મેલબોર્ન ટેસ્ટમાં કારકિર્દીની પ્રથમ સદી ફટકારનાર નીતિશ રેડ્ડીના પિતા મુત્યાલા રેડ્ડી પૂર્વ ક્રિકેટર સુનીલ ગાવસ્કરને મળ્યા હતા. આ દરમિયાન મુત્યાલાએ ગાવસ્કરના ચરણોમાં માથું મૂકીને પ્રણામ કર્યા હતા. ગાવસ્કરે મુત્યાલાને ઊંચકીને ગળે લગાવ્યા હતા. આ ભાવુક ક્ષણે ગાવસ્કર પણ રડી પડ્યા હતા. તેમણે કહ્યું કે તમારા બલિદાનને કારણે ભારતને નીતિશ રેડ્ડી નામનો હીરો મળ્યો છે. અમે જાણીએ છીએ કે તમે કેટલું બલિદાન આપ્યું છે. તમે ખૂબ સંઘર્ષ કર્યો છે. તમારા કારણે, હું રડી રહ્યો છું. તમારા કારણે ભારતીય ક્રિકેટને હીરો મળ્યો છે.
સુનિલ ગાવસ્કરે સ્ટેન્ડિંગ ઓવેશન આપ્યું
નીતિશ રેડ્ડીએ બોર્ડર-ગાવસ્કર ટ્રોફી (BGT)ની પ્રથમ મેચમાં ટેસ્ટ ડેબ્યૂ કર્યું હતું. શનિવારે મેલબોર્નમાં ચોથી મેચના ત્રીજા દિવસે તેણે કારકિર્દીની પ્રથમ સદી ફટકારી હતી. નીતિશની સદી બાદ સુનીલ ગાવસ્કરે તેને સ્ટેન્ડિંગ ઓવેશન આપ્યું હતું.
મુતલિયા રેડ્ડીએ 2016માં તેમના પુત્રની ક્રિકેટિંગ કુશળતાને નિખારવા માટે હિન્દુસ્તાન ઝિંકની નોકરી છોડી દીધી હતી. નીતિશે બીસીસીઆઈ ટીવીને આપેલા ઈન્ટરવ્યુમાં પિતાના બલિદાનની પણ ચર્ચા કરી હતી. નીતિશે કહ્યું હતું કે સાચું કહું તો હું બાળપણમાં ક્રિકેટને લઈને બહુ ગંભીર નહોતો. મારા પિતાએ મારા માટે તેમની નોકરી છોડી દીધી હતી. મારી વાર્તા પાછળ મારા પિતા અને પરિવારનું ઘણું બલિદાન છે. એક દિવસ પૈસાની અછતનો સામનો કરવો પડ્યો ત્યારે મને સમજાયું કે આ રીતે મનોરંજન માટે ક્રિકેટ રમી શકાય નહીં. અહીંથી હું ક્રિકેટ પ્રત્યે સંપૂર્ણપણે ગંભીર બની ગયો હતો. મેં ખૂબ મહેનત કરી અને પરિણામ મેળવ્યું. હવે મને મારી જાત પર ગર્વ છે કે મારા પિતા હવે ખુશ છે.
નીતીશની સદી પર પિતાએ કહ્યું હતું- ખરેખર તેના પર ગર્વ છે. તેણે (નીતીશ) મારા પરિવારને આ મુકામ પર પહોંચાડ્યો. તેણે અમારા પરિવારને ખૂબ જ ગૌરવ અપાવ્યું, તે માટે હું તેનો આભાર માનું છું. હું જાણું છું કે તે મારો પુત્ર છે પરંતુ હું તેનો આભાર માનવાનું બંધ કરી શકતો નથી. મારા પુત્રએ તે જ જગ્યાએ તેની પ્રથમ સદી ફટકારી હતી જ્યાં સુનીલ ગાવસ્કર, વીવીએસ લક્ષ્મણ અને રવિ શાસ્ત્રી જેવા દિગ્ગજ ક્રિકેટરો રમ્યા હતા. પિતા તરીકે મારી આંખો આંસુઓથી ભરાઈ ગઈ. હું ભગવાનને પ્રાર્થના કરું છું કે તે ભવિષ્યમાં પણ આવી જ સદી ફટકારે.
નીતિશ, સુંદરે ફોલો ઓન ટાળ્યુ હતુ
મેલબોર્નમાં ત્રીજા દિવસે ભારતે પ્રથમ દાવમાં 7 વિકેટ ગુમાવ્યા બાદ નીતિશ બેટિંગ કરવા આવ્યો હતો. તે સમયે ભારતનો સ્કોર 191 રન હતો. ટીમ ઈન્ડિયા ફોલોઓનની અણી પર ઉભી હતી. નીતિશે ન માત્ર સદી ફટકારી પરંતુ ઓસ્ટ્રેલિયાની લીડને 100 રનની નજીક પહોંચાડી દીધી. તેણે વોશિંગ્ટન સુંદર સાથે 127 રનની ભાગીદારી કરી હતી.
