધ્યક્ષ સમક્ષ પોતાની નારાજગી વ્યક્ત કરી હતી. તેમણે કહ્યું કે આ સંપૂર્ણપણે રાજનીતિથી પ્રેરિત છે અને આવું ન થવું જોઈતું હતું.
લોકસભામાં વિપક્ષના નેતા રાહુલ ગાંધીએ ગુરુવારે લોકસભા અધ્યક્ષ ઓમ બિરલા સાથે મુલાકાત કરી હતી. રાહુલે કટોકટી પર સંસદમાં સત્તાધારી ગઠબંધન નેતાઓ દ્વારા કરવામાં આવેલી ટિપ્પણીઓ પર નારાજગી વ્યક્ત કરી હતી. તેમણે કહ્યું કે આ સંપૂર્ણપણે રાજનીતિથી પ્રેરિત છે અને આવું ન થવું જોઈતું હતું. કોંગ્રેસના મહાસચિવ કેસી વેણુગોપાલ રાવે આ અંગે માહિતી આપી હતી. તેમણે કહ્યું કે વિપક્ષના નેતા તરીકે રાહુલ ગાંધીએ આ મુદ્દે કહ્યું હતું કે લોકસભા અધ્યક્ષ દ્વારા ઈમરજન્સી અંગેના નિવેદનોની અવગણના કરી શકાઈ હોત.
રાષ્ટ્રપતિના સંબોધન બાદ સમાજવાદી પાર્ટીના અધ્યક્ષ અખિલેશ યાદવે કહ્યું કે, ભારતીય જનતા પાર્ટીએ ઈમરજન્સી દરમિયાન જેલવાસીઓ માટે શું કર્યું? જ્યારે, સમાજવાદી પાર્ટીએ તે લોકોને સન્માન અને પેન્શન આપ્યું હતું. અખિલેશ યાદવે વધુમાં કહ્યું કે, ‘શાસક પક્ષ દ્વારા ભારતને વિશ્વની પાંચમી સૌથી મોટી અર્થવ્યવસ્થા તરીકે વર્ણવવામાં આવે છે. શું તેનાથી દેશના ખેડૂતોમાં સમૃદ્ધિ આવી? જો ભારત વિશ્વની પાંચમી સૌથી મોટી અર્થવ્યવસ્થા છે તો આટલા બધા યુવાનો બેરોજગાર કેમ છે? દેશમાં અગ્નવીર યોજના શા માટે છે? મોંઘવારી કેમ કાબૂમાં નથી આવી રહી?
સરકારે આપેલી સ્ક્રિપ્ટ – TMC
તૃણમૂલ કોંગ્રેસ (TMC)ના સાંસદ મહુઆ મોઇત્રાએ કહ્યું કે રાષ્ટ્રપતિએ તેમના સંબોધનમાં કેન્દ્ર સરકાર દ્વારા આપવામાં આવેલી સ્ક્રિપ્ટમાંથી વાંચ્યું. મોઇત્રાએ કહ્યું, ‘ભાજપના નેતાઓને ખ્યાલ નથી કે તેમની પાસે બહુમતી નથી.’
બીજી તરફ સીપીઆઈ (એમએલ)ના સાંસદ સુદામા પ્રસાદનું કહેવું છે કે રાષ્ટ્રપતિનું સંબોધન સંપૂર્ણપણે જુઠ્ઠાણાથી ભરેલું હતું. સુદામા પ્રસાદે કહ્યું કે રાષ્ટ્રપતિનું સંબોધન સાંભળીને એવું લાગી રહ્યું હતું કે જાણે તેઓ ભાજપને પૂર્ણ બહુમતીવાળી સરકાર કહી રહ્યા છે. તેમણે વધુમાં કહ્યું કે આ ગઠબંધન સરકાર છે. તેમણે આગળ કહ્યું, ‘રાષ્ટ્રપતિએ મણિપુરની સ્થિતિ વિશે વાત કરવી જોઈતી હતી કારણ કે મણિપુરની સ્થિતિ ખૂબ જ ખરાબ થઈ ગઈ છે.
કોંગ્રેસના નેતા તારિક અનવરે કહ્યું કે રાષ્ટ્રપતિના સંબોધનમાં કંઈ નવું નથી. તેમણે કહ્યું, ‘ઇમરજન્સી પછી પણ દેશમાં ઘણી વખત લોકસભાની ચૂંટણી થઈ અને ભાજપની હાર થઈ. તેની પાસે કહેવા માટે કંઈ બચ્યું નથી.
