નવી દિલ્હી: T20 વર્લ્ડ કપ 2024ની પહેલી ત્રણ મેચ ભારત ન્યૂયોર્કના નાસાઉ સ્ટેડિયમમાં રમ્યું હતું. આર્યલેન્ડ, પાકિસ્તાન અને છેલ્લે અમેરિકા સામે આ મેચો ભારત રમ્યું હતું. આ પીચ બેટ્સમેનો માટે ખૂબ મુશ્કેલ હતી. ત્રણેય મેચ લો સ્કોરીંગ રમી હતી. વર્લ્ડક્લાસ બેટ્સમેન વિરાટ કોહલી ત્રણેય મેચમાં સાવ ફ્લોપ રહ્યો હતો. બેટ્સમેનો માટે કબ્રસ્તાન સમાન આ સ્ટેડિયમને હવે તોડી પાડવામાં આવશે.
ખરેખર આઇસીસી (ICC)એ ન્યુયોર્કના નાસાઉ આઇઝનહોવર પાર્કમાં T20 વર્લ્ડ કપ 2024 માટે આંતરરાષ્ટ્રીય ક્રિકેટની તૈયારી કરી હતી. આ એક અસ્થાયી સ્ટેડિયમ હતું. T20 વર્લ્ડ કપ 2024ની કુલ 8 મેચ અહીં રમાવાની હતી અને આ તમામ મેચોનું આયોજન કરવામાં આવ્યું હતું.
જોકે, આઠ પૈકી એક પણ મેચ હાઈ સ્કોરિંગ બની શકી નહતી. ચાહકો ટી20 આંતરરાષ્ટ્રીય ક્રિકેટમાં આવી મેચ જોવાનું પસંદ કરતા નથી. આ માટે ICCની ટીકા પણ કરવામાં આવી હતી. કારણ કે આ સ્ટેડિયમમાં 4 ડ્રોપ-ઇન પિચનો ઉપયોગ કરવામાં આવ્યો હતો, જે થોડા મહિના પહેલા જ એડિલેડથી તૈયાર કરી અહીં ખસેડવામાં આવી હતી.
ડ્રોપ-ઇન પિચોને સેટ થવામાં 8 થી 10 મહિનાનો સમય લાગે છે, પરંતુ ન્યૂયોર્કને T20 વર્લ્ડ કપની મેચોની યજમાની કરવાની હતી. તેઓ પાસે 8 થી 10 અઠવાડિયનો સમય પણ ન હતો. આ જ કારણ હતું કે પ્રથમ દાવમાં આ મેદાનનો સરેરાશ સ્કોર 108 રન રહ્યો હતો. આ સ્ટેડિયમ બનાવવા માટે ICCએ લગભગ 250 કરોડ રૂપિયાનો ખર્ચ કર્યો હતો.
આ સ્ટેડિયમ 106 દિવસમાં બન્યું હતું પરંતુ હવે આ સ્ટેડિયમને તોડી પાડવામાં આવશે. કારણ કે તે એક અસ્થાયી સ્ટેડિયમ હતું. આ સ્ટેડિયમને તોડી પાડવાનું કામ ભારત અને યુએસએ મેચ પછી તરત જ શરૂ થઈ ગયું છે, જે લગભગ 6 અઠવાડિયામાં પૂર્ણ થશે. મેચ બાદ જ બુલડોઝર સ્ટેડિયમને તોડી પાડવા આવ્યા હતા.
એક રીતે જોવા જઈએ તો આવતા મહિનાના અંત સુધીમાં આ સ્ટેડિયમનો કોઈ પત્તો નહીં બચે. એ જ પાર્ક ફરી જોવા મળશે, જે આ વર્ષે જાન્યુઆરીની શરૂઆતમાં હતો. જો કે, શું અહીં ડ્રોપ-ઇન પિચો હશે? તેનું ભવિષ્ય હજુ નક્કી થયું નથી. ICC અધિકારીઓએ કહ્યું છે કે જો નાસાઉ કાઉન્ટીના અધિકારીઓ ઈચ્છે છે કે આ પિચો યથાવત રહે અને તેની જાળવણી કરવામાં આવે તો તે તે જગ્યાએ રહી શકે છે. નહિતર આ પીચો ફરીથી સ્થિત કરવામાં આવશે. જો કે, આઉટફિલ્ડ અહીં રહેવા માટે છે. તે બહાર પણ નર્સરીની જેમ તૈયાર કરવામાં આવી હતી.
