સુરત શહેરના પર્વત પાટિયા વિસ્તારમાં આવેલ સાત માળની રાજ ટેક્સટાઇલ માર્કેટમાં આજે 10 ડિસેમ્બર સવારે મોટી આગ લાગતા અફરાતફરી મચી ગઈ હતી. સવારે લગભગ 7 વાગ્યે લાગેલી આગ ઝડપથી વિકરાળ બની અને ફાયર બ્રિગેડને બ્રિગેડ કોલ જાહેર કરવો પડ્યો હતો. ચાર કલાકની સતત જહેમત બાદ આગ પર કાબૂ મેળવવામાં સફળતા મળી હતી. જોકે કુલિંગનું કામ કલાકો સુધી ચાલુ રહેવાની શક્યતા છે કારણ કે દુકાનોમાં સિન્થેટિક કાપડનો વિશાળ જથ્થો હતો.
પ્રાથમિક માહિતી મુજબ આગની શરૂઆત ગ્રાઉન્ડ ફ્લોર પર આવેલી લિફ્ટના ઈલેક્ટ્રીકલ વાયરિંગમાંથી થઈ હતી. થોડા જ સમયમાં વાયરીંગ માધ્યમથી આગ સાતમા માળ સુધી ફેલાઈ ગઈ. માર્કેટની અંદર આવેલી 20થી વધુ દુકાનો આગની ઝપેટમાં આવી ગઈ છે. કાપડ બજાર હોવાને કારણે નુકસાનનો અંદાજ મોટા પાયે લાગી રહ્યો છે.
9 ફાયર સ્ટેશનની 15થી વધુ ગાડીઓ સ્થળે પહોંચી
આગની ગંભીરતા જોતા તાત્કાલિક બ્રિગેડ કોલ જાહેર કરવામાં આવ્યો હતો. શહેરના 9 ફાયર સ્ટેશનમાંથી 15થી વધુ ફાયર ફાઇટર ગાડીઓ થોડા જ સમયમાં ઘટનાસ્થળે પહોંચી હતી. ફાયર જવાનો દ્વારા ચારથી વધુ કલાક સુધી સતત આગ બુઝાવવાની કામગીરી હાથ ધરવામાં આવી. અંતે આગ કાબૂમાં આવી પરંતુ દુકાનોમાં રહેલા સિન્થેટિક કાપડના કારણે કૂલિંગ પ્રક્રિયા લાંબા સમય સુધી ચાલશે તેવી શક્યતા છે.
આગ કાબૂમાં લેવા મુશ્કેલ કેમ બની ?
- લિફ્ટના વાયરિંગ માધ્યમથી આગ સીધી ગ્રાઉન્ડ ફ્લોરથી 7મા માળ સુધી પહોંચતી હતી.
- માર્કેટની દરેક દુકાનમાં મોટા પ્રમાણમાં કાપડનો જથ્થો સંગ્રહિત હોય જેથી આગ ઝડપથી ફેલાઈ હતી.
- સિન્થેટિક કાપડના સળગવાથી ઘાટો અને ઝેરી ધુમાડો ઉત્પન્ન થતો હોવાથી ફાયરમેનને ઓક્સિજન માસ્ક પહેરીને કામગીરી કરવી પડી.
- પાવર કટ કર્યા બાદ જ અંદર જઈ કામગીરી શરૂ કરી શકાય તેવી પરિસ્થિતિ હતી.
હાલની સ્થિતિ
ફાયર બ્રિગેડે આગ પર કાબૂ મેળવી લીધો છે પરંતુ કુલિંગનું કામ હજુ ચાલુ છે. આગના કારણે થયેલા નુકસાનનો અંદાજ લાખોમાં નહીં પરંતુ કરોડોમાં જઈ શકે એવી શક્યતા છે.
