બિગ બોસ (Big Boss) OTT-2 વિજેતા અને યુટ્યુબર એલ્વિશ યાદવે BJP સાંસદ મેનકા ગાંધી (Maneka Gandhi) સામે માનહાનિનો કેસ કરવાની ધમકી આપી છે. યુપીના નોઈડામાં રેવ પાર્ટીમાં સાપનું ઝેર અને વિદેશી છોકરીઓ સપ્લાય કરવાના મામલે એલ્વિશ યાદવ સામે કેસ નોંધાયા બાદ તેણે આ વાત કહી છે. એલ્વિશે મેનકા ગાંધી પર તેમની છબી ખરાબ કરવાનો આરોપ લગાવ્યો છે અને કહ્યું છે કે સત્ય જલ્દી બહાર આવશે. તેણે કહ્યું કે ઐસે હી નહીં છોડને વાલા મૈં.. અબ મૈં એક્ટિવ હો ગયા હૂં.
એલ્વીશનો એક વીડિયો વાયરલ થઈ રહ્યો છે જેમાં તે કહી રહ્યો છે કે મેનકા ગાંધીજી દ્વારા મારા પર આરોપ લગાવવામાં આવ્યો હતો અને તેમણે મને સાપ સપ્લાયરનો વડા કહ્યો હતો. હું તેમની સામે માનહાનિનો કેસ દાખલ કરીશ. હું તેમને નહીં છોડું. આટલી સરળતાથી હૂં છોડતો પણ નથી. હવે હું આ બધી બાબતોમાં સક્રિય થઈ ગયો છું. પહેલા મેં વિચાર્યું કે આ બધી બાબતોમાં મારે સમય બગાડવો નથી. પરંતુ જ્યારે મને સાપનો સપ્લાયર કહેવામાં આવ્યો ત્યારે મને લાગ્યું કે હવે બોલવું જોઈએ કારણકે મારી છબી પર અસર થઈ રહી છે.
યુટ્યુબરે વધુમાં કહ્યું કે જે લોકો મને જોઈ રહ્યા છે કૃપા કરીને ફક્ત એક સાઈડ જોઈને તેના આધારે મારો ન્યાય ન કરો. થોડી રાહ જુઓ. જ્યારે પોલીસ તપાસ શરૂ થશે ત્યારે હું તે વીડિયો પણ શેર કરીશ. હું બધું બતાવીશ. હું આ ખૂબ જ વિશ્વાસ સાથે કહી રહ્યો છું. જ્યારે તપાસ શરૂ થશે ત્યારે એક પ્રેસ સ્ટેટમેન્ટ પણ બહાર પાડવામાં આવશે કે એલ્વિશ યાદવની આ મામલામાં કોઈ સંડોવણી નથી. કૃપા કરીને તે વીડિયો પણ જરૂરથી શેર કરજો.
મેનકા ગાંધીએ કહ્યું હતું- એલ્વીશની ધરપકડ થવી જોઈએ
તમને જણાવી દઈએ કે સાપની તસ્કરીનો મામલો બહાર આવ્યા બાદ એક નિવેદન આપતાં મેનકા ગાંધીએ કહ્યું હતું કે એલ્વિશ યાદવની ધરપકડ થવી જોઈએ કારણ કે તે સાપ તસ્કરોનો નેતા છે. મેનકા ગાંધીની ઓર્ગેનાઈઝેશન પીપલ ફોર એનિમલ્સ (PFA) એ એલ્વિશ યાદવ વિરુદ્ધ સાપની દાણચોરી અને રેવ પાર્ટીઓનું આયોજન કરવાનો આરોપ લગાવીને ફરિયાદ નોંધાવી હતી. આ પછી નોઈડા પોલીસે એક રેવ પાર્ટીનો પર્દાફાશ કર્યો અને પાંચ લોકોની ધરપકડ કરી હતી. જેમાં પૂછપરછ દરમિયાન એલ્વિશ યાદવનું નામ બહાર આવ્યું હતું.
