ઇઝરાયલી વડા પ્રધાન બેન્જામિન નેતન્યાહૂના કાર્યાલયે ગુરુવારે જણાવ્યું હતું કે જ્યાં સુધી હમાસ “છેલ્લી ઘડીના મડાગાંઠ”માંથી પીછેહઠ નહીં કરે ત્યાં સુધી ગાઝા યુદ્ધવિરામ કરારને મંજૂરી આપવા માટે તેમનું મંત્રીમંડળ બેઠક કરશે નહીં. વડા પ્રધાન બેન્જામિન નેતન્યાહૂના કાર્યાલયે હમાસ પર “છેલ્લી ઘડીની છૂટછાટો મેળવવા” માટે કરારના ભાગોથી પીછેહઠ કરવાનો આરોપ મૂક્યો હતો. તમને જણાવી દઈએ કે ઇઝરાયલી કેબિનેટ ગુરુવારે આ કરારને બહાલી આપવા જઈ રહ્યું હતું.
અગાઉ નેતન્યાહૂએ બુધવારે મોડી રાત્રે કહ્યું હતું કે હમાસ સાથે યુદ્ધવિરામ કરાર હજુ પૂર્ણ થયો નથી અને તેને અંતિમ સ્વરૂપ આપવા માટે કામ ચાલી રહ્યું છે. તમને જણાવી દઈએ કે નેતન્યાહૂના આ નિવેદનના થોડા કલાકો પહેલા જ અમેરિકા અને કતારે યુદ્ધવિરામ કરારની જાહેરાત કરી હતી. આનાથી ગાઝામાં 15 મહિનાથી ચાલી રહેલા યુદ્ધનો અંત આવશે અને મોટી સંખ્યામાં બંધકોને મુક્ત કરવામાં આવશે.
પેલેસ્ટિનિયનો ઉજવણી કરવા માટે રસ્તાઓ પર ઉતર્યા
આ કરારની જાહેરાત પછી મોટી સંખ્યામાં પેલેસ્ટિનિયનો રસ્તાઓ પર ઉતરી આવ્યા હતા અને ઉજવણી કરી હતી. મધ્ય ગાઝાના દીર અલ-બલાહમાં મહમૂદ વાદીએ કહ્યું કે અત્યારે અમે જે અનુભવી રહ્યા છીએ તે કોઈ અનુભવી શકતું નથી, તેને શબ્દો દ્વારા વ્યક્ત કરી શકાય તેમ નથી.
ભારતે કરારની જાહેરાતનું સ્વાગત કર્યું
ભારતીય વિદેશ મંત્રાલયે આ અંગે કહ્યું કે અમે ગાઝામાં બંધકોની મુક્તિ અને યુદ્ધવિરામ માટેના કરારની જાહેરાતનું સ્વાગત કરીએ છીએ. અમને આશા છે કે આનાથી ગાઝાના લોકોને માનવતાવાદી સહાયનો સુરક્ષિત અને સતત પુરવઠો મળી રહેશે. અમે સતત બધા બંધકોને મુક્ત કરવા, યુદ્ધવિરામ કરવા અને સંવાદ અને રાજદ્વારીના માર્ગ પર પાછા ફરવા માટે હાકલ કરી છે.
ઓક્ટોબર 2023માં હમાસે ઇઝરાયલ પર હુમલો કર્યો હતો
હમાસે 7 ઓક્ટોબર, 2023 ના રોજ ઇઝરાયલ પર હુમલો કર્યો હતો જેમાં 1,200 થી વધુ લોકો માર્યા ગયા હતા અને 250 થી વધુ લોકોને બંધક બનાવ્યા હતા. ત્યારબાદ ઇઝરાયલે બદલો લેવા માટે હુમલા શરૂ કર્યા હતા જેમાં 46,000 થી વધુ પેલેસ્ટિનિયનો માર્યા ગયા હતા. વધુમાં ગાઝાની અંદાજિત 90 ટકા વસ્તી વિસ્થાપિત થઈ ગઈ, જેના કારણે વિનાશક માનવતાવાદી કટોકટી સર્જાઈ.
