વડોદરા : ગોરવા વિસ્તારમાં રહેતી સગીરાનું સોશિયલ મીડિયાના માધ્યમથી સંપર્કમાં આવેલા મૂળ જેતપુરપાવીના યુવક દ્વારા અપહરણ કરાયું હતું. ત્યારબાદ ભાડાના મકાનમાં લઇ સગીરા પર દુષ્કર્મ ગુજાર્યું હતું. પોલીસે સગીરાનું અપહરણ કરનાર યુવકની ધરપકડ કરી આગળની કાર્યવાહી હાથ ધરી છે. ગોરવા વિસ્તારમાં રહેતી અને ધોરણ-8માં અભ્યાસ કરતી સગીરા ગુમ થઇ ગઇ હતી. જેથી સગીરાના પરિવારજનો આસપાસના વિસ્તારમાં તથા સગા સંબંધીઓને ત્યાં શોધખોળ કરવા છતાં નહી મળી આવતા આખરે ગોરવા પોલીસ સ્ટેશનમાં જાણ કરાઇ હતી. જેથી પોલીસે એક્શનમાં આવી ગઇ હતી અને વિવિધ ટીમો બનાવી સુગીરાને શોધી કાઢવા કામે લાગી હતી. આ દરમિયાન ગોરવા બીઆઇડીસીની કંપનીમાં મજૂરી કરતા એક યુવકની હિલચાલ પર પોલીસને શંકા ગઇ હતી.
જેથી પોલીસે તે યુવકની તપાસ કરતા ભાડે રહેતો હોવાનું માલૂમ પડ્યું હતું. જેથી પોલીસે ભાડાના મકાનમાં તપાસ કરતા ઘરમાંથી યુવક અને ગુમ થયેલી સગીરા મળી આવ્યા હતા. પોલીસે ગુલસીંગ રાઠવા (દેગલા ગામ, તા. જેતપુર પાવી, છોટાઉદેપુર) ની અટકાયત કરી હતી. પોલીસ દ્વારા યુવકની કડકાઇથી પૂછપરછ કરાતા સગીરા સાથે સોશિયલ મીડિયાના માધ્યમથી સંપર્કમાં આવ્યા હતા. બંને વાતચીત થતી હોવાથી સગીરા ઘરેથી શાળાએ જવા નીકળ્યા બાદ યુવકે સગીરાનું અપહરણ કર્યું હોવાનું જણાવ્યું હતુ અને ગોરવા વિસ્તારમાં ભાડે રહેતા મકાનમાં લઇ જઇ દુષ્કર્મ આચર્યું હોવાની વિગતો બહાર આવી છે. પોલીસે બંને મેડિકલ કરવામાં આવ્યા છે.
