નવી દિલ્હી: સંસદના ચાલી રહેલા શિયાળુ સત્રનો આજે છેલ્લો દિવસ છે. છેલ્લા દિવસની કાર્યવાહી શરૂ થાય તે પહેલા શાસક પક્ષના સભ્યોએ સંસદ સંકુલમાં આગલા દિવસે બનેલી ધક્કામુક્કીની ઘટનાને લઈને દેખાવો કર્યા હતા. વિપક્ષે વિજય ચોક ખાતે વિરોધ પ્રદર્શન કર્યું હતું.
બીજેપી સાંસદ નિશિકાંત દુબેએ અમિત શાહના નિવેદનને વિકૃત કરવા અને સોશિયલ મીડિયા પર પ્રચાર કરવા બદલ રાહુલ ગાંધી વિરુદ્ધ વિશેષાધિકાર ભંગની નોટિસ આપી છે. હોબાળાના પગલે લોકસભાની કાર્યવાહી શરૂ થયાની પાંચ મિનિટમાં જ તેને અનિશ્ચિત સમય માટે સ્થગિત કરી દેવામાં આવી હતી.
રાજ્યસભાની કાર્યવાહી બપોરે 12 વાગ્યા સુધી સ્થગિત કરી દેવામાં આવી છે. ઉપલા ગૃહમાં હોબાળો થતાં અધ્યક્ષે ગૃહના નેતા અને વિપક્ષના નેતા બંનેને પોતાની ચેમ્બરમાં બોલાવીને ગૃહની કાર્યવાહી બપોરે 12 વાગ્યા સુધી સ્થગિત કરવાની જાહેરાત કરી હતી.
ડૉ. આંબેડકરને લઈને ચાલી રહેલી મડાગાંઠ વચ્ચે લોકસભાની કાર્યવાહી અનિશ્ચિત સમય માટે સ્થગિત કરવામાં આવી છે. લોકસભાની કાર્યવાહી શરૂ થતાં જ હોબાળો શરૂ થયો હતો. લોકસભા સ્પીકર ઓમ બિરલાએ કહ્યું કે કોઈપણ રાજકીય પક્ષ કોઈપણ સંજોગોમાં સંસદના કોઈપણ ગેટ પર વિરોધ કરશે નહીં. જો આ સૂચનાનું ઉલ્લંઘન થશે તો સંસદ યોગ્ય પગલાં લેશે. તેમણે એ પણ સલાહ આપી કે સંસદની ગરિમા એ સામૂહિક જવાબદારી છે.
રાજ્યસભાના ઉપસભાપતિ હરિવંશે રાજ્યસભાના અધ્યક્ષ અને ઉપાધ્યક્ષ જગદીપ ધનખર વિરુદ્ધ અવિશ્વાસ પ્રસ્તાવની નોટિસને ફગાવી દીધી છે.
સ્પીકરની કડક સૂચના
એક દિવસ પહેલા થયેલી ધક્કામુક્કી બાદ લોકસભા અધ્યક્ષ ઓમ બિરલાએ વિરોધને લઈને સૂચનાઓ જારી કરી છે. લોકસભા સ્પીકરે કડક સૂચના આપી છે કે સંસદ ભવનના કોઈપણ ગેટ પર કોઈ રાજકીય પક્ષ કે સાંસદોનું જૂથ વિરોધ પ્રદર્શન નહીં કરે.
