હરિયાણાના ફરીદાબાદથી પોલીસે અબ્દુલ રહેમાન નામના ઈસમની ધરપકડ કરી છે. તે ISIS ના સંપર્કમાં હતો. ISIS હેન્ડલર અબુ સુફિયાનના સંપર્કમાં આવ્યા બાદ અબ્દુલ રહેમાન રામ મંદિર પર હુમલો કરવાની યોજના બનાવી રહ્યો હતો. હૈદરાબાદ મોડ્યુલ સાથે સંકળાયેલા અબુ સુફિયાને અબ્દુલ રહેમાનને રામ મંદિર પર હુમલો કરવા માટે ઉશ્કેર્યો હતો.
અબુ સુફિયાનના સંપર્કમાં આવ્યા પછી જ અબ્દુલ રહેમાને સોશિયલ મીડિયા પર હથિયારો ચલાવતા વીડિયો અપલોડ કરવાનું શરૂ કર્યું, જેના કારણે તે સુરક્ષા એજન્સીઓના રડાર પર આવી ગયો. ધરપકડના બીજા દિવસે અને ગયા શનિવારે અબ્દુલ રહેમાનના ઘરેથી દરોડા પાડવામાં આવ્યા હતા, જેમાં લાકડાની બંદૂક, એર ગન, રોકેટ લોન્ચર, પિસ્તોલ અને હેન્ડ ગ્રેનાઈટ ડમી પણ મળી આવી હતી.
અબ્દુલ રહેમાન દ્વારા આપવામાં આવેલી માહિતીના આધારે સુરક્ષા એજન્સીઓએ આ બનાવટી હથિયારો જપ્ત કર્યા હતા. હાલમાં યુપી એટીએસ સહિત તમામ સુરક્ષા એજન્સીઓ તેની પૂછપરછ કરી રહી છે. હવે અબ્દુલ રહેમાનના મદદગારોને પણ અયોધ્યા/ફૈઝાબાદમાં શોધવામાં આવી રહ્યા છે.
ગઈ તા. 2 માર્ચે ગુજરાત એન્ટી ટેરરિસ્ટ સ્ક્વોડ (ATS) અને ફરીદાબાદ સ્પેશિયલ ટાસ્ક ફોર્સ (STF) એ સંયુક્ત ઓપરેશનમાં આતંકવાદી જોડાણની શંકાના આધારે અબ્દુલ રહેમાન (19) ની ધરપકડ કરી હતી. તે ઉત્તર પ્રદેશના ફૈઝાબાદ (અયોધ્યા)નો રહેવાસી છે.
શંકાસ્પદ વ્યક્તિને ફરીદાબાદથી ધરપકડ કરવામાં આવી હતી, જ્યાં તે આતંકવાદી કાવતરાને અંજામ આપવાની તૈયારી કરી રહ્યો હતો. તેની પાસેથી બે હેન્ડ ગ્રેનેડ મળી આવ્યા હતા, જેને સુરક્ષા એજન્સીઓએ તાત્કાલિક નિષ્ક્રિય કરી દીધા હતા.
પોલીસના જણાવ્યા અનુસાર ધરપકડ કરાયેલ શંકાસ્પદ અબ્દુલ રહેમાન પાકિસ્તાનની ગુપ્તચર એજન્સી ISI ના સંપર્કમાં હતો અને અયોધ્યામાં રામ મંદિર પર આતંકવાદી હુમલા માટે તૈયાર હતો. તપાસમાં જાણવા મળ્યું કે રહેમાન અનેક કટ્ટરપંથી જૂથો સાથે સંકળાયેલો હતો અને ફૈઝાબાદમાં મટનની દુકાન ચલાવતો હતો.
તપાસમાં એ પણ ખુલાસો થયો છે કે અબ્દુલ રહેમાને અગાઉ પણ ઘણી વખત અયોધ્યામાં રામ મંદિરની રેકી કરી હતી અને ત્યાંની સુરક્ષા વ્યવસ્થા સંબંધિત મહત્વપૂર્ણ માહિતી ISI સાથે શેર કરી હતી. આતંકવાદીઓનો ઈરાદો રામ મંદિર પર હેન્ડગ્રેનેડથી હુમલો કરીને મોટા પાયે વિનાશ કરવાનો હતો. ખરેખર, આ કામગીરીને પાર પાડવામાં ગુજરાત ATS ની ભૂમિકા ખૂબ જ મહત્વપૂર્ણ હતી.
ATS ને ઇનપુટ મળ્યું હતું કે એક શંકાસ્પદ આતંકવાદી ભારતમાં સક્રિય છે, જે એક આતંકવાદી સંગઠનના નિર્દેશ પર મોટા હુમલાની તૈયારી કરી રહ્યો છે. આ માહિતીના આધારે, ગુજરાત ATS અને ફરીદાબાદ STF એ છટકું ગોઠવ્યું અને શંકાસ્પદ વ્યક્તિની ધરપકડ કરી.
