કેન્દ્રીય માર્ગ પરિવહન મંત્રી નીતિન ગડકરીએ ટોલ કલેક્શનને લઈને એક મોટો નિર્ણય લીધો છે. તેમણે હાલની ટોલ સિસ્ટમ નાબૂદ કરી છે. આ સાથે સેટેલાઇટ ટોલ કલેક્શન સિસ્ટમ શરૂ કરવાની જાહેરાત કરવામાં આવી છે. તેમણે આજે શુક્રવારે (26 જુલાઈ) કહ્યું હતું કે સરકાર ટોલ નાબૂદ કરી રહી છે અને ટૂંક સમયમાં સેટેલાઇટ આધારિત ટોલ કલેક્શન સિસ્ટમ શરૂ કરવામાં આવશે.
રાજ્યસભામાં લેખિત જવાબ આપતાં તેમણે એમ કહ્યું હતું કે રોડ ટ્રાન્સપોર્ટ અને હાઈવે મંત્રાલય ગ્લોબલ નેવિગેશન સેટેલાઇટ સિસ્ટમ (GNSS) લાગુ કરવા જઈ રહ્યું છે. હાલમાં આ માત્ર પસંદગીના ટોલ પ્લાઝા પર જ થશે. આ પહેલા, ન્યૂઝ એજન્સી ANI સાથે વાત કરતી વખતે નીતિન ગડકરીએ કહ્યું હતું કે હવે અમે ટોલ નાબૂદ કરી રહ્યા છીએ અને સેટેલાઇટ આધારિત ટોલ કલેક્શન સિસ્ટમ શરૂ થશે. તમારા બેંક ખાતામાંથી પૈસા કાપવામાં આવશે અને ટેક્સ તમે જેટલું અંતર કાપશો તે પ્રમાણે વસૂલવામાં આવશે. આનાથી સમય અને પૈસાની બચત થશે. પહેલા મુંબઈથી પૂણે જવા માટે 9 કલાક લાગતા હતા હવે તે ઘટીને 2 કલાક થઈ ગયા છે.
નીતિન ગડકરીએ ગયા વર્ષે જ નવી સિસ્ટમ વિશે માહિતી આપી
અગાઉ ડિસેમ્બરમાં નીતિન ગડકરીએ જાહેરાત કરી હતી કે નેશનલ હાઈવે ઓથોરિટી ઓફ ઈન્ડિયા (NHAI) એ માર્ચ 2024 સુધીમાં આ નવી સિસ્ટમ લાગુ કરવાનું લક્ષ્ય રાખ્યું છે. વિશ્વ બેંકને પ્રક્રિયાઓને સુવ્યવસ્થિત કરવા અને ટોલ પ્લાઝા પર રાહ જોવાનો સમય ઘટાડવાના પ્રયાસો વિશે જાણ કરવામાં આવી છે. FASTag ની રજૂઆત સાથે ટોલ પ્લાઝા પર સરેરાશ રાહ જોવાનો સમય નોંધપાત્ર રીતે ઘટ્યો છે.
