અમેરિકન રાષ્ટ્રપતિ ડોનાલ્ડ ટ્રમ્પ દ્વારા લાદવામાં આવેલા ટેરિફ પછી ભારતે અમેરિકા પાસેથી શસ્ત્રો અને વિમાનોની ખરીદી બંધ કરી હોવાના અહેવાલોને સંરક્ષણ મંત્રાલયે નકારી કાઢ્યા છે. સંરક્ષણ મંત્રાલયે કહ્યું કે આ અહેવાલો ખોટા અને બનાવટી છે.
કેટલાક મીડિયા અહેવાલોમાં દાવો કરવામાં આવ્યો છે કે યુએસ રાષ્ટ્રપતિ ડોનાલ્ડ ટ્રમ્પ દ્વારા લાદવામાં આવેલા 50 ટકા ટેરિફ પછી ભારતે અમેરિકા પાસેથી નવા શસ્ત્રો અને વિમાનોની ખરીદી બંધ કરી દીધી છે. સંરક્ષણ મંત્રાલયે આ સમાચારને નકારી કાઢ્યા છે. સંરક્ષણ મંત્રાલયના અધિકારીએ કહ્યું છે કે ભારત દ્વારા અમેરિકા સાથે સંરક્ષણ ખરીદીની વાટાઘાટો બંધ કરવાના અહેવાલો ખોટા અને બનાવટી છે. સ્પષ્ટતા કરવામાં આવે છે કે ખરીદીના વિવિધ કેસોમાં હાલની પ્રક્રિયાઓ અનુસાર પ્રગતિ થઈ રહી છે.
અગાઉ સમાચાર એજન્સી રોઇટર્સે 3 ભારતીય અધિકારીઓને ટાંકીને તેના અહેવાલમાં દાવો કર્યો હતો કે ભારતે અમેરિકા પાસેથી નવા શસ્ત્રો અને વિમાન ખરીદવાની યોજના બંધ કરી દીધી છે. રોઇટર્સના અહેવાલ મુજબ ભારતીય સંરક્ષણ પ્રધાન આગામી અઠવાડિયામાં સંરક્ષણ સોદા માટે અમેરિકાની મુલાકાત લેવાના હતા પરંતુ ટેરિફ વિવાદની આ મુલાકાત પર અસર પડી અને મુલાકાત મુલતવી રાખવામાં આવી.
ટ્રમ્પ વહીવટીતંત્રે તાજેતરમાં ભારત પર 25 ટકા ટેરિફ લાદ્યો છે જે 7 ઓગસ્ટથી અમલમાં આવ્યો છે. આ ઉપરાંત રશિયા પાસેથી ભારત દ્વારા તેલ ખરીદવા પર પણ વધારાની 25 ટકા ડ્યુટી લાદવામાં આવી છે જે 21 દિવસ પછી એટલે કે 27 ઓગસ્ટથી અમલમાં આવશે. આ રીતે ભારત પર કુલ ટેરિફ 50 ટકા સુધી પહોંચી ગયો છે જે કોઈપણ દેશ પર અમેરિકા દ્વારા લાદવામાં આવેલા સૌથી વધુ ટેરિફમાંનો એક છે.
