લોકસભા ચૂંટણીના પ્રથમ તબક્કામાં (Loksabha Election first Phase) શુક્રવારે 102 બેઠકો પર કુલ 68.29% મતદાન નોંધાયું છે. લક્ષદ્વીપ સીટ પર સૌથી વધુ 83.88% મતદાન થયું હતું જ્યારે બિહારની નવાદા સીટ પર સૌથી ઓછા લોકોએ 43.79% મતદાન કર્યું હતું. જે 102 બેઠકો પર મતદાન થયું ત્યાં 2019માં 69.96% મતદાન થયું હતું. દરમિયાન બંગાળમાં મતદાન દરમિયાન થયેલી હિંસાને જોતા ચૂંટણી પંચે બીજા તબક્કા માટે સુરક્ષા વધારવાનો નિર્ણય કર્યો છે.
લોકસભા ચૂંટણીના પ્રથમ તબક્કામાં કૂચબિહાર સહિત ઉત્તર બંગાળની ત્રણ બેઠકો પર મતદાન દરમિયાન થયેલી હિંસામાંથી બોધપાઠ લઈને ચૂંટણી પંચે હવે રાજ્યમાં સેન્ટ્રલ આર્મ્ડ પોલીસ ફોર્સ (Central Armed Police Force) (CAPF)ની તૈનાતી વધારવાનો નિર્ણય લીધો છે. ચૂંટણીનો બીજા તબક્કામાં સેન્ટ્રલ ફોર્સની 303 કંપનીઓ તૈનાત કરવામાં આવશે. મમતા બેનર્જીની નારાજગી વચ્ચે પંચે આ નિર્ણય લીધો હતો.
બીજા તબક્કાની ચૂંટણી 26મી એપ્રિલે યોજાશે. રાજ્યના મુખ્ય ચૂંટણી અધિકારી (CEO) અરિઝ આફતાબે કહ્યું કે બીજા તબક્કા હેઠળ રાયગંજ, દાર્જિલિંગ અને બાલુરઘાટ જિલ્લામાં ચૂંટણી યોજાશે. આ માટે ચૂંટણી પંચે આ જિલ્લાઓમાં CAPFની 303 કંપનીઓ તૈનાત કરવાનો નિર્ણય લીધો છે જેથી ચૂંટણી શાંતિપૂર્ણ રીતે હાથ ધરવામાં આવે અને રાજ્યમાં કોઈ અપ્રિય પરિસ્થિતિ ઊભી ન થાય. ચૂંટણી શાંતિપૂર્ણ રીતે હાથ ધરવા માટે CAPFની 273 કંપનીઓ રાજ્યમાં પહેલેથી જ છે અને 30 વધુ કંપનીઓ રવિવાર સુધીમાં રાજ્યમાં પહોંચી જશે. આ રીતે રાજ્યમાં 303 કંપનીઓ તૈનાત કરવામાં આવશે. સિક્કિમ અને મેઘાલયમાંથી 30 વધારાની કંપનીઓ આવશે.
મુખ્યમંત્રી મમતા બેનર્જીની નારાજગી વચ્ચે રાજ્યમાં કેન્દ્રીય દળોની વધારાની કંપનીઓ તૈનાત કરવામાં આવી રહી છે. આ પહેલા શુક્રવારે મમતાએ CAPFના સંદર્ભમાં લખેલા પત્રને લઈને ચૂંટણી પંચ પર નિશાન સાધ્યું હતું. એક ચૂંટણી રેલીમાં મુખ્યમંત્રી મમતા બેનર્જીએ પૂછ્યું હતું કે તમે રાજ્ય પોલીસને બાયપાસ કરીને ચૂંટણી કેવી રીતે કરાવી શકો છો?
જણાવી દઈએ કે લોકસભા ચૂંટણી 2024ના પ્રથમ તબક્કા માટે શુક્રવારે મતદાન થયું હતું. 21 રાજ્યો અને કેન્દ્રશાસિત પ્રદેશોની કુલ 102 બેઠકો માટે મતદાન થયું હતું. પ્રથમ તબક્કામાં જે બેઠકો પર મતદાન થયું તેમાં તમિલનાડુની તમામ 39, રાજસ્થાનની 12, ઉત્તર પ્રદેશની આઠ, મધ્યપ્રદેશની છ, ઉત્તરાખંડની તમામ પાંચ, મહારાષ્ટ્રની પાંચ, આસામ અને બિહારની ચાર-ચાર બેઠકો, પશ્ચિમ બંગાળ ત્રણ-ત્રણ સીટો મણિપુર, મેઘાલય, અરુણાચલ પ્રદેશ, છત્તીસગઢ, મિઝોરમ અને ત્રિપુરામાં એક-એક સીટ સામેલ છે.
