વર્લ્ડ ટેસ્ટ ચેમ્પિયનશિપના આગમન પછી, ટેસ્ટ ક્રિકેટનો રોમાંચ બમણો થઈ ગયો છે. હવે આપણને જીત માટે ટીમો વચ્ચે રોમાંચક યુદ્ધ જોવા મળશે. જોકે, તેને વધુ રસપ્રદ બનાવવા માટે, ICC રમવાની પરિસ્થિતિઓમાં ફેરફાર કરવા જઈ રહ્યું છે.
એક અહેવાલ મુજબ, આંતરરાષ્ટ્રીય ક્રિકેટ પરિષદ (ICC) 2027-29 વર્લ્ડ ટેસ્ટ ચેમ્પિયનશિપ ચક્રમાં નાના દેશો માટે ચાર દિવસીય ટેસ્ટ મેચોને મંજૂરી આપવા માટે તૈયાર છે પરંતુ ભારત, ઓસ્ટ્રેલિયા અને ઇંગ્લેન્ડ જેવી મોટી ટીમો અપવાદ હશે. આ ત્રણેય દેશો એકબીજા સામે પરંપરાગત પાંચ દિવસીય મેચ રમશે. મેચોની સંખ્યા એક દિવસ ઘટાડવાનું પગલું એક મહત્વપૂર્ણ અને મોટા પરિવર્તન તરફ ઈશારો કરી રહ્યું છે. ICC માને છે કે આનાથી નાના દેશોને વધુને વધુ ટેસ્ટ અને લાંબી શ્રેણી રમવામાં મદદ મળશે.
‘ધ ગાર્ડિયન’ અખબારના એક અહેવાલમાં કહેવામાં આવ્યું છે કે, ગયા અઠવાડિયે લોર્ડ્સમાં WTC ફાઇનલમાં ચર્ચા દરમિયાન ICCના પ્રમુખ જય શાહે 2027-29 WTC ચક્ર માટે ચાર દિવસીય ટેસ્ટ માટે પોતાનો ટેકો જાહેર કર્યો છે. ફાઇનલ દરમિયાન આ અંગે ચર્ચા કરવામાં આવી હતી જેથી નિયમને સમયસર મંજૂરી મળી શકે અને તેના માટે નિયમો બનાવી શકાય.
અહેવાલમાં કહેવામાં આવ્યું છે કે, ઇંગ્લેન્ડ, ઓસ્ટ્રેલિયા અને ભારતને હજુ પણ એશિઝ, બોર્ડર-ગાવસ્કર ટ્રોફી અને એન્ડરસન-તેંડુલકર ટ્રોફી માટે પાંચ દિવસીય ટેસ્ટ શ્રેણી રમવાની મંજૂરી આપવામાં આવશે. એન્ડરસન તેંડુલકર ટ્રોફી શુક્રવારે હેડિંગ્લી ખાતે ઇંગ્લેન્ડ અને ભારત વચ્ચેની પ્રથમ ટેસ્ટ મેચ સાથે શરૂ થશે. ભારત અને ઇંગ્લેન્ડ વચ્ચે પાંચ મેચની ટેસ્ટ શ્રેણી 20 જૂનથી શરૂ થવા જઈ રહી છે.
જોકે, 2025-27 વર્લ્ડ ટેસ્ટ ચેમ્પિયનશિપ પાંચ દિવસીય મેચોના હાલના ફોર્મેટ હેઠળ ચાલુ રહેશે. તેની શરૂઆત મંગળવારે શ્રીલંકા અને બાંગ્લાદેશ વચ્ચે બે ટેસ્ટ મેચની શ્રેણી સાથે થશે. 2025-27 રાઉન્ડમાં ભાગ લઈ રહેલા નવ દેશો વચ્ચે રમાનારી 27 ટેસ્ટ શ્રેણીમાંથી 17માં ફક્ત બે મેચની શ્રેણી હશે જ્યારે ત્રણ મેચની છ શ્રેણી હશે. ઈંગ્લેન્ડ, ઓસ્ટ્રેલિયા અને ભારત ત્રણેય એકબીજા સામે પાંચ-પાંચ ટેસ્ટ મેચની શ્રેણી રમશે.
2017માં પહેલી વાર ચાર દિવસીય ટેસ્ટને મંજૂરી આપવામાં આવી હતી
આઈસીસીએ 2017માં દ્વિપક્ષીય મેચો માટે ચાર દિવસીય ટેસ્ટને પહેલી વાર મંજૂરી આપી હતી. 2019 અને 2023માં આયર્લેન્ડ સામે ચાર દિવસીય ટેસ્ટ બાદ ઇંગ્લેન્ડે ગયા મહિને ટ્રેન્ટ બ્રિજ ખાતે ઝિમ્બાબ્વે સાથે ચાર દિવસીય મેચ રમી હતી. રિપોર્ટ અનુસાર, ‘ઘણા નાના દેશો સમય અને ખર્ચને કારણે ટેસ્ટ મેચોનું આયોજન કરવાથી દૂર રહે છે, પરંતુ ચાર દિવસીય ક્રિકેટ તરફ આગળ વધવાથી ત્રણ ટેસ્ટ મેચોની આખી શ્રેણી ત્રણ અઠવાડિયાથી ઓછા સમયમાં રમી શકાશે.
દિવસમાં 90 ઓવરને બદલે 98 ઓવર ફેંકવામાં આવશે
રિપોર્ટમાં કહેવામાં આવ્યું છે કે, ચાર દિવસીય ટેસ્ટ મેચોમાં સમયનો બગાડ ઓછો કરવા માટે, દિવસમાં રમવાનો સમય વધારીને ઓછામાં ઓછો 98 ઓવર કરવામાં આવશે. વર્તમાન પાંચ દિવસીય ટેસ્ટમાં, દિવસમાં મહત્તમ 90 ઓવર ફેંકવામાં આવે છે. રિપોર્ટમાં કહેવામાં આવ્યું છે કે, ગયા અઠવાડિયે લોર્ડ્સમાં ઓસ્ટ્રેલિયા સામેની રોમાંચક ફાઇનલમાં વિશ્વ ચેમ્પિયન બનવા છતાં, દક્ષિણ આફ્રિકાના એકવિધ સમયપત્રકે આ મુદ્દાને વધુ પ્રકાશિત કર્યો અને આ પછી ફેરફારની જરૂરિયાત અનુભવાઈ.’
