કેન્દ્રની મોદી સરકારે આજે (મંગળવારે) પૈસા સંબંધિત ઓનલાઈન ગેમિંગના ક્ષેત્રમાં એક મોટો નિર્ણય લીધો છે. વડા પ્રધાન નરેન્દ્ર મોદીની અધ્યક્ષતામાં મળેલી કેન્દ્રીય મંત્રીમંડળની બેઠકમાં ઓનલાઈન ગેમિંગ બિલને મંજૂરી આપવામાં આવી છે. આ બિલ હેઠળ ઓનલાઈન સટ્ટાબાજી એક સજાપાત્ર ગુનો હશે અને પૈસા સંબંધિત ગેમિંગ વ્યવહારો પર સંપૂર્ણપણે પ્રતિબંધ મૂકવામાં આવશે.
કેન્દ્ર સરકાર ઓનલાઈન સટ્ટાબાજી અને જુગાર પર નિયંત્રણ લાવવા જઈ રહી છે. આ સંદર્ભમાં ઓનલાઈન ગેમિંગ એપ બિલ સંસદમાં રજૂ કરવામાં આવશે. વડાપ્રધાન નરેન્દ્ર મોદીના નેતૃત્વ હેઠળના કેન્દ્રીય મંત્રીમંડળે મંગળવારે આ બિલને મંજૂરી આપી હતી જેનો હેતુ સટ્ટાબાજીની એપ્લિકેશનોને નિયંત્રિત કરવા અને જુગાર પર કડક નજર રાખવાનો છે. આ બિલમાં ઓનલાઈન ગેમિંગ પ્લેટફોર્મને કાયદા હેઠળ લાવવા અને ડિજિટલ એપ્સ દ્વારા જુગાર રમવા બદલ દંડ લાદવાની જોગવાઈ છે.
આ બિલ બુધવારે જ સંસદમાં ચોમાસા સત્ર દરમિયાન રજૂ કરવામાં આવશે જેથી આગામી શિયાળુ સત્રમાં તેની ચર્ચા થઈ શકે. ચોમાસા સત્ર 21 ઓગસ્ટના રોજ સમાપ્ત થઈ રહ્યું છે. કેન્દ્ર આ બિલ એવા સમયે લાવી રહ્યું છે જ્યારે તે આ દિવાળીએ નવી સિસ્ટમ હેઠળ ઓનલાઈન ગેમિંગ પર ગુડ્સ એન્ડ સર્વિસ ટેક્સ (GST) 28 ટકાથી વધારીને 40 ટકા કરવાનું વિચારી રહ્યું છે. આગળ જતાં ઓનલાઈન ગેમિંગમાં KYC પણ ફરજિયાત બની શકે છે.
કેન્દ્ર સરકારે બિલ લાવતા પહેલા જ ઓનલાઈન ગેમિંગ દ્વારા પૈસા કમાવવાનો દાવો કરતી એપ્સને નિયંત્રિત કરવાનું શરૂ કરી દીધું હતું. ઓનલાઈન ગેમિંગ પ્લેટફોર્મ સહિત ડિજિટલ પ્લેટફોર્મ માટે નાણાકીય વ્યવહારોને નિયંત્રિત કરવા અને યુઝર ડેટાને સુરક્ષિત કરવા માટે ઘણા પગલાં લેવામાં આવ્યા હતા. આવકવેરા વસૂલાતના ફાઇનાન્સ એક્ટ, 2023 હેઠળ, આકારણી વર્ષ 2024-25 થી ઓનલાઈન ગેમ્સમાં ચોખ્ખી જીત પર 30 ટકાના દરે આવકવેરો લાદવામાં આવ્યો છે.
નિયંત્રણનો ઉદ્દેશ્ય
આ નિયંત્રણનો ઉદ્દેશ્ય દેશભરમાં ડિજિટલ સટ્ટાબાજી (ઓનલાઈન જુગાર)નું નિયમન કરવાનો છે. સાથે જ સટ્ટાબાજી સંબંધિત વ્યસન અને છેતરપિંડી જેવી સમસ્યાઓનો સામનો કરવો, વિવિધ રાજ્યોના જુગાર કાયદાઓ વચ્ચે સંકલન સાધવા, માહિતી અને ટેકનોલોજી મંત્રાલય (MeitY) ને કેન્દ્રીય નિયમનકાર બનાવવાનો તેમજ અધિકારીઓને ગેરકાયદેસર અથવા નોંધણી વગરના પ્લેટફોર્મને અવરોધિત કરવાની સત્તા આપવાનો છે.
સેલિબ્રિટીઓ પર પણ કડકાઈ
છેલ્લા કેટલાક મહિનામાં ઓનલાઈન ગેમિંગ એપ્સ દ્વારા નાણાકીય છેતરપિંડી અને આર્થિક ગુનાઓમાં થયેલા વધારા અંગે તપાસ એજન્સીઓએ તપાસ શરૂ કરી છે. આ અંતર્ગત આ એપ્સનો પ્રચાર કરતી સેલિબ્રિટીઓને પણ તપાસના દાયરામાં લઈને પૂછપરછ કરવામાં આવી રહી છે.
