લખીમપુર ખેરીમાં (Lakhmipur Kheri) એક પછી એક બે મોટા બોટ અકસ્માત થયા. ઘાઘરા (Ghaghara River) નદીમાં અલગ અલગ સમયે હોડી પલટી જતાં 25 લોકો ગુમ થવાની આશંકા છે. 3 લોકોને બચાવી લેવામાં આવ્યા છે. અકસ્માત બાદ મુખ્યમંત્રી યોગી આદિત્યનાથે (CM Yogi Adityanath) જિલ્લા વહીવટીતંત્રના અધિકારીઓને તાત્કાલિક સ્થળ પર પહોંચી બચાવ અને રાહત કામગીરી હાથ ધરવાનો નિર્દેશ આપ્યો છે. મુખ્યમંત્રીએ કહ્યું કે ડિઝાસ્ટર મેનેજમેન્ટ ટીમની મદદથી બચાવ અને રાહત કાર્ય ઝડપથી કરવું જોઈએ.
નદીના ધસમસતા પ્રવાહમાં મિરઝાપુર ગામના 10 લોકો ડૂબી ગયા
પ્રથમ ઘટના ઇસનગર પોલીસ સ્ટેશન વિસ્તારના મિરઝાપુર ગામના લોકો સાથે બની હતી. એવું કહેવાય છે કે ગામના લોકો તેમના ખેતરમાં પડેલો ડાંગર ઉપાડવા માટે સવારે હોડી દ્વારા ગયા હતા. બોટમાં 10 લોકો હતા. દરમિયાન, નદીની બીજી બાજુના આટવા ગામના લોકોએ માહિતી આપી કે જે બોટ પર મિરઝાપુરના લોકો જઈ રહ્યા હતા તે વહેતી જોવા મળી હતી. તેમણે આશંકા વ્યક્ત કરી કે ઘાઘરા નદીના મજબૂત પ્રવાહમાં હોડી પલટી ગઈ અને તેમાં સવાર લોકો ગુમ થઈ ગયા. આ બાબતની જાણકારી મળ્યા બાદ અધિકારીઓ ઘટનાસ્થળે પહોંચી ગયા છે. અધિકારી સંતોષ શુક્લાએ સૌ પ્રથમ લાપતા લોકોની શોધ માટે બોટ પર કર્મચારીઓ મોકલ્યા હતા, પરંતુ ધસમસતા પ્રવાહને કારણે બોટ આગળ વધી શકી નહોતી. હવે વહીવટીતંત્રે સ્ટીમરની વ્યવસ્થા કરી છે. ફ્લડ પીએસીના કર્મચારીઓ સ્ટીમર દ્વારા ગુમ થયેલા લોકોની શોધ માટે નદી પાર કરશે.
પાક લણવા માટે જતા 18 લોકો મટેરા નજીક ડૂબી ગયા
બીજી ઘટના ધૈરાહરાના જંગલ મટેરા ગામ નજીક બની હતી. અહીં લણણી જોવા માટે લગભગ 18 લોકો હોડીમાં જઈ રહ્યા હતા. ઘાઘરાના કિનારે હોડી ડૂબી ગઈ. એક ગ્રામજનોને વન વિભાગના લોકોએ બચાવ્યા હતા અને અન્ય બે લોકો તરીને બહાર આવ્યા હતા. અત્યાર સુધી, 15 લોકો વિશે કંઈ જાણી શકાયું નથી. વહીવટીતંત્રે જંગલ માટેરા ગામમાં પહોંચીને બચાવ કામગીરી શરૂ કરી છે.
બોટ પર સવાર લોકોમાં સુંદર પુત્ર ગયા પ્રસાદ, ત્રિમોહન પુત્ર સુંદર, અશોક કુમાર પુત્ર ગયા પ્રસાદ, ઢોડે પુત્ર નનકુ, દીપૂ પુત્ર નનકઉ, સુરેન્દ્ર કુમાર પુત્ર નનકઉ, કુપા દયાલ પુત્ર મોહન, મુરારી પુત્ર મૌજીલાલ, રાજુ પુત્ર શૈલાફી ગણાવવામાં આવે છે. DM ડો. અરવિંદ કુમાર ચૌરસિયાએ જણાવ્યું કે અમે એલર્ટ છીએ. રેસ્ક્યૂનો પ્રયાસ થઈ રહ્યો છે.
બનબાસા બેરેજમાં છોડાયેલા 5 લાખ ક્સૂયેક પાણીએ તારાજી સર્જી
બનબાસા બેરેજમાંથી છોડવામાં આવેલા 5 લાખ ક્યુસેક પાણીએ ખેરીમાં પાયમાલી સર્જી છે. મંગળવારે રાત્રે જ પાલિયા અને ભીરા વચ્ચેના મુખ્ય રસ્તા પર 3 ફૂટ પાણી આવ્યું હતું. આ પછી આ રોડ પરનો ટ્રાફિક બંધ કરવો પડ્યો હતો. વહીવટીતંત્ર દ્વારા અહીંથી પસાર થતી ખાનગી બસો પણ બંધ કરવામાં આવી હતી. બીજી તરફ શારદાના જળસ્તરમાં સતત વધારો થઈ રહ્યો છે. શારદા તેના ભયના નિશાનથી એક મીટર ઉપર વહી રહી છે. પાલિયાના અનેક વિસ્તારોમાં બે થી ત્રણ ફૂટ પાણી ઘૂસી ગયું છે. બીજી તરફ, ધોરાહરાના 15 ગામોમાં પૂરના પાણી ઘુસી ગયા છે. ગામડાઓનો રસ્તો બંધ છે.
