નરેન્દ્ર મોદી રવિવારે ત્રીજી વખત વડાપ્રધાન તરીકે શપથ લેશે. આ શપથ ગ્રહણ સમારોહ રાષ્ટ્રપતિ ભવન ખાતે યોજાશે. રાષ્ટ્રપતિ દ્રૌપદી મુર્મુ 9 જૂને સાંજે 07:15 કલાકે રાષ્ટ્રપતિ ભવન ખાતે વડાપ્રધાન નરેન્દ્ર મોદી અને કેન્દ્રીય મંત્રી પરિષદના સભ્યોને હોદ્દા અને ગોપનીયતાના શપથ લેવડાવશે. દિલ્હી પોલીસે આની તૈયારી કરી લીધી છે. બપોરે 2 વાગ્યા પછી રાષ્ટ્રપતિ ભવન અને તેની આસપાસ કંટ્રોલ એરિયા બનાવવામાં આવશે. પોલીસ અધિકારીઓના જણાવ્યા અનુસાર આ સમયગાળા દરમિયાન અનેક સ્તરની સુરક્ષા વ્યવસ્થા કરવામાં આવશે.
સૂત્રોના જણાવ્યા અનુસાર રાષ્ટ્રપતિ ભવનની સુરક્ષા માટે અર્ધલશ્કરી દળની પાંચ કંપનીઓ તૈનાત કરવામાં આવશે. આ સિવાય એનએસજી કમાન્ડો, ડ્રોન અને સ્નાઈપર્સ પણ ઉંચી ઈમારતો પર તૈનાત રહેશે. શપથ ગ્રહણ સમારોહમાં ઘણા વિદેશી મહેમાનો પણ હાજરી આપશે. આવી સ્થિતિમાં સમગ્ર રાજધાની હાઈ એલર્ટ પર રહેશે. વિદેશી મહેમાનોની સુરક્ષાની જવાબદારી પણ ગુપ્તચર એજન્સીઓના ખભા પર રહેશે. દરેક દેશના વડાના પ્રોટોકોલ મુજબ ચુસ્ત સુરક્ષા વ્યવસ્થા કરવામાં આવી છે.
આ ઉપરાંત જે હોટલોમાં વિદેશી મહેમાનો રોકાશે તેની સુરક્ષા પણ વધારી દેવામાં આવી છે. દિલ્હી પોલીસના જણાવ્યા અનુસાર, સંસદ માર્ગ, રફી માર્ગ, રાયસીના રોડ, રાજેન્દ્ર પ્રસાદ રોડ, મધર ટેરેસા ક્રેસન્ટ, રાષ્ટ્રપતિ ભવનની આસપાસ સરદાર પટેલ માર્ગ પર કાર્યક્રમ દરમિયાન માત્ર તે જ વાહનોને પ્રવેશ આપવામાં આવશે જેમની પાસે પાસ હશે. પોલીસના જણાવ્યા અનુસાર આ કાર્યક્રમ પર 500થી વધુ સીસીટીવી દ્વારા નજર રાખવામાં આવશે.
સમગ્ર નવી દિલ્હી વિસ્તારમાં કલમ 144 લાગુ, નો ફ્લાઈંગ ઝોન જાહેર
શપથ ગ્રહણ સમારોહને ધ્યાનમાં રાખીને દિલ્હી પોલીસ દ્વારા 9 અને 10 જૂન માટે ઘણા નિયંત્રણો પણ લાદવામાં આવ્યા છે. દિલ્હીને નો ફ્લાઈંગ ઝોન જાહેર કરવામાં આવ્યું છે. આ સમયગાળા દરમિયાન, પેરાગ્લાઈડર્સ, પેરા-મોટર્સ, હેંગ ગ્લાઈડર્સ, UAVs, UAS, માઈક્રોલાઈટ એરક્રાફ્ટ, રિમોટ કંટ્રોલ્ડ એરક્રાફ્ટ જેવા પરંપરાગત એરિયલ પ્લેટફોર્મના ઉડ્ડયન પર સમગ્ર દિલ્હીમાં પ્રતિબંધ મૂકવામાં આવ્યો છે.
