એક દિવસ એક હોટલમાં પિકાસોને એક મોટા ઘરની શ્રીમંત મહિલા મળી. તેણે તેમની પાસે જઈને કહ્યું, ‘હું આપની કલાની ચાહક છું.મને તમે એક પેન્ટિંગ દોરી આપો.’પિકાસોએ કહ્યું, ‘અહીં અત્યારે એ શક્ય નથી. તમે મને શાંતિથી મળજો. હું તમને ચોક્કસ પેન્ટિંગ દોરી આપીશ.’મહિલાએ કહ્યું, ‘આજે આપણે મળ્યા તેની યાદ રૂપે તમે મને કંઇક તો દોરીને આપો જ.’પિકાસોએ ફરી કહ્યું, ‘પણ મેડમ, મારી પાસે કોઈ પેન્ટિંગનાં સાધનો પણ નથી.’મહિલાએ જીદ કરતાં કહ્યું, ‘વાંધો નહિ, તમે મને પેન કે પેન્સિલની મદદથી લો, આ કાગળ પર કંઈ પણ યાદગીરી માટે દોરી આપો પછી આપણે મળીએ કે ન મળીએ.’
અંતે મહિલાની લાગણી અને જીદ સામે ઝૂકી જઈને પિકાસોએ મહિલાના હાથમાંથી કાગળ લઇ હોટલની રીસેપ્શનીસ્ટ પાસેથી એક પેન માંગી અને ઊભા ઊભા ત્રીસ મીનીટમાં એક પેન્ટિંગ દોરી આપ્યું અને બોલ્યા, ‘મેડમ, તમારી મારા પ્રત્યેની અને કળા પ્રત્યેની લાગણીને કારણે આ મારા તરફથી આપને એક નાનકડી અમૂલ્ય ભેટ.’ મહિલા ખૂબ ખૂબ આભાર માની ત્યાંથી નીકળી ગઈ.તે વિચાર કરી રહી હતી કે કલાકારો સાચે ધૂની હોય. મારી વિનંતીને માન આપી તેમણે મારા જ આપેલા કાગળ પર માત્ર પેનથી ઊભા ઊભા એક ચિત્ર દોરી આપ્યું તેને અમૂલ્ય ભેટ કહે છે.મહિલાએ ઘરે આવી પોતાના અમીર ઉમરાવ પતિને પિકાસો સાથેની મુલાકાત વિષે વાત કરી અને તેમણે દોરીને આપેલું પેન્ટિંગ બતાવ્યું.
પત્નીની વાત સાંભળી પતિ ઊભો થઇ ગયો અને વારંવાર પૂછવા લાગ્યો, ‘શું આ સાચે પિકાસોએ ઊભા ઊભા દોરીને આપ્યું છે.’પત્નીએ કહ્યું, ‘હા, પણ એમાં શું કામ વારંવાર પૂછો છો?’ પતિએ કહ્યું, ‘તને ખબર છે પિકાસોના હાથથી દોરાયેલા આ નાનકડા ચિત્રની કિંમત મિલિયન ડોલરથી વધુ ગણાય.’પત્ની બોલી, ‘હવે મને સમજાયું કે ચિત્ર આપતી વખતે તેઓ બોલ્યા હતા મારા તરફથી અમૂલ્ય ભેટ.’ બીજે દિવસે તે મહિલા પિકાસોને મળવા પહોંચી ગઈ અને આભાર માનતાં કહેવા લાગી, ‘આપના દ્વારા ઊભા ઊભા ૩૦ સેકન્ડમાં દોરાયેલા નાના ચિત્રની કિંમત મારા પતિ કહે છે કે મિલિયન ડોલરથી પણ વધુ કહેવાય.તો મારે તમને હજી એક વિનંતી કરવી છે કે મને તમે ચિત્ર દોરતા શીખવાડો.
ભલે, હું ૩૦ સેકન્ડમાં નહિ પણ ૩૦ થી ૪૦ મીનીટમાં આવું ચિત્ર દોરી શકીશ તો મારું ચિત્ર પણ મિલિયન ડોલરમાં વેચાશે.’ પિકાસો બોલ્યા, ‘મેડમ,૩૦ સેકન્ડમાં હું ઊભા ઊભા ચિત્ર દોરું અને તો પણ તેની મિલિયન ડોલરમાં કિંમત એટલે થાય છે કે ચિત્રકલા શીખવામાં મેં મારા જીવનનાં ૩૦ વર્ષ આપ્યાં છે.દિવસ રાત જોયા વિના કલાની સાધના કરી છે અને આજે પણ શીખી જ રહ્યો છું.બસ, તમે પણ આટલી મહેનત કરો. જીવનનાં ત્રીસ વર્ષ આપો એટલે તમારું ચિત્ર પણ મિલિયન ડોલરમાં વેચાશે.’
– આ લેખમાં પ્રગટ થયેલા વિચારો લેખકના પોતાના છે.
