જયપુર: ભાજપને રાજસ્થાનમાં મોટો ફટકો પડ્યો છે. રાજસ્થાન સરકારમાં કૃષિ અને ગ્રામીણ મંત્રી કિરોડીલાલ મીણાએ મંત્રી પદ પરથી રાજીનામું આપી દીધું છે. કિરોડીલાલ મીણાએ લગભગ 10 દિવસ પહેલા મુખ્યમંત્રી ભજનલાલ શર્માને પોતાનું રાજીનામું સુપરત કર્યું હતું અને હવે તેની જાહેરમાં જાહેરાત કરી છે.
વાસ્તવમાં કોંગ્રેસના નેતાઓ સતત તેમના રાજીનામાની માંગ કરી રહ્યા છે. કારણ કે ચૂંટણી સમયે કિરોડીલાલ મીણાએ કહ્યું હતું કે જો ભાજપ પૂર્વ રાજસ્થાનની 7માંથી એક પણ બેઠક ગુમાવશે તો તેઓ રાજીનામું આપી દેશે. દૌસા બેઠક પર પણ ભાજપની હાર થઈ હતી. આ સાત બેઠકોમાંથી ભાજપે 4 બેઠકો ગુમાવી છે જેમાં દૌસા, કરૌલી-ધોલપુર, ટોંક-સવાઈ માધોપુર અને ભરતપુર બેઠકોનો સમાવેશ થાય છે.
અગાઉ જ્યારે કિરોડીલાલ મીણાને કેબિનેટની બેઠકમાં ભાગ ન લેવા અંગે પ્રશ્ન પૂછવામાં આવ્યો ત્યારે તેમણે એક ટીવી ઈન્ટરવ્યુમાં જણાવ્યું હતું કે મેં મંત્રી પદ પરથી રાજીનામું આપ્યું છે. તેથી જ હું કેબિનેટની બેઠકમાં હાજર રહ્યો ન હતો. જો કે, સીએમ ભજન લાલે મને કહ્યું હતું. કે તેઓ મારું રાજીનામું સ્વીકારશે નહીં. કિરોડીલાલ મીણાએ કહ્યું કે કોઈ નારાજગી નથી, જોકે મેં જાહેરમાં કહ્યું હતું કે જો ભાજપ 7માંથી કોઈપણ બેઠક પર હારી જશે તો હું રાજીનામું આપીશ, તેથી મેં રાજીનામું આપ્યું છે.
ભાજપથી નારાજ હતા કિરોડીમલ
કિરોડીલાલ મીણાના કારણે કોંગ્રેસનો પરંપરાગત મીણા આદિવાસી મત વિધાનસભાની ચૂંટણીમાં કોંગ્રેસમાંથી ભાજપ તરફ વળ્યા હતા પરંતુ તેમ છતાં ભાજપ દ્વારા કિરોડીલાલને અવગણવામાં આવ્યા હતા. તેથી મીણા વોટ લોકસભામાં કોંગ્રેસ તરફ પરત વળ્યા હતા. ડૉ. કિરોડીલાલ મીણાનું પૂર્વ રાજસ્થાનમાં પ્રભુત્વ છે જ્યાં દૌસા અને દેવલી-ઉનિયારા બેઠકો પર વિધાનસભાની પેટાચૂંટણી યોજાવાની છે. મીનાએ ત્રણ દિવસ પહેલા રાજીનામું આપી દીધું હતું, ત્યારબાદ કેન્દ્રીય નેતૃત્વએ તેમને દિલ્હી બોલાવ્યા હતા, પરંતુ એવું કહેવામાં આવી રહ્યું છે કે કિરોડી લાલ મીણાના મુખ્યમંત્રી ભજનલાલ શર્મા સાથે સરકારમાં મતભેદો ખૂબ વધી ગયા હતા.
