લાર્સન એન્ડ ટુબ્રો (L&T) ના ચેરમેન એસએન સુબ્રમણ્યમ ફરી એકવાર ચર્ચામાં છે. સુબ્રમણ્યમે તાજેતરમાં પોતાના કર્મચારીઓને 90 કલાક કામ કરવાની સલાહ આપી હતી. તેમણે ફરી એવું કંઈક કહ્યું છે જેના લીધે ફરી એકવાર સોશિયલ મીડિયા પર ચર્ચા શરૂ થઈ ગઈ છે.
હકીકતમાં સુબ્રમણ્યમે દેશમાં કામદારોની અછત માટે સરકારની કલ્યાણકારી યોજનાઓને જવાબદાર ઠેરવી છે. ચેન્નાઈમાં CII સમિટમાં બોલતા તેમણે કહ્યું કે સરકારની કલ્યાણકારી યોજનાઓ અને છૂટછાટોને કારણે બાંધકામ મજૂરો કામ કરવામાં અનિચ્છા ધરાવે છે.
કામદારોની અછતે ચિંતા વધારી
L&Tના ચેરમેને મંગળવારે CIIના મિસ્ટિક સાઉથ ગ્લોબલ લિન્કેજ સમિટ 2025માં ભાગ લીધો હતો અને આ દરમિયાન તેમણે ખાસ કરીને બાંધકામ ઉદ્યોગમાં કામદારોની અછત અંગે ઊંડી ચિંતા વ્યક્ત કરી હતી. તેમણે કહ્યું કે એક સંગઠન તરીકે અમે કોઈપણ સમયે લગભગ 2.5 લાખ કર્મચારીઓ અને 4 લાખ મજૂરોને રોજગારી આપીએ છીએ પરંતુ છેલ્લાં કેટલાંક સમયથી મજૂરોની અછતે અમારી ચિંતા વધારી છે. આ પાછળનું કારણ સમજાવતા સુબ્રમણ્યમે વધુમાં કહ્યું કે દુનિયાભરના કામદારો કામની તકો માટે સ્થળાંતર કરતા જોવા મળે છે પરંતુ ભારતમાં આવું જોવા મળતું નથી. કામદારો આ માટે આગળ વધવા તૈયાર નથી.
અછત માટે સરકારી યોજનાઓને જવાબદાર ગણાવી
ચેરમેન એસ.એન. સુબ્રમણ્યમે જણાવ્યું હતું કે ભારતમાં બાંધકામ મજૂરોની મોટી અછત છે, તેનું કારણ સરકાર દ્વારા તેમના માટે ચલાવવામાં આવતી વિવિધ સરકારી યોજનાઓ અને ડીબીટી (ડાયરેક્ટ બેનિફિટ્સ ટ્રાન્સફર) હોઈ શકે છે, જેના કારણે તેમને વધુ કામની જરૂર નથી લાગતી અને તેમની નાણાંકીય સ્થિતિ સારી છે.
પોતાની કંપનીનો ઉલ્લેખ કરતા તેમણે કહ્યું કે L&T એ કામદારોને એકત્ર કરવા, ભરતી કરવા અને તેમની સંભાળ રાખવા માટે HR ટીમ રાખી છે પરંતુ તમામ પ્રયાસો છતાં, કામદારો શોધવા અને તેમને કામ પર જાળવી રાખવા એ આજે પણ એક મોટો પડકાર છે.
L&T ના બોસને 90 કલાક કામ કરવાની સલાહ બદલ ટ્રોલ કરાયા હતા
અગાઉ પણ તેમણે આવા નિવેદનો આપ્યા છે જે દેશમાં ચર્ચાનો વિષય બન્યા છે. તાજેતરમાં એસએન સુબ્રમણ્યમે તેમના કર્મચારીઓને અઠવાડિયામાં 90 કલાક (90 કલાક કાર્ય સપ્તાહ) કામ કરવાની સલાહ આપીને વિવાદ ઉભો કર્યો હતો અને આ માટે તેમને ભારે ટ્રોલ કરવામાં આવ્યા હતા.
તેમણે પોતાના કર્મચારીઓને કહ્યું હતું, મને દુઃખ છે કે હું તમને રવિવારે કામ પર નથી બોલાવી શકતો. જો હું તમને રવિવારે કામ પર રાખી શકું, તો મને વધુ ખુશી થશે. કારણ કે હું પોતે રવિવારે કામ કરું છું. એટલું જ નહીં 90 કલાક કામ કરવાની હિમાયત કરતી વખતે તેમણે કર્મચારીઓને એમ પણ કહ્યું કે તમે ક્યાં સુધી ઘરે બેસીને તમારી પત્નીને જોતા રહેશો. ચાલો, ઓફિસ જાઓ અને કામ શરૂ કરો. સોશિયલ મીડિયા પર વાયરલ થયેલા આ વીડિયો ક્લિપ અંગે એવી ચર્ચા શરૂ થઈ કે કંપનીએ પોતાનો ખુલાસો કરવો પડ્યો હતો.
