કાર બોમ્બ બ્લાસ્ટના 20 કલાક પછી ગૃહ મંત્રાલયે દિલ્હી કાર બોમ્બ બ્લાસ્ટની તપાસ NIAને સોંપી દીધી છે. 10 નવેમ્બરના રોજ સાંજે 6:52 વાગ્યે લાલ કિલ્લા મેટ્રો સ્ટેશનના ગેટ નંબર 1 પાસે કાર બોમ્બ બ્લાસ્ટ થયો હતો. બે મહિલાઓ સહિત મૃત્યુઆંક 12 પર પહોંચી ગયો છે. તપાસ માટે અન્ય એક ડૉક્ટરની અટકાયત કરવામાં આવી છે જેની ઓળખ ડો. સજ્જાદ અહેમદ મલ્લા તરીકે કરવામાં આવી છે જે પુલવામાના બેન્ડઝૂના રહેવાસી નઝીર અહેમદ મલ્લા (MBBS, MD) ના પુત્ર છે.
લાલ કિલ્લા બ્લાસ્ટની તપાસ NIAને સોંપવામાં આવી છે. અગાઉ દિલ્હી પોલીસ અને સ્પેશિયલ સેલ દ્વારા આ કેસની તપાસ કરવામાં આવી રહી હતી. મંગળવારે વિસ્ફોટમાં વપરાયેલી સફેદ i20 કારના CCTV ફૂટેજ સામે આવ્યા હતા. કાળો માસ્ક પહેરેલો એક વ્યક્તિ મેટ્રો સ્ટેશન પાર્કિંગમાંથી બહાર નીકળતી કારમાં બેઠો જોવા મળ્યો હતો. પોલીસના જણાવ્યા અનુસાર કારમાં બેઠેલા વ્યક્તિની ઓળખ પુલવામાના રહેવાસી ડો. મોહમ્મદ ઉમર નબી તરીકે થઈ હતી. પોલીસ સૂત્રોના જણાવ્યા અનુસાર ઉમરે વિસ્ફોટકોથી પોતાને ઉડાવી દીધો હતો.
તેઓએ જણાવ્યું હતું કે વ્યવસાયે ડોક્ટર ઉમર મોહમ્મદ કથિત રીતે જૈશ-એ-મોહમ્મદના આતંકવાદી મોડ્યુલ સાથે સંકળાયેલો હતો. સૂત્રોના જણાવ્યા અનુસાર જમ્મુ અને કાશ્મીરના પુલવામાના રહેવાસી તારિક નામના વ્યક્તિ જેની ધરપકડ કરવામાં આવી છે તેણે ઉમર મોહમ્મદને હ્યુન્ડાઇ i20 કાર આપી હતી. i20 કાર – HR 26 CE 7674 – 29 ઓક્ટોબરના રોજ ખરીદવામાં આવી હતી. તે સમયે કાર સાથે ત્રણ લોકો હાજર હતા. આ વીડિયો 29 ઓક્ટોબરના રોજ સાંજે 4:20 વાગ્યાનો છે. એવી શંકા છે કે વીડિયોમાં દેખાતો દાઢીવાળો વ્યક્તિ તારિક છે જેના નામે ડો. ઉમરે કાર ખરીદી હતી.
કાશ્મીર પોલીસે ડીએનએ પરીક્ષણ માટે પુલવામામાં ઉમરની માતા અને બે ભાઈઓની અટકાયત કરી છે. તેના મિત્ર ડૉ. સજ્જાદ અને તેના પિતાને પણ પુલવામામાં અટકાયતમાં લેવામાં આવ્યા છે. સમાચાર એજન્સી પીટીઆઈએ અહેવાલ આપ્યો છે કે પ્રાથમિક પોલીસ તપાસમાં જાણવા મળ્યું છે કે વિસ્ફોટમાં એમોનિયમ નાઈટ્રેટ, બળતણ અને એક ડિટોનેટરનો ઉપયોગ કરવામાં આવ્યો હતો.
ઉમર અઢી કલાક સુધી કારમાં રહ્યો, એક ક્ષણ માટે પણ બહાર નીકળ્યો નહીં
મંગળવારે સીસીટીવી ફૂટેજ સામે આવ્યું હતું જેમાં મેટ્રો સ્ટેશન પાર્કિંગમાંથી બહાર નીકળતી કારમાં કાળો માસ્ક પહેરેલો એક વ્યક્તિ બેઠો હતો. પોલીસના જણાવ્યા અનુસાર આ વ્યક્તિનું નામ ડો. મોહમ્મદ ઉમર નબી હતું. વિસ્ફોટ પહેલા તે અઢી કલાક કારમાં બેસી રહ્યો હતો અને એક ક્ષણ માટે પણ કારમાંથી બહાર આવ્યો ન હતો. દિલ્હી વિસ્ફોટના કલાકો પહેલા સોમવારે એક “વ્હાઇટ-કોલર” આતંકવાદી મોડ્યુલનો પર્દાફાશ કરવામાં આવ્યો હતો જેના કારણે ત્રણ ડોક્ટરો સહિત આઠ લોકોની ધરપકડ કરવામાં આવી હતી અને 2,900 કિલોગ્રામ વિસ્ફોટકો જપ્ત કરવામાં આવ્યા હતા. તપાસમાં જાણવા મળ્યું હતું કે ડોક્ટર ઉમર ફરીદાબાદમાં થયેલી કાર્યવાહીથી ગભરાઈ ગયો હતો. આ ગભરાટને કારણે તેણે દિલ્હીમાં વિસ્ફોટ કર્યો હતો. તપાસ એજન્સીઓ અનુસાર કારમાં IED લગાવવામાં આવ્યો હતો જે એક આત્મઘાતી હુમલો હતો. તપાસમાં એ પણ બહાર આવ્યું છે કે વિસ્ફોટ ફરીદાબાદ આતંકવાદી મોડ્યુલ સાથે જોડાયેલો હતો.
પોલીસે અલ ફલાહ યુનિવર્સિટીમાંથી ત્રણ વ્યક્તિઓની અટકાયત કરી
ફરીદાબાદ – પોલીસ અલ ફલાહ યુનિવર્સિટીના HR ની પૂછપરછ કરી રહી છે. HR અત્યાર સુધીમાં કાશ્મીરથી અસંખ્ય લોકોને અલ ફલાહ યુનિવર્સિટીમાં લાવ્યું છે. પોલીસે અલ ફલાહ યુનિવર્સિટીમાંથી ત્રણ વ્યક્તિઓની અટકાયત કરી છે. ત્રણેય વ્યક્તિઓની ભૂમિકા શંકાસ્પદ છે.
