પ્રયાગરાજમાં ચાલી રહેલા મહાકુંભ વચ્ચે કિન્નર અખાડાએ મોટી કાર્યવાહી કરી છે. કિન્નર અખાડાના સંસ્થાપક ઋષિ અજય દાસે મમતા કુલકર્ણીને મહામંડલેશ્વરના પદ પરથી હટાવીને અખાડામાંથી હાંકી કાઢી છે. આ સાથે મમતાને મહામંડલેશ્વરનું પદન આપનાર લક્ષ્મી નારાયણ ત્રિપાઠીને આચાર્ય મહામંડલેશ્વર અને અખાડાના પદ પરથી હટાવી દેવામાં આવ્યા છે. કિન્નર અખાડા માટે ટૂંક સમયમાં નવા આચાર્ય મહામંડલેશ્વરની વરણી કરાશે. ઋષિ અજય દાસે કહ્યું કે અખાડાનું નવેસરથી આયોજન કરવામાં આવશે.
પૂર્વ અભિનેત્રી મમતા કુલકર્ણીએ થોડા દિવસો પહેલા પ્રયાગરાજમાં આયોજિત મહાકુંભમાં સંન્યાસની જાહેરાત કરી હતી. મમતા મહાકુંભ દરમિયાન કિન્નર અખાડા ખાતે આચાર્ય મહામંડલેશ્વર ડૉ. લક્ષ્મી નારાયણ ત્રિપાઠીને મળી હતી. આ પછી મમતાએ સંગમમાં પિંડ દાનની વિધિ કરી અને કિન્નર અખાડામાં તેમનો રાજ્યાભિષેક થયો.
મહાકુંભમાં સન્યાસ લીધા પછી મમતા કુલકર્ણીને નવું આધ્યાત્મિક નામ ‘શ્રી યમાઈ મમતા નંદ ગિરી’ આપવામાં આવ્યું. આ સાથે મમતાને કિન્નર અખાડાના મહામંડલેશ્વર તરીકે નિયુક્ત કરાઈ હતી.
સંત સમાજ નારાજ થયો હતો
મમતા કુલકર્ણીને મહામંડલેશ્વર બનાવવાને લઈને ઘણો વિવાદ થયો હતો. મમતા કુલકર્ણીની મહામંડલેશ્વર તરીકે નિયુક્તિ સામે સંત સમાજ સતત વિરોધ કરી રહ્યો હતો. બાબા રામદેવે મમતાને મહામંડલેશ્વર બનાવવાના નિર્ણય પર પણ સવાલો ઉઠાવ્યા હતા.
તેમણે કહ્યું હતું કે જે લોકો ગઈકાલ સુધી સાંસારિક આનંદમાં મશગૂલ હતા તેઓ એક જ દિવસમાં સંત બની ગયા અથવા મહામંડલેશ્વર જેવી પદવી મેળવી ગયા. કિન્નર અખાડાના સ્થાપક અજય દાસે પણ કહ્યું હતું કે મહિલાને કિન્નર અખાડાની મહામંડલેશ્વર બનાવવી એ સિદ્ધાંતોની વિરુદ્ધ છે.
મમતાએ શું કહ્યું?
મમતા કુલકર્ણીએ એક ઈન્ટરવ્યુમાં કહ્યું હતું કે, મારું ભારત છોડવાનું કારણ આધ્યાત્મિકતા હતું. 1996 માં હું આધ્યાત્મિકતા તરફ વળી હતી અને તે દરમિયાન હું ગુરુ ગગન ગિરી મહારાજને મળી હતી. તેમના આગમન પછી આધ્યાત્મિકતામાં મારો રસ વધ્યો અને મારી તપસ્યા શરૂ થઈ. જોકે, હું માનું છું કે બોલિવુડે મને ખ્યાતિ આપી. મેં બોલિવૂડ છોડી દીધું અને 2000 થી 2012 સુધી તપસ્યા ચાલુ રાખી.
તેણીએ કહ્યું હતું કે મેં ઘણા વર્ષો દુબઈમાં વિતાવ્યા. જ્યાં હું બે બેડરૂમના ફ્લેટમાં રહેતી હતી અને આ 12 વર્ષો દરમિયાન મેં બ્રહ્મચર્ય પાળ્યું હતું. મમતાની છેલ્લી રિલીઝ થયેલી ફિલ્મ ‘કભી તુમ કભી હમ’ 2002માં રિલીઝ થઈ હતી. આ પછી તેણે મનોરંજનની દુનિયા છોડી દીધી.
