પૂર્વ વડાપ્રધાન મનમોહન સિંહના નિધનથી સમગ્ર દેશમાં શોકની લહેર છે. દેશમાં સાત દિવસનો રાષ્ટ્રીય શોક જાહેર કરવામાં આવ્યો છે. વડાપ્રધાન નરેન્દ્ર મોદીએ મનમોહન સિંહના નિવાસ સ્થાને જઈને પૂર્વ પીએમને શ્રદ્ધાંજલિ આપી હતી. કોંગ્રેસના રાજ્યસભા સાંસદ સોનિયા ગાંધી, લોકસભામાં વિપક્ષના નેતા રાહુલ ગાંધી, સાંસદ પ્રિયંકા ગાંધી, કોંગ્રેસના મહાસચિવ કેસી વેણુગોપાલ અને અન્ય કોંગ્રેસના નેતાઓ મનમોહન સિંહને શ્રદ્ધાંજલિ આપવા માટે તેમના નિવાસસ્થાને પહોંચ્યા હતા. તેમની અંતિમ યાત્રા 28 ડિસેમ્બર શનિવારના રોજ સવારે 9:30 વાગ્યે દિલ્હીમાં AICC (ઓલ ઈન્ડિયા કોંગ્રેસ કમિટી)ના મુખ્યાલયથી શરૂ થશે. આ માહિતી કોંગ્રેસના મહાસચિવ કેસી વેણુગોપાલે આપી હતી. ડૉ. સિંહના પાર્થિવ દેહને શનિવારે સવારે 8 વાગ્યે તેમના નિવાસસ્થાનથી AICC મુખ્યાલયમાં લાવવામાં આવશે, જ્યાં લોકો અને કોંગ્રેસના કાર્યકરો સવારે 8:30 થી 9:30 સુધી તેમને શ્રદ્ધાંજલિ આપી શકશે.
પૂર્વ વડાપ્રધાન ડૉ.મનમોહન સિંહનું ગુરુવારે રાત્રે નિધન થયું. તેઓ 92 વર્ષના હતા. વડા પ્રધાન નરેન્દ્ર મોદી અને ગૃહ પ્રધાન અમિત શાહ તેમના નિવાસસ્થાને પહોંચ્યા અને તેમને શ્રદ્ધાંજલિ આપી હતી. કેન્દ્રીય કેબિનેટની બેઠકમાં પૂર્વ પીએમને શ્રદ્ધાંજલિ આપવામાં આવી હતી અને શોક પ્રસ્તાવ પસાર કરવામાં આવ્યો હતો. મનમોહન સિંહ લાંબા સમયથી બીમાર હતા. ઘરે બેહોશ થયા બાદ તેમને રાત્રે 8.06 કલાકે દિલ્હી એમ્સમાં લાવવામાં આવ્યા હતા. હોસ્પિટલના બુલેટિન અનુસાર તેમણે રાત્રે 9:51 વાગ્યે અંતિમ શ્વાસ લીધા હતા. વડાપ્રધાન મોદીએ શોક સંદેશ જારી કરીને પૂર્વ પીએમને યાદ કર્યા. પીએમ મોદીએ કહ્યું કે ‘પૂર્વ પીએમ મનમોહન સિંહના નિધનથી અમે બધા દુખી છીએ. તેમની વિદાય દેશ માટે એક મોટો આઘાત છે. મનમોહન સિંઘનું જીવન ભાવિ પેઢીઓ માટે એક ઉદાહરણ છે કે તેઓ કેવી રીતે તમામ પડકારોને પાર કરી મહાન ઊંચાઈ સુધી પહોંચ્યા.
મનમોહનના પાર્થિવ દેહને આવતીકાલે કોંગ્રેસના મુખ્યાલયમાં રાખવામાં આવશે, જ્યાં સામાન્ય લોકો તેમને શ્રદ્ધાંજલિ આપશે. મળતી માહિતી મુજબ આવતીકાલે મનમોહનના અંતિમ સંસ્કાર થશે. તેમની દીકરીઓ આજે સાંજ સુધીમાં અમેરિકાથી ભારત આવશે. જ્યાં અંતિમ સંસ્કાર કરવામાં આવશે તે સ્થળ વડાપ્રધાન કાર્યાલય (PMO) દ્વારા નક્કી કરવામાં આવશે.
મનમોહન સિંહ 2004માં દેશના 14મા વડાપ્રધાન બન્યા હતા. તેમણે મે 2014 સુધી આ પદ પર બે કાર્યકાળ પૂર્ણ કર્યા હતા. તેઓ દેશના પ્રથમ શીખ અને ચોથા સૌથી લાંબા સમય સુધી સેવા આપતા વડાપ્રધાન હતા. મનમોહન સિંહના નિધનના કારણે કેન્દ્ર સરકારે 7 દિવસનો રાષ્ટ્રીય શોક જાહેર કર્યો છે. તેમજ શુક્રવારના નિર્ધારિત તમામ કાર્યક્રમો રદ કરવામાં આવ્યા છે.
રાહુલ ગાંધી અને કોંગ્રેસ અધ્યક્ષ ખડગે મોડી રાત્રે બેલગાવીથી દિલ્હી પહોંચ્યા બાદ સીધા મનમોહન સિંહના નિવાસસ્થાને ગયા હતા. રાહુલે X પર લખ્યું હતું કે મેં મારા માર્ગદર્શક અને ગુરુ ગુમાવ્યા છે. દરમિયાન કર્ણાટકના બેલાગવીમાં ચાલી રહેલી કોંગ્રેસ વર્કિંગ કમિટી (CWC)ની બેઠક રદ કરવામાં આવી હતી. કોંગ્રેસના સ્થાપના દિવસને લગતા કાર્યક્રમો પણ રદ કરવામાં આવ્યા છે. પાર્ટીના કાર્યક્રમો 3 જાન્યુઆરી પછી શરૂ થશે.
રાષ્ટ્રીય સ્વયંસેવક સંઘ (RSS)ના વડા મોહન ભાગવત અને મહાસચિવ દત્તાત્રેય હોસાબલેએ મનમોહન સિંહના નિધન પર શોક વ્યક્ત કર્યો હતો. સંયુક્ત નિવેદનમાં, તેઓએ કહ્યું કે તે એક સામાન્ય પરિવારમાંથી આવ્યા અને દેશના સર્વોચ્ચ પદ પર પહોંચ્યા હતા. તેઓ પ્રખ્યાત અર્થશાસ્ત્રી હતા. તેમના યોગદાનને દેશ હંમેશા યાદ રાખશે. ભગવાન તેમના આત્માને શાંતિ આપે.
પૂર્વ રાષ્ટ્રપતિ રામનાથ કોવિંદે કહ્યું કે મનમોહન સિંહની વિદાય મહાન દેશ માટે અને વ્યક્તિગત રીતે મારા માટે ખોટ છે. હું તેમને વર્ષોથી ઓળખતો હતો. હું તેમને રાષ્ટ્રપતિ ભવનમાં મળતો હતો. તે સૌમ્યતાનું પ્રતીક હતા. તેઓ ભારતીય અર્થતંત્રના આધુનિક નિર્માતા હતા.
