મુંબઈઃ મહારાષ્ટ્રમાં નવી સરકારની રચનાને લઈને મહાયુતિમાં ચાલી રહેલી ખેંચતાણ વચ્ચે એકનાથ શિંદેની આગેવાની હેઠળની શિવસેનાની પહેલી ડિમાન્ડ પ્રકાશમાં આવી છે. પાર્ટીએ ગૃહ મંત્રાલયની માંગણી કરી છે. શિંદે સેનાના નેતા સંજય શિરસાટનું કહેવું છે કે મહારાષ્ટ્રની નવી સરકારમાં શિવસેનાને ગૃહ વિભાગ મળવું જોઈએ.
તેમણે કહ્યું કે ગૃહ વિભાગ (સામાન્ય રીતે) નાયબ મુખ્યમંત્રી પાસે રહે છે. સંજય શિરસાટે કહ્યું, મુખ્યમંત્રી ગૃહ વિભાગનું નેતૃત્વ કરે તે યોગ્ય નથી. શિંદેને મહાગઠબંધન સરકારનો ચહેરો બનાવીને ભાજપને ચોક્કસ ફાયદો થયો છે. ભાજપ કે એનસીપી મરાઠા આરક્ષણ આંદોલનકારીઓને શાંત કરવામાં સામેલ ન હતા.
શિંદેએ જ જવાબદારી પોતાના ખભા પર લીધી હતી. તેમણે મરાઠા આરક્ષણ પણ આપ્યું. તેથી તેમના માટે સમર્થન અનેકગણું વધ્યું. તે એકનાથ શિંદે હતા જેમણે મરાઠવાડામાં સૌથી વધુ રેલીઓ યોજી હતી.
શિંદે ગામમાં જતા નારાજગીની અટકળો ઉઠી
એકનાથ શિંદેએ મુંબઈમાં મહાયુતિની બેઠક રદ કરી અને દિલ્હીથી સીધા તેમના વતન સતારામાં ગયા પછી એવી અટકળો વહેતી થઈ હતી કે તેઓ ગઠબંધનમાં મુખ્ય પ્રધાન પદને લઈને મડાગાંઠથી નારાજ હતા. જો કે, શિંદેની આગેવાની હેઠળની શિવસેનાએ આ દાવાઓને ફગાવી દીધા હતા અને સ્પષ્ટતા કરી હતી કે પક્ષના વડા અસ્વસ્થતા અનુભવી રહ્યા હતા અને તેથી તેમના ગામ ગયા હતા.
શિવસેનાએ હોમ મિનિસ્ટ્રીની માંગ કરી
શિવસેનાએ એમ પણ કહ્યું કે સરકારની રચના અંગે અંતિમ નિર્ણય લેવા માટે આજે બેઠક યોજાશે. કેબિનેટ અને મુખ્યમંત્રી પદ પર કોઈ અંતિમ નિર્ણય ન થતાં શિવસેનાને ગૃહ વિભાગ જોઈએ છે. રાજ્યના ગૃહ પ્રધાન અને સામાન્ય વહીવટ વિભાગના પદને લઈને ભાજપ-શિવસેના વચ્ચે ખેંચતાણ ચાલી રહી છે.
સૂત્રોનું માનીએ તો એકનાથ શિંદે એ શરતે ભાજપને મુખ્યમંત્રી પદ આપવા માંગે છે કે તેમની પાર્ટીને નાયબ મુખ્યમંત્રી પદની સાથે ગૃહ મંત્રાલય પણ મળે. અગાઉની સરકારમાં પણ દેવેન્દ્ર ફડણવીસ નાયબ મુખ્યમંત્રી અને ગૃહમંત્રી પણ હતા. અગાઉ શિંદેના સહયોગી અને શિવસેનાના નેતા સંજય શિરસાટે સંકેત આપ્યો હતો કે કાર્યકારી મુખ્યમંત્રી કદાચ ડેપ્યુટી સીએમ પદ સ્વીકારશે નહીં.
