ઉદ્યોગપતિ અને કરિશ્મા કપૂરના પૂર્વ પતિ સંજય કપૂરનું ગુરુવારે રાત્રે ઇંગ્લેન્ડમાં હૃદયરોગના હુમલાથી અવસાન થયું છે. તેઓ 53 વર્ષના હતા. આ ચોંકાવનારા સમાચાર આવ્યા પછી કરિશ્માની બહેન કરીના કપૂર, તેનો પતિ સૈફ અલી ખાન અને નજીકના મિત્ર મલાઈકા અરોરા મોડી રાત્રે તેના ઘરે પહોંચ્યા અને તેમને સાંત્વના આપી.
સંજય કપૂરના મૃત્યુના સમાચાર મળતા જ કરીના કપૂર તેના પતિ અને અભિનેતા સૈફ અલી ખાન સાથે ગુરુવારે મોડી રાત્રે મુંબઈમાં કરિશ્માના ઘરે પહોંચી. કરીના અને સૈફના ચહેરા પર ઉદાસી સ્પષ્ટ દેખાઈ રહી હતી. આ દરમિયાન કરીના કારમાં માથું નીચું રાખીને બેઠેલી જોવા મળી. કરિશ્મા કપૂરે હજુ સુધી તેના પૂર્વ પતિના મૃત્યુ અંગે કોઈ નિવેદન આપ્યું નથી. આ દરમિયાન, મલાઈકા અરોરા અને અમૃતા અરોરા પણ કરિશ્માના ઘરની બહાર જોવા મળ્યા. અમૃતાના પતિ શકીલ લડાક પણ તેમની સાથે હતા.
સંજય કપૂરનું હૃદયરોગના હુમલાથી અવસાન થયું
અહેવાલ મુજબ પોલો રમતી વખતે સંજય કપૂરને હૃદયરોગનો હુમલો આવ્યો અને તેમનું અવસાન થયું. સુહેલ સેઠે આ સમાચારની પુષ્ટિ કરી જેમણે સંજય કપૂરના અવસાન પર શોક વ્યક્ત કરતાં લખ્યું, સંજયના અવસાનથી ખૂબ જ દુઃખ થયું, તેમનું આજે સવારે ઈંગ્લેન્ડમાં અવસાન થયું. આ એક મોટું નુકસાન છે અને તેમના પરિવાર અને સોના કોમસ્ટારના તેમના સાથીદારો પ્રત્યે મારી ઊંડી સંવેદના છે. ઓમ શાંતિ.
સંજય અને કરિશ્માના ડિવોર્સ થયા હતા
સંજય અને કરિશ્માના લગ્ન 2003 માં થયા હતા અને જૂન 2016 માં તેમના છૂટાછેડા થઈ ગયા હતા. કરિશ્મા 2010 માં દિલ્હી સ્થિત તેના ઘરેથી મુંબઈ રહેવા ગઈ હતી, જ્યાં તેના નાના પુત્ર કિયાનનો જન્મ થયો હતો. 2014 માં, બંનેએ તેમના લગ્નનો અંત લાવવાનો નિર્ણય લીધો અને છૂટાછેડા માટે અરજી કરી. સંજયે બાદમાં પ્રિયા સચદેવ સાથે લગ્ન કર્યા, જેની સાથે તેનો એક પુત્ર છે.
