રિલાયન્સ જિયોની ટ્રુ-5જી સર્વિસનું (JioTRUE 5G Service) બીટા ટ્રાયલ દશેરાથી (Dashera) શરૂ થઈ રહ્યું છે. તેની શરૂઆત દિલ્હી, મુંબઈ, કોલકાતા અને વારાણસીથી થઈ રહી છે. હાલમાં આ સેવા આમંત્રણ (Invitation) પર છે એટલે કે વર્તમાન Jio વપરાશકર્તાઓમાંથી કેટલાક પસંદ કરેલા વપરાશકર્તાઓને આ સેવાનો ઉપયોગ કરવા માટે આમંત્રણ મોકલવામાં આવશે. આ સાથે યુઝર્સને વેલકમ-ઓફર પણ મળશે જે અંતર્ગત યુઝર્સને 1Gbps સુધીની સ્પીડ અને અનલિમિટેડ 5G ડેટા મળશે. આમંત્રિત વપરાશકર્તાઓ Jio True 5G સેવાનો અનુભવ કરશે અને તેમના અનુભવોના આધારે કંપની એક વ્યાપક 5G સેવા શરૂ કરશે. આ સાથે દેશમાં અન્ય શહેરોમાં 5G સેવાઓ શરૂ થશે. શનિવારે જ ‘ઈન્ડિયા મોબાઈલ કોંગ્રેસ-2022’ના ઉદ્ઘાટન પ્રસંગે પીએમ મોદીએ (PM Modi) 5જી ટેક્નોલોજી લોન્ચ કરી હતી.
Jio True 5G વેલકમ ઓફરમાં શું હશે?
Jio દશેરાથી તેના 5G ગ્રાહકોને 1 Gbps + સુધીની સ્પીડ સાથે અમર્યાદિત 5G ડેટા આપશે. કંપનીનું કહેવું છે કે જેમ જેમ શહેરો તૈયાર થશે તેમ અન્ય શહેરો માટે બીટા ટેસ્ટિંગ સેવાની જાહેરાત કરવામાં આવશે. શહેરનું નેટવર્ક કવરેજ પૂરતું મજબૂત ન થાય ત્યાં સુધી વપરાશકર્તાઓ આ બીટા ટેસ્ટનો લાભ લઈ શકશે. આમંત્રિત ‘Jio વેલકમ ઓફર’ વપરાશકર્તાઓએ તેમના વર્તમાન Jio સિમકાર્ડને બદલવાની જરૂર રહેશે નહીં. બસ તેનો મોબાઈલ 5G હોવો જોઈએ. જો ફોન 5G છે તો Jio 5G સેવા આપમેળે અપગ્રેડ થઈ જશે.
Jio True 5Gમાં શું ખાસ છે?
કંપનીના જણાવ્યા અનુસાર આ એક સ્ટેન્ડ-અલોન નેટવર્ક છે એટલે કે આ એડવાન્સ્ડ 5G નેટવર્કને 4G નેટવર્ક સાથે કોઈ લેવાદેવા નથી. તેમાં ઓછી વિલંબતા, વિશાળ મશીન-ટુ-મશીન સંચાર, 5G વોઇસ, એજ કમ્પ્યુટિંગ અને નેટવર્ક સ્લાઇસિંગ જેવી શ્રેષ્ઠ સુવિધાઓ છે. આ સાથે Jio પાસે 700 MHz, 3500 MHz અને 26 GHz, 5G સ્પેક્ટ્રમ બેન્ડનું સૌથી મોટું મિશ્રણ છે. Jio એકમાત્ર ઓપરેટર છે જેની પાસે 700 MHz લો-બેન્ડ સ્પેક્ટ્રમ છે. આ સાથે કંપની સારું ઇનડોર કવરેજ મેળવવાનો દાવો કરી રહી છે. કંપનીનું કહેવું છે કે આ બેન્ડને યુરોપ, અમેરિકા અને યુકેમાં 5G માટે પ્રીમિયમ બેન્ડ માનવામાં આવે છે.
5G આવવાથી શું ફરક પડશે?
4G ની સરખામણીમાં યુઝરને 5Gમાં વધુ ટેકનિકલ સુવિધાઓ મળશે. 4G માં ઈન્ટરનેટ ડાઉનલોડ સ્પીડ 150 મેગાબાઈટ પ્રતિ સેકન્ડ સુધી મર્યાદિત છે. 5G માં તે 10 GB પ્રતિ સેકન્ડ સુધી જઈ શકે છે. વપરાશકર્તાઓ માત્ર થોડી સેકંડમાં સૌથી ભારે ફાઇલો પણ ડાઉનલોડ કરી શકશે. 5G માં અપલોડ સ્પીડ પણ 1 GB પ્રતિ સેકન્ડ સુધીની હશે જે 4G નેટવર્કમાં માત્ર 50 Mbps સુધી છે. બીજી તરફ 4G કરતાં 5G નેટવર્કની મોટી શ્રેણીને કારણે તે સ્પીડ ઘટાડ્યા વિના ઘણા વધુ ઉપકરણો સાથે કનેક્ટ થઈ શકશે.
શું ડેટા પ્લાન 5G આવ્યા પછી મોંઘા થઈ જશે?
વપરાશકર્તાઓ માટે સૌથી મોટો પ્રશ્ન 5G ઈન્ટરનેટ માટે ચૂકવવાની કિંમત છે. બુધવારથી Jioની સેવાઓ હાલ માટે ફ્રી રહેશે. ટ્રાયલ પૂર્ણ થયા બાદ કંપની નવા પ્લાનની જાહેરાત કરી શકે છે. અન્ય ટેલિકોમ કંપનીઓ પણ ટૂંક સમયમાં તેમના પ્લાન વિશે માહિતી આપી શકે છે. જો કે નવી ટેક્નોલોજી લાવવાના ખર્ચને કારણે 5G સેવાની કિંમત 4G કરતા વધારે રહેવાની ધારણા છે.
