ગાંધીનગર : રાજ્ય સરકારની ‘ગંગા સ્વરૂપા આર્થિક સહાય યોજના’ હેઠળ વિધવા મહિલાઓને મળતી સહાય હવે ઈન્ડિયન પોસ્ટ પેમેન્ટ બેંક (IPPB)ના ખાતામાં સીધી જમા કરવામાં આવશે. આધાર આધારિત DBT પદ્ધતિથી રકમ સીધી લાભાર્થીના ખાતામાં જમા થશે અને પોસ્ટમેન દ્વારા ઘરબેઠાં રોકડ ઉપાડવાની સુવિધા પણ મળશે.
પોસ્ટ માસ્ટર જનરલ કૃષ્ણ કુમાર યાદવે જણાવ્યું હતુ કે ઉત્તર ગુજરાતમાં આશરે 1.47 લાખથી વધુ લાભાર્થીઓ હાલમાં પોસ્ટ ઓફિસ ખાતા મારફતે સહાય મેળવી રહ્યા છે. અમદાવાદ, ગાંધીનગર, મહેસાણા, પાટણ, સાબરકાંઠા, અરવલ્લી અને બનાસકાંઠા જિલ્લાઓમાં તા. 14 થી 20 ફેબ્રુઆરી, 2026 દરમિયાન વિશેષ અભિયાન યોજાઈ નવા IPPB ખાતાઓ ખોલવામાં આવશે.
IPPB ખાતું શૂન્ય બેલેન્સથી ખોલી શકાશે. પોસ્ટમેન અથવા ગ્રામિણ ડાક સેવક ઘરે આવી ખાતું ખોલી આપશે તેમજ નાણાંની ચુકવણી પણ કરશે. લાભાર્થીઓને બેંક કે પોસ્ટ ઓફિસ જવાની જરૂર નહીં રહે. જેમના પાસે પહેલેથી IPPB ખાતું છે, તેઓએ માત્ર આધાર સીડિંગ કરાવવાનું રહેશે.
ખાતું ખોલાવવા આધાર કાર્ડ, આધાર સાથે લિંક મોબાઇલ નંબર અને પોસ્ટ ઓફિસ બચત ખાતાની પાસબુક જરૂરી રહેશે. ગાંધીનગર જિલ્લામાં અંદાજે 18,155 લાભાર્થીઓ હાલ આ સેવાનો લાભ લઈ રહ્યા છે.
