મુંબઈ: (Mumbai) અભિનેતા ગોવિંદા (Govinda) ગુરુવારે શિવસેનામાં (Shivsena) જોડાયા હતા. તેમણે મહારાષ્ટ્રના મુખ્યપ્રધાન એકનાથ શિંદેની હાજરીમાં પાર્ટીનું સભ્યપદ લીધું. આ પછી એવી અટકળો ચાલી રહી છે કે શિંદેની પાર્ટી તેમને મુંબઈ ઉત્તર પશ્ચિમ લોકસભા બેઠક પરથી ટિકિટ આપી શકે છે. જો આમ થશે તો તેઓ શિવસેના (UBT)ના ઉમેદવાર અમોલ કીર્તિકર સામે ચૂંટણી લડશે.
લોકસભાની ચૂંટણીની તારીખ જેમ જેમ નજીક આવી રહી છે તેમ તેમ રાજકારણ પણ ગરમાઈ રહ્યું છે. ફિલ્મ અભિનેતા ગોવિંદા આજે શિવસેના (શિંદે જૂથ)માં જોડાયા. તેઓ બાળાસાહેબ ઠાકરે ભવનમાં મુખ્યમંત્રી એકનાથ શિંદેની હાજરીમાં પાર્ટીમાં જોડાયા હતા. આ પહેલા બુધવારે ગોવિંદા શિંદે કેમ્પના નેતા અને શિવસેનાના પૂર્વ ધારાસભ્ય કૃષ્ણા હેગડેને મળ્યા હતા, જેનો ફોટો પણ સામે આવ્યો હતો. ગોવિંદા અગાઉ 2004માં કોંગ્રેસની ટિકિટ પર મુંબઈ ઉત્તર લોકસભા બેઠક પરથી ચૂંટણી જીત્યા હતા. ત્યારે તેમણે ભાજપના રામ નાઈકને 48,271 મતોથી હરાવ્યા.
ગુરુવારે સીએમ એકનાથ શિંદેએ ગોવિંદાને પાર્ટીની સદસ્યતા આપી હતી જેની તસવીરો પણ સામે આવી છે. પાર્ટીમાં જોડાયા બાદ ગોવિંદાએ કહ્યું કે મેં વિચાર્યું હતું કે હું ફરી રાજકારણમાં નહીં આવીશ પરંતુ હવે હું શિવસેનામાં જોડાઈ રહ્યો છું અને મારા માટે તે ભગવાનનો આશીર્વાદ છે. આ દરમિયાન અભિનેતાએ સીએમ એકનાથ શિંદેના પણ વખાણ કર્યા હતા.
આ અવસર પર ગોવિંદાએ કહ્યું કે એકનાથ શિંદે જીનો આભાર, આજે શિવસેનામાં જોડાવાનો અર્થ ભગવાનની પ્રેરણા છે. તેમણે કહ્યું કે તેઓ 2004 થી 2009 સુધી કોંગ્રેસ પાર્ટીના સાંસદ હતા. હવે ચૌદ વર્ષના વનવાસ પછી હું શિવસેનામાં જોડાયો છું. ગોવિંદાએ કહ્યું કે મુંબઈ હવે સુંદર અને વિકસિત દેખાઈ રહ્યું છે. અહીં વિકાસના કામો થઈ રહ્યા છે.
ગોવિંદાએ પોતાના સંબોધનમાં પીએમ મોદીના વખાણ કર્યા હતા. તેમણે કહ્યું કે પીએમ મોદીમાં સકારાત્મકતા છે. તેમણે દેશને વિશ્વમાં ગૌરવ અપાવ્યું. ગણેશ જયંતિ પર સીએમને મળ્યો હતો, આજે ગણેશ ચતુર્થીના દિવસે શિવસેનામાં જોડાયો છું. બીજી તરફ સીએમ શિંદેએ કહ્યું કે ગોવિંદાએ પાર્ટીમાં સામેલ થવા માટે કોઈ શરત રાખી નથી. ગોવિંદા સ્ટાર પ્રચારક હશે.
ગોવિંદાના રાજકારણમાં પાછા ફરવા પર રાજ્યસભા સાંસદ મિલિંદ દેવરાની પ્રતિક્રિયા પણ સામે આવી છે. દેવરાએ કહ્યું, ‘હું ગોવિંદાને છેલ્લા 25 વર્ષથી ઓળખું છું. અમે બંને વર્ષ 2004માં પણ સાથે ચૂંટણી લડ્યા હતા. મારા સ્વર્ગસ્થ પિતા જ તેમને કોંગ્રેસમાં લાવ્યા હતા. ગોવિંદા એક શુદ્ધ દિલના વ્યક્તિ છે જે દેશની સાંસ્કૃતિક રાજધાની મુંબઈનું પ્રતિનિધિત્વ કરવા માંગે છે.