ત્રણ સ્તરીય સુરક્ષા અમલમાં રહેશે
શપથ ગ્રહણ સમારોહ માટે ત્રિસ્તરીય સુરક્ષા વ્યવસ્થા લાગુ કરવામાં આવશે. જેમાં આંતરિક પરિમિતિ એટલે કે રાષ્ટ્રપતિ ભવન અને કર્તવ્ય પથની આસપાસનો ઉચ્ચ સુરક્ષા વિસ્તાર કે જ્યાં સમારોહ યોજાશે. બાહ્ય પરિમિતિ એટલે કે હોટલોની આસપાસ સુરક્ષાનું બીજું સ્તર ગોઠવાશે કે જ્યાં વિદેશી વડાઓ અને મહાનુભાવો રોકાશે. જેમાં મુખ્યત્વે તાજ, મૌર્ય, લીલા અને ઓબેરોય હોટલનો સમાવેશ થાય છે. આ સાથે જ સૌથી બહારની પરિમિતિ એટલે કે મધ્ય દિલ્હીની આસપાસ સુરક્ષાનું ત્રીજું સ્તર ગોઠવવામાં આવશે જેમાં જમીનથી આકાશ સુધીની દેખરેખ અને વ્યાપક સુરક્ષા કવચનો સમાવેશ થાય છે.
બીજી તરફ ગુપ્તચર એજન્સીઓ સંભવિત સુરક્ષા જોખમો વિશે માહિતી એકત્ર કરવા અને દરેક વિદેશી નેતા માટે વ્યક્તિગત જોખમને ટાળવા માટે વિદેશી એજન્સીઓ સાથે સંપર્ક કરી રહી છે. કોઈપણ અનધિકૃત વાહનોને સુરક્ષા વિસ્તારોમાં પ્રવેશતા અટકાવવા માટે વાહનોની સઘન ચકાસણી કરવામાં આવી રહી છે. ઈન્દિરા ગાંધી ઈન્ટરનેશનલ એરપોર્ટ (DEL) અને અન્ય સંવેદનશીલ વિસ્તારોની નજીક ડ્રોન અને લેસર બીમ પ્રવૃત્તિઓને રોકવા માટે પ્રતિબંધિત આદેશો લાદવામાં આવ્યા છે. શપથ સમારોહ દરમિયાન વ્યવસ્થા જાળવવા અને સુરક્ષા સંબંધિત કોઈપણ ઘટનાનો સામનો કરવા માટે મોટી સંખ્યામાં દિલ્હી પોલીસ અને સુરક્ષાકર્મીઓ તૈનાત કરવામાં આવી રહ્યા છે. જે હોટલમાં મહેમાનો રોકાશે તે હોટલના કર્મચારીઓ વિશ્વાસપાત્ર છે અને સુરક્ષા માટે ખતરો નથી તેની ખાતરી કરવા માટે તેમના બેકગ્રાઉન્ડની તપાસ કરાઇ રહી છે. સુરક્ષા કર્મચારીઓ માટે પરિસ્થિતિ પર નજર રાખવા અને સુરક્ષા સંબંધિત કોઈપણ ખતરાનો સામનો કરવા માટે અલગ કંટ્રોલ રૂમ બનાવવામાં આવી રહ્યા છે.
આ 7 દેશોના વડા સમારોહમાં હાજરી આપશે
વડાપ્રધાન પદના શપથ સમારોહમાં બાંગ્લાદેશના પીએમ શેખ હસીના, સેશેલ્સના ઉપરાષ્ટ્રપતિ મોહમ્મદ અફીફ, માલદીવના રાષ્ટ્રપતિ મોહમ્મદ મુઈઝુ, નેપાળના પીએમ પુષ્પ કમલ દહલ, શ્રીલંકાના રાષ્ટ્રપતિ રાનિલ વિક્રમસિંઘે, મોરેશિયસના પીએમ પ્રવિંદ જુગનાથ, ભૂટાનના પીએમ શેરિંગ તોગબે હાજર રહેશે. ભારત સરકાર દ્વારા પડોશી અને હિંદ મહાસાગરમાં સ્થિત ત્રણ નજીકના દેશોના વડાઓને આમંત્રણ આપવામાં આવ્યું છે. અત્યાર સુધી મળતી માહિતી મુજબ પીએમ મોદી શપથ ગ્રહણ સમારોહ બાદ સાતેય દેશોના વડાઓ સાથે અલગ-અલગ દ્વિપક્ષીય વાતચીત કરશે.
