સુરતના ઉપાશ્રયમાં વડોદરાની 19 વર્ષની શ્રાવિકા પર 10 વર્ષ પહેલાં કરેલા રેપના કેસમાં આજે સુરતની કોર્ટે જૈન મુનિને 10 વર્ષની સજા ફટકારી છે.
પ્રાપ્ત માહિતી અનુસાર 10 વર્ષ અગાઉ શહેરના ટીમલીયાવાડ ખાતેના જૈન ઉપાશ્રયમાં જૈન મુનિ શાંતિસાગરે વડોદરાની શ્રાવિકા પર તાંત્રિક વિધિના બહાને બળાત્કાર ગુજાર્યો હતો. આ કેસમાં શ્રાવિકા અને તેના પરિવાર જૈન મુનિ વિરુદ્ધ પોલીસ ફરિયાદ કરી હતી.
આ કેસ ચાલી જતા સુરતની સેશન્સ કોર્ટે જૈન મુનિને દોષિત ઠરાવી 10 વર્ષની સજા સંભળાવી છે. ફરિયાદ દાખલ થઈ ત્યારથી એટલે કે પાછલા 8 વર્ષથી જૈન મુનિ શાંતિસાગર જેલમાં છે. ઘટના બની ત્યારે શ્રાવિકાની ઉંમર 19 અને જૈન મુનિ શાંતિસાગરની ઉંમર 49 વર્ષની હતી.
સરકારી વકીલે આજીવન કેદની સજાની માંગ કરી હતી
છેલ્લાં આઠ વર્ષથી આ કેસ ચાલી રહ્યો હતો. ફાઈનલ હિયરિંગમાં સરકારી વકીલ નયન સુખડવાલાએ સરકાર તરફથી કડક આરોપી મુનિ સામે મહત્તમ સજા એટલે કે આજીવન કેદની સજાની માંગ કરી હતી. તેમણે દલીલમાં “ગુરુ બ્રહ્મા ગુરુ વિષ્ણુ…” શ્લોકનો ઉલ્લેખ કરતાં કહ્યું હતું કે ગુરુનું સ્થાન માતા-પિતાથી પણ ઊંચું માનવામાં આવે છે. ગુરુનું કામ શિષ્યમાં રહેલા ખોટા વિચારોનો નાશ કરવાનો હોય છે, પરંતુ જ્યારે ગુરુ જ દુષ્કર્મ કરે તો તેની ગંભીરતા ઘણી વધી જાય છે. સમગ્ર સમાજમાં ખોટો સંદેશ જાય છે. આ કૃત્યથી પીડિતાને માનસિક અને શારીરિક ક્ષતિ પહોંચી હતી. આઘાતમાં પિતા પણ ગુજરી ગયા. પીડિતાને વળતર આપવામાં આવે તે માટે સરકાર પક્ષે પીડિત સહાય યોજના અંતર્ગત વળતરની પણ માંગ કરી હતી.
ઘટનાના દિવસે શું બન્યું હતું?
ફરિયાદ અનુસાર મૂળ મધ્યપ્રદેશના વતની અને હાલ વડોદરાના કારેલીબાગમાં રહેતી યુવતી 2017ની 1 ઓક્ટોબરે માતા-પિતા સાથે જૈન દિગમ્બર મંદિરે આવી હતી. જ્યાં શાંતિસાગરે ફોન કરીને યુવતીના પિતાને બોલાવ્યા હતા. તેણે માતા-પિતા તથા યુવતીના ભાઇને અન્ય રૂમમાં બેસાડી યુવતીને બીજી રૂમમાં લઈ જઈ ત્યાં દુષ્કર્મ આચર્યું હતું.
દુષ્કર્મીએ મુનિએ માતા-પિતાને રૂમમાં બેસાડી શ્રી ધનપતિ કુબેરાઇ નમોનો જાપ આંખો બંધ કરીને જપવા જણાવ્યું હતું. તથા કહેવામાં ન આવે ત્યાં સુધી આંખો નહીં ખોલવા કહ્યું હતું. ત્યારબાદ માતા-પિતા જાપ કરવા લાગ્યા તો આરોપી પીડિતાના ભાઇને અન્ય એક રૂમમાં લઇ ગયો હતો અ્ને ત્યાં બેસાડી બાદમાં પીડિતાને અન્ય રૂમમાં લઇ ગયો હતો અને દુષ્કર્મ આચર્યું હતું.
