સુરતઃ એક સમયે ગુજરાત સેફ સ્ટેટ અને સુરત સેફ સિટી ગણાતું હતું, પરંતુ હવે સુરતને સુરક્ષિત શહેર કહેવું કદાચ ભૂલભરેલું ગણાશે. કારણ કે સુરત શહેરમાં દર બીજા દિવસે હત્યાના બનાવો બની રહ્યાં છે. સામાન્ય ઝઘડામાં શહેરમાં હિંચકારી હત્યાઓ થઈ રહી છે. આવો જ એક બનાવ સોમવારની સાંજે શહેરના ઉધના વિસ્તારમાં બન્યો છે.
રાજ્યના ગૃહમંત્રી હર્ષ સંઘવી સુરત શહેરના છે. તેઓ સુરતમાં જ રહે છે. સંઘવી અનેકોવાર ગુનેગારોને છોડવામાં આવશે નહીં તેવા દાવા કરતા હોય છે પરંતુ દુઃખની વાત છે કે તેમના શહેર સુરતમાં જ ગુનાખોરી ચિંતાજનક હદે વધી છે. અહીં દર બીજા દિવસે હત્યાના બનાવ બની રહ્યાં છે. આવો જ એક બનાવ સોમવારની સાંજે બન્યો છે.
શહેરના ઉધના વિસ્તારમાં વાહન પાર્ક કરવા જેવી સામાન્ય બાબતે એક લુખ્ખાએ વેપારીને તિક્ષ્ણ હથિયારના ધડાધડ ઘા ઝીંકી હત્યા નીપજાવતા ચકચાર મચી છે. હત્યાનો આ હચમચાવતો બનાવ નજીકમાં લાગેલા સીસીટીવીમાં કેદ થયો હતો. જેમાં આરોપી સરાજાહેર પાર્કિંગને લઈને માથાકૂટ થયા બાદ ઝઘડો કરીને હત્યા કરતો જોવા મળી રહ્યો છે.
માર્કેટના પાર્કિંગમાં મોટી સંખ્યામાં લોકો હોવા છતાં કોઈ બચાવવા આવ્યું નહોતું. આખરે લોકોએ હિંમત કરી આરોપીને લોહી ભીના હથિયાર સાથે ઝડપી પાડી પોલીસને હવાલે કર્યો હતો. પોલીસે આરોપીને ઝડપી વધુ તપાસ હાથ ધરી છે. આરોપી સામે ભૂતકાળમાં એકથી વધુ ગુનાઓ નોંધાયેલા હોવાનું પ્રાથમિક તપાસમાં સામે આવ્યું છે. માર્કેટના પાર્કિંગમાં બાઈક મૂકવા બાબતેના સામાન્ય ઝઘડામાં જીવલેણ હુમલો કર્યો હતો.
10 સેકન્ડમાં ચપ્પુના 10 ઘા માર્યા
આ મર્ડરના સીસીટીવી ફૂટેજ જોતા હત્યારાની ક્રુરતા નજરે પડે છે. બાઈક પાર્ક કરવા મુદ્દે થયેલી સામાન્ય બોલાચોલીમાં હત્યારો નીરજ ગુસ્સે ભરાયો હતો અને તેણે 10 સેકન્ડમાં વેપારીને ચપ્પુના 10 ઘા મારી દઈ તેને ક્રુરતાપૂર્વક મોતને ઘાટ ઉતાર્યો હતો. આરોપી નીરજ ગુનાહિત ઈતિહાસ ધરાવે છે. ચોરી, મારામારી, લૂંટ સહિત 8 ગુના તેની વિરુદ્ધ નોંધાઈ ચૂક્યા છે.
ઘટના શું બની હતી?
મૂળ રાજસ્થાનના વતની અને સુરતમાં ડિંડોલી ખાતે મધુવન સર્કલ પાસે મિલેનિયમ પાર્કમાં સુભાષ ખટિક રહે છે. તેઓ સુરતના સ્ટેશન વિસ્તારમાં ઈલેક્ટ્રોનિક્સની દુકાન ધરાવે છે. તેમના ભાઈ રાકેશની દુકાન ઉધનાના મહાવીર કોમ્પલેક્સમાં આવેલી છે. સોમવારે સાંજે સુભાષભાઈ ભાઈ રાકેશની દુકાને ગયા હતા ત્યારે રસ્તામાં વચ્ચે બાઈક હતી.
સુભાષે બાઈક હટાવવા માટે નીરજ ગંગાસાગરને કહ્યું હતું, પરંતુ નીરજે બાઈક હટાવવાની ના પાડી દેતા બંને વચ્ચે બોલાચાલી થઈ હતી. અન્ય ઠેકાણે બાઈક પાર્ક કર્યા બાદ સુભાષ પાછો નીરજ પાસે આવ્યો હતો. બંને વચ્ચે ઝઘડો થયો હતો. દરમિયાન ઉશ્કેરાયેલા નીરજે પોતાની પાસે રહેલું ચપ્પુ કાઢી સુભાષની છાતીમાં મારી દીધું હતું. ઉપરાછાપરી ઘા મારી સુભાષને મોતને ઘાટ ઉતાર્યો હતો. સારવાર મળે એ પહેલાં જ વેપારી સુભાષનું મોત નિપજ્યું હતું.
